5 APRIL 2014(SAT)
嘩哈哈...今晚我地兩母子有特別節目，就係去拍拖睇兒童音樂劇呀~
其實之前係BK Milk參加左留言送門票遊戲，好好彩咁得中左，所以就得到兩張兒童音樂劇門票~
當知道有得去睇音樂劇之後，為左令小小豬睇得更投入，大肥豬仲專登去圖書館借左本圖書，開始同小小豬講依個故事，真係一個考慮周詳嘅好爸爸呀~
依幾晚都同小小豬講依個故事同埋講佢知會去探小白兔，所以小小豬都好期待又心急，好想快啲有得去，終於等到今日可以入場睇啦！
雖然我地都只係得兩張門票，不過大肥豬都陪我地一齊去，以免我唔識返屋企，所以呢....我地就入場睇，佢就係門口等我地~
入場時每個小朋友都會收到一隻小龜公仔，小小豬都不知幾鐘意，仲全程拎到實一實呀~
小小豬好似好專心咁睇場刊，不過好似調轉左哦~
開場啦！基本上全場小朋友都係佔絕大部分，當見到啲小動物出場時，大家都好興奮，仲跟埋啲小動物一齊唱歌，所以場面又真係好熱鬧。尤其係中場活動時，小動物同我地觀眾玩拋波波遊戲時，場面又真係好熱鬧，大家都好開心呀！
小小豬表現又點呢？可能之前同佢打好左個底，所以佢對依個故事都已經好了解，所以睇起上嚟都係好專心，每次見到小白兔同小龜出場時，佢都好興奮添。雖然唔係好識唱嗰啲歌仔，不過佢都會搖吓個身，間唔中都跟住唱幾句添。
其實唔止小朋友，我都覺得幾好睇，一啲都唔覺悶，所以依一個多小時入面啲時間又真係好似過得好快。
唯一我覺得需要改善嘅就係座位方面(依個係場地問題，唔關劇團事)，就以小小豬為例，佢一坐底之後，已經唔係好高，再加上前面係一位大人，所以跟本就係睇唔到，最後全場就坐係我大脾上睇。
其實唔止小小豬，我附近好多比小小豬大嘅小朋友都一樣要坐大脾。如果場地可以有啲高墊安排，可以等小朋友座高少少嚟睇，咁就非常好啦！
經過今日，我都覺得小小豬係幾鐘意睇音樂劇，所以我地都會留意多啲唔同種類嘅兒童音樂劇，有機會都可以帶小小豬去睇多啲，等佢見識多啲呀！
其他博客區
※※ SINA ※※
※※ MyBB星級Blogger ※※
※※ WeShare ※※
※※ She.com ※※
