新鮮有營素食自助餐

在飲食方面，自問向來都唔算好健康，皆因平日經常外出用膳，而且往往多肉少菜，所以當友人邀約我去吃素食自助餐，便一口答應下來。原來友人早前瀏覽網頁時，無意中發現九龍城開咗間新派 Fusion 素食自助餐廳，而且店子仲做緊 Promotion，客人只需到餐廳專頁分享佢地嘅試業大優惠，便可即享 lunch buffet 減 $10、dinner buffet 減 $20，並同時享有 88 折。友人見午市幾抵食，原價 $108 的 Lunch Buffet，現在連加一，每位只實收 $96，所以就拉了我來做陪客。





原來友人所說的餐廳是以乳酪雪糕起家的《Red Mango》，而這家新開分店，就座落於九龍城廣場地庫 1 樓。餐廳面積雖然不算特別大，但勝在座位闊落，讓人坐得舒服。







事不宜遲，立即開餐，先由沙律吧開始，自助 Salad Bar 的食物款式雖然唔算好豐富，但其實選擇也不少。除了有新鮮爽脆的羅馬生菜和紅毛生菜外，還有車厘茄、鷹咀豆、青瓜、粟米粒、紅腰豆、中華沙律、青橄欖、紅菜頭等。而沙律汁方面，就有蜜桃汁、提子玉桂沙律汁、檸檬芝麻沙律汁和小紅莓沙律汁，不過個人就比較喜愛自家製的薄荷榛子醬和無花果醬，尤其是後者，帶 Earthy 的甜味。





















至於其他食物方面，先介紹放置於 Buffet 吧檯上排的菜式，包括有紅素沙嗲串燒、匈牙利甜椒烤素雞、泰式小牛扒伴百葉豆腐、烤豆卷槌、孜然魷魚圈、法式炸魚、小茴香雞肶菇、墨西哥黑椒素豬腸、烤印度小餅、椰香肉碎三色椒、意式扒雜菜等。當中要特別推介嘅，有賣相似雞脾的豆卷槌和印度小餅，前者以腐皮製作，烤焗後做出外脆內軟的口感；而後者食落雖然唔算好酥脆，但沾上沙嗲醬後，亦令人吃不停口。

















熱盤方面，其實花款亦多不勝數，除了有台式海帶蠔仔羹、星加坡肉骨茶、白胡椒蘿蔔、廣東榨菜粉絲煲外，還有海帶百葉豆腐、素肉冬瓜、上湯杞子浸時菜、舞茸菇腐皮小棠菜、牛肝菌素海參珍珠筍和泰式冬蔭功素丸。雖然菜式驚喜唔大，但整體味道都唔錯，尤其是冬蔭功素丸，雖然湯入面無肉和蝦，但味道和泰國的冬蔭功湯無分別，而且內裡的素丸勁彈牙，食味一流！















至於清新的拌菜方面，除了有三款以迷你小碟現身嘅芝麻醬茄子、木耳糕、肉碎啤梨外，仲有麻辣蹄羹、凍青尖椒、黑芝麻醬白木耳、尼日尼亞烤花枝薯角等，不過由於要留肚飲湯，所以只是淺嘗，點到即止。而湯方面，就有兩款，包括羅宋湯和清熱潤肺的紅蘿蔔粟米合掌瓜湯。





點心方面，選擇不多，較喜歡的有松露素燒賣，食落有點煙韌的感覺；其他款式仲有斑蘭蓮蓉包和叉燒包等。





仍覺意猶未盡？其實餐廳另備有兩款即叫即做的飯麵，包括素海鮮黃薑飯和肉鬆燥麵，而且可以無限添食。選了後者，麵條吃起來雖然唔算好煙韌、但入口幾爽身，感覺清純。

甜品方面，只得兩款，包括焦糖吉士布甸和杞子桂花糕，布甸屬必試之選，皆因金黃色的焦糖面，入口又厚又脆，而且布丁以大豆做成，像真度極高。





飲品方面，選擇都幾多，除了有香橙汁、黑加侖子汁外，還有豆奶、即磨咖啡、錫蘭紅茶、花香綠茶、即溶檸檬及酸柑冷茶、即溶薑蜜茶、薏米即溶飲品等。



最後，記得要留肚吃餐廳的乳酪雪糕，而這天就有原味和藍莓兩款口味，成品以本地脫脂奶及乳酪製作，個人心水推介藍莓味，入口清新香甜，質地厚滑，而且甜度及酸度都非常平均，健康低脂又冰涼，絕對是夏日涼透心的最佳選擇。以  $100 有找的價錢吃到一頓不錯的 Lunch Buffet，而且仲可以食得咁滿足，友人果然無介紹錯。

================================

感謝mjqueen7e提供以上資料

mjqueen7e的網誌: http://www.openrice.com/zh/gourmet/reviews.htm?userid=66478&city=hongkong

================================