斤斤計較既地勤小姐

剛剛睇到一篇寫旅遊既日記 , 當中記載了板主坐某廉價航空時 , 遇到一個斤斤計較既地勤小姐 . 小妹都係第一次見到有人用 " 斤斤計較 " 黎形容地勤 , 忍唔住笑左出黎 , 但又好想同大家解釋清楚 , 同事唔係大家想像中咁 " 斤斤計較 " 架 !

之前 , 小妹都有同大家分享過航空公司機票近年有幾平 . 講真 , 咁平既機票 , 你叫航空公司點生存 , 唯一方法當然係乘客到攞返啦 . 叫得廉價航空一定比其他航空公司更搶錢 , 你想食飛機餐 , 無問題 , 麻煩 40 蚊 ! 你想寄行李 , 當然無問題 , 麻煩 120 蚊一斤 ! 你想要個靚位 , 都話無問題諾 , 比錢就得嗱 !

試問有邊位地勤唔想做好人 , 而想日日比人鬧 ? 一講到錢 , 個客就黑面 , 明明知道係自己問題 , 又要話同事冷血 , 一斤都同佢計 .  要知道 , 我地都只係打份工 , 你唔比錢 , 唔通我幫你比咩 ?

其實好多時 , 同事都唔會捉到咁緊 , 除非個客一離到 counter , 就好無禮貌兼唔合作 , 同事都係人 , 都有情緒 , 個客用咩態度對佢 , 佢唔可以還口 , 但就可以大條道理捉你件行李 .

講真 , 你唔過三斤 , 同事通常都當睇佢唔到 . 但又有些豬豬客一見到過左三斤 , 就大大聲同身邊朋友講 " 三斤 Wor ! " , 試問你咁大聲 , 同事想當睇唔到都唔得啦 ! 小妹在此奉勸大家 : 黎到 counter 有禮貌 , 超重唔好話人知 , 咁我就當睇唔到 !

另外 , 有時因為有老細係到 , 同事見個客有禮又合作 , 通常都會叫佢執下野 , 做下樣 , 拖延一下時間 , 等老細行開 , 同事就即刻放個客走 . 咁大家明白點解地勤成日都話 " 你執下野先啦 ! " 咁大家下次要識做啦 , 係咁依都執走少少 , 當 handcarry 又好 , 比返屋企人再轉頭攞返都好 , 總之唔好比老細見到就得嗱 !

在此麻煩各位合作 , 去旅行唔係搬屋 , 無必要帶咁多重野 , 辛苦自己 , 又難為同事 !

溫馨提示 : 除左美加係計行李件數外 , 一般航空公司都只可寄 20 公斤以下行李 , 咁當然你係會員或坐頭等商務又另計啦 ! 手提行李係有限制架 , 唔可以超過 7 公斤 , 而 notebook 唔會計係依 7 公斤到 , 即可以免費手提 , 但只限一部 . 如有問題 , 可向航空公司查詢 , 又或者可以學黑人爸爸同媽媽咁 , 大熱天時 , 身穿十件衫 , 十條褲 ~