1 JUNE 2014(SUN)
原本都計劃左一連串活動趁今次依個端午節長假期，不過唔知係唔係尋日小小豬玩得太開心，所以冇端端又發燒，所以咩節目都冇晒，乖乖留係屋企休息啦！
其實小小豬除左發燒之後，其他一切都係好正常，某程度仲精神過我，所以就同小小豬嚟個親子廚房，一齊整雪糕啦~
其實上次整肥媽整版Tiramisu雪糕(請按此)，小小豬見到都好想食，不過因為有咖啡關係，所以有得睇就冇得食。
今次我買好哂材料返屋企時，又撞啱小小豬發燒，所以一樣都係唔食得。不過唔緊要，其實親子廚房最主要都係享受整嘅過程嘛~
今次我係整士多啤梨味雪糕， 最重要就係要將啲士多啤梨切粒粒啦！
雖然刀好似係一件比較危險嘅工具，不過我見小小豬都已經開始大個，之前都曾經用過啲外賣膠刀試過切腸仔，我見佢都可以做得到，所以今次我都有放手俾小小豬幫手切啲士多啤梨粒粒。當然，小小豬都係負責切開幾粒，要做到好細細粒就一定係我執手尾啦~
倒好啲淡忌廉先~
然彼用打蛋器將淡忌廉打至六成起泡，個傻豬仔全程都要自己拎住個打蛋器，就算唔夠力都要自己拎，真係俾佢笑C呀~
加入少少煉奶~
再加少少士多啤梨香油~
將啲士多啤梨粒粒拌勻~
倒入容器內~
個傻仔話仲有少少士多啤梨粒粒，話唔好浪費要倒埋入盒呀~
最後放入冰箱雪三小時至硬身就食得啦~
哈哈哈...小小豬主理嘅士多啤梨雪糕完成啦，我當然係等佢瞓左覺先有得食啦！不過同上次一樣面頭好多泡泡唔太靚添，真係要留意吓依個問題，等我下次可以整得靚啲呀~
啖啖雪燃加士多啤梨，口感都唔錯呀~
加左啲新鮮士多啤梨又真係好食好多，當然另一個原因係小小豬整(雖然我都有份幫手，不過絕大部分都係小小豬做，所以我我都已經當係小小豬整俾我食)，所以食落特別甜啲添呀！
其他博客區
※※ SINA ※※
※※ MyBB星級Blogger ※※
※※ BlogSpot ※※
※※ WeShare ※※
※※ She.com ※※
※※ theZtyle ※※
※※ SeeWide ※※
※※ BK Milk 親子語 ※※
※※ Cook 1 Cook 星級廚師 ※※
