抱歉,發生點錯誤。
重新載入
欣圖軒
honeyhinbaby
2014-07-02
686
0
分享
收藏

與三大長老食lunch,喺地鐵站行緊去Intercontinental hotel時已收到奶奶來電話佢到咗,一出地鐵站,就見到爸爸問緊security前方座building係咪Intercontinental hotel,我即刻上前叫住爸爸,再同佢一齊入酒店。

去到餐廳門口,報上姓名,waitress就帶我哋去奶奶已坐低嘅嗰張枱,有大大張sofa,而且係窗邊位,好嘢!

Inter_1

記得舊年同爸媽去香宮時,女俠提議過我嚟呢到,話佢裝修咗,聽聞好靚,但我怕去新裝修嘅地方用餐,所以一直冇諗過嚟呢到食嘢,直到幾日前想打去book龍景軒,結果又撲個空,見呢間餐廳喺Openrice個分都唔低,於是就改咗嚟呢到。呢到裝修雅緻,而且景觀仲好唔錯,同之前食過嘅明閣、香宮、國金軒 (The Mira)、海景軒等等唔同,呢到有窗,有景睇,再唔係一個密室嘅進食環境!而且,呢到每張枱之間嘅距離好夠,唔會好似上次去天寶閣咁,迫到死!呢間係暫時食過嘅酒店中菜廳中環境最好嘅!(小女子仲未有財力去勻全港五星酒店嘅中菜廳試食……)

IMG_2905

每張餐枱都有六小碟調味,聽waiter介紹由前左至前右及後左至後右為﹕九龍豉油廠出品嘅豉油、三十年陳皮製成嘅醬料(佢講到一嚿嚿,我實在聽唔到……)、蠔油、南海黃椒醬、余均益辣椒醬同豆瓣醬。當中,我試咗九龍豉油廠出品嘅豉油,味道冇咩特別。三十年陳皮製成嘅醬料,甜甜酸酸幾好味,但我唔係好feel到啲陳皮味……南海黃椒醬,呢個正!真係好辣,點少少已經好夠!聞落去,仲好攻鼻!但真係好惹味!

因為奶奶最早到,佢開咗普洱同,本來我想幫爸爸開番鐵觀音,但爸爸話照飲,所以我冇得將呢到嘅茶同之前嘅餐廳作比較,不過,呢到嘅普洱好唔得!茶色經過兩、三次沖泡後就轉淡,就算深色時,茶味都係唔夠,應該話係飲唔到咩味……雖然啲茶唔怕嚡口,但飲茶飲到好似飲水咁,呢啲茶葉都真係好差劣吓囉。

餐廳本將兩壺茶置於離我哋不遠嘅一張準備上菜嘅小枱,原意係唔駛食客自己斟茶,由侍應代勞,但waiters根本冇時間幫我哋斟茶,啲人永遠行咗開去……我自己動身去拎時,waiter一見,當然嚇到走過嚟幫我斟啦,我順便要求將茶壺放回自家枱上。

餐廳見我哋到咗三人,送上抹手毛巾同餐前小食﹕

IMG_2908

黑糖琥珀合桃 (餐前小食)﹕拾爺愛吃,爸爸亦讚佢脆口,我卻嫌佢過甜……

等埋拾爺同媽媽嘅到來,我哋就點嘢食,一睇menu,發現呢到嘅嘢食價錢比之前到過嘅同級酒店都要貴。點完嘢食,waiter即時收走各人跟前的一塊「玉」。

IMG_2898

枱前setting,作觀賞用。

餐廳點心不多,我哋點嘅都差唔多係其供應嘅一半,想唔到連腸粉都冇,只有煎蝦米腸……可憐爸爸樣樣都唔食得……

IMG_2911

晶瑩旬尖鮮蝦餃 ($72)﹕蝦餃一上枱,爸爸即讚其賣相精緻,但我覺得只屬一般……蝦餃皮尚算薄,但卻唔夠咬口……蝦都幾大粒,但唔夠鮮味……

IMG_2910

蟲草花雜菌菜苗餃 ($54)﹕媽媽點嘅,本身對佢已經冇興趣,食完更覺唔值得點,唔好食……而且,個賣相好差!三件餃放到咁,絕對唔係五星酒店嘅水準!

IMG_2912

鮮蝦脆春卷 ($60)﹕對筷子一掂到件春卷,已經感到其外層之脆!一不小心稍為用力一挾,春卷皮「卜」一聲被折開一小部份。將春卷放入口中,感覺奇脆無比,餡料十足,蝦肉雖談唔上新鮮,但總算大件彈牙,讚!為咗呢碟春卷,值得再嚟!

IMG_2916

南乳榨菜黑豚生煎包 ($54)﹕底部完全唔脆,令人失望!餡料味道無甚特別,包內湯汁唔夠 (當然,人家冇話講呢個係灌湯生煎包,冇湯汁都係正常嘅。),坦白講,我覺得小南國整嘅生煎包仲好味過呢到!

IMG_2918

雞湯海鮮腐皮卷 ($54)﹕湯略嫌鹹咗少少,腐皮卷味道一般。

IMG_2920

松茸北菇燉菜膽湯 ($150)﹕點俾爸爸飲嘅,落order時,個waiter聽到我要一份,就好驚訝咁表示menu顯示嘅係一位份量,我表示知道,佢再提高語調兼配以誇張嘅表情表示份量好細,我真係嬲嬲哋,話我只點俾其中一人飲!事後,我真係越諗越嬲,我又唔係冇叫其他嘢食,五個人share一碗湯,我已經清楚表示知道menu顯示嘅係一人份量,點解佢仲要咁誇張地提我份量少呢﹖!而且係睇我哋唔起定當我白癡﹖!好彩佢事後再serve我哋時態度良好,如果唔係,我怕我會忍唔住發火!呢個湯制作需時(20分鐘),所以爸爸要睇住我哋食一陣嘢,佢先有得開餐。爸爸話個湯幾好味,佢本來以為自己食唔到啲北菇,挾咗件俾媽媽,媽媽又分咗啲俾我食,然後,我哋都發覺啲北菇好「林」,於是,爸爸就連湯料都食埋。

IMG_2922

陳皮香酥黑豚肉 ($240)﹕呢到嘅招牌菜之一,挾起其中一件黑豚肉,陣陣陳皮味撲鼻而來,未食其味,先聞其香!黑豚肉的外皮唔算好脆,陳皮味道亦只停留於外表,雖然陳皮嘅香味撲鼻,但食落去時,其味道比聞起上嚟來得淡,所以陳皮嘅味道,並無搶去黑豚肉本身嘅肉味,佢只係用以提昇呢道菜予食客於嗅覺上嘅層次。每件黑豚肉都屬半肥瘦之選,就因為脂肪比例佔去一半,所以成件黑豚肉食起上嚟,唔會過嚡,但一半嘅脂肪,卻有點油膩……不過,配以餐廳一早放置嘅調味醬料,如南海黃椒醬、三十年陳皮製成嘅醬料,則可減退肥膩感。黑豚肉上嘅紅、黃絲,亦非常脆口,一問之下才知紅色嘅,係紅椒絲,大廚刀功果然非凡,廚藝亦著實了得!紅椒絲切得幼,炸得脆,讚!黃色的則為葛絲,味道亦非常可口。呢道菜果然屬招牌之列,必試!

IMG_2923

葡汁牛油果焗海鮮飯 ($320)﹕見Openrice有人讚,又怕點心唔夠飽,於是就點呢個飯,點知……中伏!唔係佢難食,而係佢冇特別,但以$320呢個價錢嚟講,佢個性價比真係好好好好好低!個飯係好多汁,但同時又有啲爛……啲料好少,四個人每人分得一碗,但啲海鮮都好似唔夠分咁……以為制作需時(30分鐘)係好嘢,原來係我太天真……

食完所有嘢,都飽飽哋,但仍然貪心地多點一個甜品﹕

IMG_2932IMG_2934

奶皇鳳利芝麻棗 ($66)﹕賣相精緻,味道一流!真正嘅外脆內軟,餡料十足,讚!

埋單$1071,三大銀行嘅白金卡都有8折 (茶水除外),茶錢為$24,相比香宮收$25,我覺得以呢到提供嘅茶錢,overprice咗!

就這樣與三大長公及拾爺過咗愉快嘅兩小時,爸媽喺奶奶面前都係咁互相頂撞,幸好奶奶只覺佢哋有趣。見到老人家開心,我同拾爺都好開心!得閒再帶三寶去食好嘢!

評分時間﹕
食物:
服務:不合格
環境:非常好
衛生:一般
價錢:略貴
總結﹕值得一試

餐廳資料:
欣圖軒
尖沙咀梳士巴利道18號香港洲際酒店地下
2313 2323

 


============================================

感謝 honeyhinbaby 提供以上資料

honeyhinbaby的網誌: http://honeyhinbaby.wordpress.com/


============================================

~END~
商店 欣圖軒 Yan Toh Heen