|
南海一號
|
|
honeyhinbaby
2012-03-16
847
0
|
|
Staff development day本來要去到坑口聽talk，但因為我哋careers有活動，所以我同某啲同事可以照番學校。一早約咗亞頭買麥當當早餐，之後一齊番學同女俠同埋女 副校一齊食。不過，亞頭要set場，我又要幫手點名，最後係女俠同女副校邊傾邊食，我同亞頭就分開自己食…… 一點前女俠就放我哋走，我即刻去尖咀做孝女！事關我一早約咗亞爸亞媽去南海一號飲茶。南海一號喺Isquare三十樓，一開lift門已經係餐廳喇，不過， 啲waiters同waitresses嘅制服好似boutique sales咁，搞到我第一個反應係以為自己去錯地方……喺reception講低個名，就有人帶我去坐。佢哋安排咗個sofa位俾我哋，不過，個位對坐 柱，媽媽個位會望唔到出面個海景……不過，爸爸已經到咗，開埋水添，而且今日天氣唔好，好大霧……如果唔係，我會要求換位。
餐廳環境其實幾唔錯，我哋三個人坐嘅sofa位可以足夠坐到四、五個人，雖然唔係坐近窗口位，但都可以遠望海景，而且座位舒適。我哋個位隔離係bar枱，旁邊嘅高凳個坐墊仲係睇到人好舒服嘅粉藍色，呢到個環境真係好正！如果唔係咁大霧，就仲好喇！ 餐前小食係龍蝦片，加咗黑椒，辣辣哋又脆口，好惹味！食到人停唔到口！如果真得添食就好喇！索價$20，係就係貴咗啲，但一般酒樓嗰啲垃圾前菜都收呢個價，我覺得呢個蝦片抵到爛呀！ 媽媽負責點菜，要咗五樣點心！
1. 韮王鮮蝦腸 ($45) ~ 唔滑，但個texture有啲堅堅韌韌咁，媽媽話好似第一腸粉咁，唔係sell滑，係sell有咬口，只係……呢到個價高過第一腸粉好多！所以，媽媽話要食呢隻腸粉，不如去第一腸粉到食！
2. 法式鵝肝醬卷 ($50) ~ 老老實實，我真係一啲都食唔到鵝肝味……就算唔係為咗鵝肝，其他嘢都唔特別好食……索價$50，唔值！ 3. 陳村炒蒸排骨 ($40) ~ 媽媽見親呢樣點心都點嘅，雖然佢唔係我杯茶，但我都會食嘅。啲陳村粉唔滑，啲排骨個賣相好衰，一睇就覺得「嚡」，雖然食落唔韌，但真係冇好食嘅感覺！咁都要$40…… 4. 黑松露野菌餃 ($45) ~ 又係食唔到黑松露味……其他野菌不過不失，個皮唔覺得特別好食…… 5. 筍尖鮮蝦餃 ($45) ~ 粒蝦係幾爽嘅，但個皮唔夠晶瑩剔透，食落又冇我buy嘅堅韌感覺，我覺得龍皇整得好味啲囉！ 爸爸話呢到只係食裝修，媽媽就覺得只有壺水仙係最香嘅，而我就決定唔會同拾爺嚟食。不過，我覺得個bar枱位好適合影婚紗相！(後 日個anniversary shooting已決定改期，其實我見天氣預報好似向好，想同Simon商量吓好冇唔改，但佢又唔聽電話……化妝嗰邊打嚟同我confirm，我唯有話轉 日子啦！唉，心情十五十六咁……)埋單$325，原來茶錢要$18一位，唔怪得啲茶咁香，啲waiters又咁好服侍啦！(佢哋會走過嚟同你斟茶架！) 飲完茶，我就去筲箕灣換回鄉卡，過咗期成年，本來都唔打算續架喇，但七月應該會成家去旅行，爸爸鍾意番大陸，所以襯有時間都係換咗先！其實離開南海一號前， 我已經去咗兩次洗手間，講緊嘅係臨埋單前去一次，之後離開前又要去多一次。已經俾媽媽話我尿頻……但我同佢哋落到地鐵站後，都係折返Isquare去多 次……我真係急，加上知道中旅社嗰邊未必有洗手間，有都唔會係靚嘢……所以，都係去多次。點知……去到筲箕灣我已經又急喇……不過，我都排隊拎咗飛先，見 仲有七十個先到自己，就問人邊到有洗手間。原來呢個商場係冇洗手間架，食蕉叫我去酒樓嗰個……雖然呢間唔係咩高級酒樓，但應該點都好過呢個商場仔嘅自家洗 手間嘅，如果佢真係有嘅話。 喺個商場仔行咗一陣，都仲有成五十幾個籌先到我……於是，搵個位坐低，睇吓報紙、打吓機同聽吓歌咁打發時間。終於，等到我喇！噚晚喺屋企摷番出嚟嘅舊相 ok，聽同事講，佢哋啲要求好個人化，我同事兩母女喺同一間相舖影，但一個得一個唔得……所以我都打定輸數要被人鑿，估唔到又得喎……但我以為只需一張身 份證加回鄉卡影印本，原來要兩張……結果要駛多兩蚊……續一續證，銀包冇咗$390……而家個出糧戶口得番$549，我唔想郁我個不動產戶口啲錢呀！一定 要努力捱到出糧日！(其實都好難，而家先係月尾……) 喺中旅社搞咗差唔多兩個鐘……搭地鐵時，仲諗緊好唔好去銅鑼灣行一陣，拾爺就打嚟話佢走得，於是約咗喺尖咀等。 行咗一陣百利，想話幫拾爺買煲呔，影相時用，拾爺口口聲聲話叫我幫佢買，但同佢睇時，佢就條條都話唔靚……佢咁醃尖，我邊敢幫佢買…… 晚飯去吉野家搞掂，呢排成日出去食，用得太多錢，要慳吓。 食完飯，就去睇「桃姐」。影評後補。 過咗非常充實嘅一day！
感謝 honeyhinbaby 提供以上資料 honeyhinbaby的網誌: http://honeyhinbaby.wordpress.com/
|
| 商店 | 南海一號 Nanhai no.1 |