鴨脷洲市政大廈內嘅食店聽聞己久, 衹係路途遙遠同有D轉接, 今日忽然有股沖勁要去行一敞, 喺旺角坐van仔去香港仔中心再轉的士去, 原來都幾快就到. 市政大廈就喺鴨脷洲大街上, 好易揾到. 半日行程節目都幾豐富, 行海旁吹吓海風, 魚市場購物, 遊船河睇夜影, 食嘅仲係地產地消低炭海鮮餐, 好有遊客feel.
市政大廈地下係街市, 乾濕貨都有得賣, 一樓全部都係食店, book 左位之後就出鴨脷洲大街行一陣先.
黃昏時份Magic Moment 特別舒服, 海旁有街渡可以過對面香港仔, 不過呢個碼頭似乎衹係比船家上落人貨之用, 並非公眾過海碼頭.
地下有十多間海鮮檔, 賣嘅大部份都係本地海產, 日日新鮮, 地產地消, 我地分別喺3間買左本地海中蝦, 海星班同鮑魚, 之後就上樓上開大餐.
一樓食店有6間, 晚市開嘅就祗有珠記同栢記, 我地就喺珠記book左位開餐.
窗邊坐位對正180度無敵大海景, 觀景舒服, 菜牌簡單, 因為大多數都係自來海鮮代煮, 油料每斤收$50都好合理. 叫完餸就整枝大啤, 一邊飲啤酒一邊睇海景, 正到痺.
豉油皇煎海中蝦($40+$30) - 香口惹味, 蝦肉鮮味彈牙, 蝦膏甘香, 火喉十足, 蝦殼好似食緊蝦片咁香脆, 可以連殼都食埋, 極高質素.
陳皮蒸鮑魚($90+$50) - $10/隻大鮑魚, 加D陳皮一齊蒸就更加鮮甜軟熟, 啖啖肉夠爽引. 原來佢地仲有一味椒鹽鮑魚, 下次一定要試.
清蒸燕尾星($90+$50) - 檔主話係海魚, 其實對我黎講祇要係好食就得, 清蒸火喉恰到好處, 肉剛癡骨, 肉嫩軟滑鮮味. 魚汁更加係精華所在, 撈飯天下無敵, 食左兩大碗.
蒜蓉白菜仔($34) - 點都要幫襯吓佢地D小菜嘅, 白菜仔炒得夠清爽.
食完飯行吓海旁, 睇吓夜影, 去到公眾過海碼頭, 順帶遊埋船河過香港仔.
大約2~3分鐘船程就到香港仔, 快靚正. 跟住行去山窿謝記睇睇, 原來睌上6點就收, 要留待下回分曉.
瀏覽人數 :
感謝 大力 提供以上資料
大力的網誌: http://www.daileghk.com/
