與公司同事午膳，通常都離不開上茶樓或往館子鑽，所以如果當天是單打獨鬥的話，筆者也總喜愛以三文治、漢堡包作為午餐，既方便又快捷。不過近一年來，香港的物價實在貴得驚人，就以午間吃一頓飯為例，閒閒地也要三、四十元，這天見麥當奴的「午間超值選」都只是二十餘塊，而且那個甚麼香草包還未吃過，好，就試試看。

這份特選香草雞堡套餐，原價 $29， 但星期一至五由中午十二時至下午三時做特價，只需 $25， 聽講話係壓軸出擊，而且是限定供應。先看看個包裝紙盒，鮮艷奪目的紫色，的確夠曬精美，不過如果是堂食的話，我倒建議店方不如唔好俾盒，始終環保一點才好嘛。再細看內裡有甚麼餡料，原來都幾豐富，以香草麵包夾著雞塊、雜菜絲、蕃茄、歐陸芝士、煙肉等，再配以蒜香醬汁。咬一口麵包，香草味真係好淡，唔夠濃郁，對於每次煎牛扒也勁愛灑上大量香草的我來說，真是若有所失，幸好個包的口感都幾鬆軟。至於件雞，味道都唔錯，雖然稱不上甚麼鮮嫩多汁，但肉質還算豐厚，亦毫不嚡口，配上爽口的雜菜絲、多汁的蕃茄、半溶的軟滑歐陸芝士、香脆的煙肉，清爽的蒜香醬汁，全部材料都非常之夾，唔錯。

另外麥當奴最近在加價的同日，推出了一系列的超值選，售價由 $5 至 $8 不等，咁就先試試個雙牛芝堡 ($8)。其實這個芝堡同依家賣緊的 8 號餐「雙層芝士孖堡」分別不大，只是少了一塊芝士，不過後者的單售價是 $13.80， 反而這款新包就足足平咗 $5.80。 味道方面，其實麥當奴漢堡包的質素，一般來說都算穩定，唔會有太大驚喜，當然亦不會有驚嚇，但有時也要視乎個別分店而定，不過當街口間「翠河」的腸仔包都要賣 $7 的時候，這個雙牛芝堡就顯得更為抵食。包身入口尚算鬆軟，雙層牛肉配香濃芝士，口感夠曬豐富，可惜內裡夾了塊我最無好感的酸瓜，好彩啲洋蔥粒和茄醬都幾惹味，整體感覺良好，牛魔皇你有口福喇。

又試埋另一款超值包麥香雞 ($8)，不過頗明顯，這個包無論在賣相、用料、口感等各方面都被雙牛芝堡比下去。這包不單止材料毫不豐富，而且還包身大餡料少，甚至連塊雞都又單薄又嚡口，咬落仲非常之乾，無乜肉汁可言，醬汁更加下得甚為吝嗇，唯一可取的是生菜都幾爽口，個包又幾夠熱，但同樣俾 $8，當然是雙牛芝堡好食得多啦！

印象中麥當奴都出過好幾款不同味道的批，甚麼蘋果批、菠蘿派、紅豆批、朱古力批、粟米批、香芋批等，每隔一段時間就會輪流出現。至於這次的香芋批 ($6) 味道其實挺不錯，起碼沒有蘋果批那麼甜，還吃得出芋頭味，只是略嫌唔夠熱辣脆口，暫時是本人緊隨紅豆批後的第二選擇。

至於最近推出的全新熱香餅早晨全餐 ($24.50)，其實真的不明白何新之有？咪即係早晨全餐加兩塊熱香餅，不過現在推廣期內，會送紙巾類產品，但數量有限，送完即止，就以我和老公吃的當天為例，可能是假日關係，只是早上十點，贈品就話已經派完了。早晨全餐一向最不喜歡吃的就是那兩塊鬆餅，又乾又粗糙，而且這份早餐的豬柳太鹹，蛋又唔夠嫩滑，尤幸塗包的果醬夠甜美，還有我至愛的圓碌碌熱香餅，入口夠曬鬆軟，配上牛油和糖漿，噢，大鑊，膽固醇超曬標添。

============================================

感謝 mjqueen7e 提供以上資料

mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong

============================================