老友記生日,趁五一補假,去熊亭食返餐.都冇乜睇真d有咩食就係咁落單啦!雖然我有好多相漏咗,你地都知我多數都係掛住食架啦,但都有好多相交差架啦.
炒野菜,相當不錯,火候足.
蒸蛋,滑滑,夠熱!
吉列蠔,菠菜餃子雞翼.新鮮熱辣上檯,梗好食架,但我未食已經俾大家搞掂啦.
魚生好快就上檯既,都唔知叫咗幾多咯.
燒豆腐,入面好嫰既,因為係用百福豆腐之類既材料做既,但可以煮成咁,真係算叻啦!
燒雞翼,我鍾意食,識得將雞翼開邊黎燒,又走咗一枝骨,食得方便,又入味.正!
天婦羅?我一向都唔主張食d咁重量級既野既,係咁意點七隻蝦同幾年芋頭,南瓜,蕃薯同茄子啦.
黑椒牛柳粒,佢地話好味喎.
兩串燒白果,都唔錯吖,但要用手食,少少麻煩啦,但都易剝既.
燒鯖魚,唔錯.
燒牛舌,我冇食,但我睇住佢地咬落去,知道係好腍既.
再叫餃子,春卷,咖哩角同菠菜餃子雞翼.
今次我有試啦,唔漏既.
冷麵
泡菜
魚奶湯,估唔到夠熱又好味!
叫咗三文魚石狩窩同呢個野菌窩
雞軟骨,正!一人一串再encore.
牛仔骨同牛舌
原來呢d叫汁燒豆腐,外面層皮好薄,淡淡地,唔錯架.
呢個最好笑,叫咩季節珍味,Bibi好奇就點黎睇下,原來係漬物蓮藕.
多春魚
甜品有任叫既紅豆糕,但冇人要食.雪糕係送既,一人一客,冇晒綠茶啦,得芒果,黑芝麻,Cookie & Cream.
我地只點咗芒果同黑芝麻.
我冇食到攬住個肚,事關我唔係暴食一族黎,食自助餐或者放題,唔一定要食到回本先得既.
============================================
感謝 May姨Blog 提供以上資料
May姨Blog的網誌: http://maylibibi.blogspot.hk/
============================================