四個女子包場? - Cafe de Savoy

昨晚約咗pri, Mabel同Eunice係呢度食飯．因為佢地早咗，所以未夠六點半我地就已經坐定定啦！成個場得我地一檯客咋．

我地叫咗四分餐，平均唔駛一舊水一位．最先上場既係新鮮熱辣兼軟熟既蒜蓉包，一人有兩件架，但我地只殺咗一件，留肚麻．

跟住係羅宋湯同忌廉蘑菰湯，有得揀，我多數都揀忌廉湯，我係唔會隨便點紅湯既，驚有牛肉成份麻．

我要咗吉列豬扒日式湯烏冬($68)，睇下，見唔見到碗烏冬升起既煙呀？塊豬扒炸到好似冇油咁架，又鬆軟，外皮又唔厚，仲脆卜卜添！佢地仲好細心咁切成一長條咁，好方便點醬同咬，伴碟既生菜你地都睇到啦，係正菜黎．

Mabel同Eunice都叫咗右面呢款南瓜意大利飯．我對意大利飯冇乜興趣，所以唔會點．我未到之前，佢地係度估我會點咩食，居然冇人估中喎．

pri比較喜歡食扒，所以佢食西冷，跟意粉，據佢既食評話，ｄ意粉係彈牙既，師奶都話過，呢度既意粉係有炒過先俾你食既，牛扒亦唔鞋．

晚餐係包甜品架，士多啤梨慕司蛋糕，仲係碟底畫上士多啤梨漿，誠意可嘉！pri話配咖啡就一流啦．

最衰侍應叔叔多嘴啦：食咗呢件，一陣個餅仲食唔食呀？踢爆晒我地既部署．

但我地四個大食姑婆一於砌埋佢！咩呀？食完至算啦．

八點幾，開始都見有幾檯客，原來都有人一個人黎食晚餐架．

============================================

感謝 May姨Blog 提供以上資料

May姨Blog的網誌: http://maylibibi.blogspot.hk/

============================================