|
川善茶居
|
|
honeyhinbaby
2014-06-18
1213
0
|
|
慳妹的生日飯！ 女主角話想high tea，古惑的我乘機提議到「川善茶居」！一直想試佢嘅抹茶甜點同飲品，但一個人實在試唔哂咁多嘢……平時同拾爺搵食，又好少會tea……今次，簡直係我「公器私用」嘅大好時機呀！ 兩點到，到達餐廳樓下，等lift時撞到國泰，搭lift時，佢同我講餐廳入面有隻貓！呢次真係報應喇，利用人家嘅生日去滿足自己私慾，結果換嚟自己邊食邊驚！最慘係國泰，佢比我更驚貓！但「義」字行頭嘅佢，明知山有虎，偏向虎山行！我倆去到餐廳門口，雖然已經見到打工達人坐咗喺到，但我倆都唔敢入去住，先問問店員係咪真係有貓，再要求佢唔好俾隻貓行近我哋。店員表示隻貓唔會傷人，佢哋愛貓嘅人係唔會明白我哋怕貓嘅，好多時唔係怕佢傷人，而係怕見到佢個樣、聽到佢把聲、甚至怕同佢於同一空間存在……我係一個但凡有毛嘅動物都驚嘅人，有時見到啲狗仔好得意，同到大狗覺得佢哋好乖，但只要佢哋行近我，我就會嚇到腳軟，我係好驚被佢哋掂到自己呀！(我懷疑係細個時媽媽成日嚇我話貓有貓蝨，狗有狗蝨，搞到我咁驚……)國泰向店員表示自己真係好怕貓，店員先不情不願咁話會盡量唔俾隻貓行去我哋張枱…… 入到餐廳，先發現呢到好細……細都唔緊要，但呢到作為俾人嘆茶、relax嘅地方，啲位卻好擠迫……我哋張四人枱雖大，但有兩張係凳仔，係連靠背都冇嘅凳仔……去大家樂食個快餐都坐得C服過呢到呀！>< 坐低等緊慳妹嘅同時，我哋先睇吓個menu。國泰同打工達人本來想叫啲sandwich嘅嘢，但我訂位時已經order咗個cage afternoon tea set，所以我提議先睇睇個set嘅份量，再決定外加咩嘢食。國泰本來提議先叫嘢飲，飲住等慳妹，但店員竟然回覆我哋冇嘢飲供應！！！吓﹖呢到係「茶居」嚟架喎，點解會冇嘢飲架﹖！我哋三個都諗唔明！再叫個店員嚟問清楚，佢話而家冇嘢飲，想飲嘢要五、六個鐘之後先有……打工達人放棄叫嘢飲，著店員俾四杯水我哋。我好失望……嚟呢到係要試抹茶，但就冇抹茶飲…… 等到慳妹到埋，我哋就叫店員上afternoon tea set喇。
Cage afternoon tea set ($298) 下層﹕兩款鹹點各兩件，唔知咩名堂，其中一件係cheese面，另一件就放豆腐……極度九唔搭八，前者味道一般，後者總覺得怪怪哋咁……除咗呢兩種鹹點，仲有一小撮沙律，但唔覺有咩特別……
Cage afternoon tea set ($298) 下層﹕Matcha Cheese Cake, Matcha Angel Cake, Matcha Loaf Cake Matcha Cheese Cake﹕之前食過東海堂同小山園合作嘅cheese cake，所以好自然地與之比較，呢到嘅cheese cake其抹茶味好明顯被比下去……對於抹茶狂熱份子如我，真係覺得個味唔夠濃……失望…… Matcha Angel Cake﹕面層嘅抹茶mousse味道好濃，如果成件cake都係咁就perfect喇！個人唔太鍾情海綿蛋糕。 Matcha Loaf Cake﹕唔係見佢綠色都聯想唔到佢係抹茶產品…… 食緊afternoon tea set時，大家都覺份量已夠，唔需要叫sandwich，但我想試埋個抹茶心太軟，於是就order咗。
Matcha Chocolate Fondant ($78)﹕刀子一掂到件cake已經感受到外脆嘅crispy，一切開，深綠色嘅抹茶醬徐徐流出，觀感一流！吃一小口，蛋糕外脆內軟，熱度均勻，抹茶味慢慢滲出，口腔內滿滿幸福之感！不過，以其份量同呢到嘅環境收$78，始終感覺係overpriced咗。 我見menu mention呢個afternoon tea set有Chinese tea跟，於是不下一次問個店員，佢話幫我跟進吓，但卻每次都冇咗回事……不過，佢記得我哋想飲嘢，主動同我哋講可以整到一種飲品，於是我哋就order咗兩杯Matcha Caipirinha。
Matcha Caipirinha ($48)﹕加咗lime同lemonade嘅抹茶飲品，酸酸味味好醒胃，但就有少少蓋咗抹茶個味…… 喺到食食吓嘢，隻貓突然走咗出嚟！本來佢一直stay喺隔離枱，一動不動，我只要求同打工達人換個位，令自己同佢距離冇咁近都仲可以，國泰亦只需留意到佢嘅位置就安心，點知……就喺店員同我講有嘢飲恢復時，我見到隻腷突然出現於我哋後面一枱到，我嚇到指住對面 (剛好就係國泰身後，我哋打對坐。)，講唔出嘢，國泰即時意識到隻貓喺後面，嚇到大嗌！即時跑到我身邊！其實隻貓仲未係咁近，都係我嚇親國泰，令佢尖叫，搞到全場都望住我哋一枱。咁都算喇，最慘係國泰一叫，隻貓都驚驚哋，往自己右方跳走兩步後，企咗喺到望住我哋！呢個時候個店員先走出嚟，仲未打算做任何嘢，反而係水吧亞姐行出嚟想要安撫我哋。國泰一見隻貓郁，就嚇到走咗入餐廳水吧……(即係人家亞姐行出嚟，佢就行入去……)我本來仲強裝鎮定，國泰入水吧，我最多都係嚇到企佢原先企嘅位，但係……隻貓定睛望住我，仲有向前跑嘅意慾，我嚇到衝埋入人家餐廳個水吧……最後，店員將隻貓抱出餐廳外面露台，閂埋度門，我倆先行番出嚟……我感到全場食客都怒睥住我哋，因為有啲人係嚟搵貓玩嘅，佢哋一定覺得我哋剛才嘅舉動係虐畜……都係嗰句，唔怕貓嘅人係唔會明我哋呢啲怕貓嘅可以怕到咩程度！一諗到暑假會去希臘，嗰到周圍都係貓，我都開始腳軟…… 我同國泰坐番埋位後，我對腳軟咗好一陣子，之後雖然明知隻貓喺我身後嘅露台出唔到嚟，但我仍然為任何閃過嘅影像而嚇一跳，總覺得隻貓會突然閃出……而成件事最慘係……在場有兩個我教嘅學生喺到！我哋四個食食吓嘢時，佢哋先入嚟坐……呢兩個衰妹見到我嚇到癲個樣，笑到收唔到聲，仲話叫我加佢哋考試分做掩口費……我反而恐嚇佢哋唔可以將此事洩露出去。 成餐飯大家都係互相update近況，但最近成為兩子女之母嘅慳妹，明顯壓力太大，罕有地釋出負面情緒……不過，有人呻吓點都係好事，所以我哋好鼓勵佢去呻！希望佢呻完之後，個人會開番心哂啦！ 食到四點，慳妹有嘢要做，於是我哋就埋單。呢個時候疑似老闆娘番咗嚟，餐廳開始恢復飲品，但too late，我哋要走喇，仲唔會再幫襯……除咗係因為我怕貓外，仲因為我覺得餐廳有動物感覺唔太衛生。店員拎咗bill嚟時，我表示afternoon tea冇提供嘢飲，佢又話要問，今次老闆娘答話有Chinese tea，於是我哋就表示冇飲過，店員話而家俾，我哋話要走，打工達人仲好不滿地表示我哋多番追問，店員都冇follow，所以個afternoon tea set唔可以收我哋原價。店員好似聽唔明我哋講嘢咁，只係重覆張單嘅價錢，後來係老闆娘表示佢係新嚟嘅，free我哋order咗嘅兩杯嘢飲當補償。
評分時間﹕
餐廳資料：
感謝 honeyhinbaby 提供以上資料 honeyhinbaby的網誌: http://honeyhinbaby.wordpress.com/
|
| 商店 | 川善茶居 |