抱歉,發生點錯誤。
重新載入
大帽山賞霧、農場鮮奶有限公司一日遊
SiuB_Fan
2014-03-10
1345
0
分享
收藏
成日同小朋友講天氣,好天落雨見得多,乜野係大霧呢?見到今日天氣麻麻,多雲有霧,所以決定去大帽山深入雲海/霧海等小朋友受一下乜野叫大霧。
大帽山郊野公園其實唔難去,你可以係荃灣地鐵站或西鐵站坐51號巴士,去到荃錦凹落車就可以。而51號的另一邊總站係錦上路,大家可以係元朗個邊入都可以。

去到落車搵扶輪公園,就可以去到扶輪公園的郊遊地點。呢個地方可以野餐、燒烤、仲有數條不同難度的行山徑會路經或係到出發。例如難度極適合小朋友體驗行山的「大帽山家樂徑」等等,詳情可以參考下漁農自然護理處的網頁。


大帽山家樂徑


大帽山郊野公園


當日真係幾大霧,小朋友見到十分開心,仲話自己係雲裏面,要試下捉住D雲,呢個時候當然係教育下一代的時候啦,講下天氣氣象等知識。





之後我地去左大帽山郊野公園遊客中心到參觀,以遊客中心來講,呢度算多野睇。而且都幾新淨,我估計佢係會轉展覽的。依家做緊的展覽係講氣象轉變對香港的影響,帶小朋友參觀都十分有教育意義。








裏面有展覽,有小遊戲,幫助小朋友認識氣候轉變的影響。


呢個地球先生其實係可以同佢合照的,佢對面有部機,影完相可以SEND返俾你。我地仲順手用佢影左張全家幅。






裏面亦有不同的動植物展覽,有一個極地有關的展覽,上面呢條係南極魚…



認識郊野守則同點樣幫助保護大自然,我出門口問返阿仔,佢又合得出喎。





 估唔到呢張相係佢的遺照,之後我地唔見左呢隻狗狗。

係觀景台睇埋風景同大霧之後,又差不多到午餐時間,所以我地就去搵野食。不過見咁啱係大帽山,又唔想去荃灣同人迫,所以決定去附近的農場牛奶有限公司食做午餐,睇下羊仔。


如果你係扶輪公園出發,你只需要坐51號向錦上路方向,去到「雷公田」站落車睇住指示牌行入去就可以了,大概要十五至二十分鐘啦。係元朗就可以坐72號小巴,直到雷公田,都係行入去可以了。而自駕呢?直接係雷公田轉入去,小心單程路,農場有少量車位供應。


其實唔好太期待佢係一個大農場,有動物,有牛睇,其實佢應該係做牛奶生意,順手整間士多仔招待下行山人仕咁解。小朋友可以係到睇下陸龜、餵下羊。如果你喜歡這兒的牛奶,你仲可以買回家享用。食物方面呢,其實得餐旦面同肉丁面,日就有撈烏東,而呢度既薑汁撞奶我就覺得唔夠濃味,如果薑味再濃一點就好了。













食完野,餵下羊,就可以離開。我地亦踏上回家既旅程。






============================================

感謝 SiuB_Fan 提供以上資料

SiuB_Fan的網誌: http://siutimfamily.blogspot.hk/


============================================

~END~
商店 農場鮮奶有限公司 Farm Milk Co. Ltd.