|
白玉蘭
|
|
honeyhinbaby
2014-09-05
730
0
|
|
夫家提早慶中秋，趁AE白金卡仲有折，揀咗「白玉蘭」開餐！原本想去「美中‧鴨子」或「八月居」，但原來前者唔接受訂座，後者就分兩個時段，早段對姑仔嚟講太早，晚輪同我同拾爺嚟講又太夜……唯有揀間唔會規定時間嘅嚟食。 七點準時到達，同拾爺坐低後，睇吓menu，見到呢到嘅價錢比起「八月」系列嘅都要貴！咁論地點，呢到啲租又貴啲嘅。
餐廳環境
餐具 等咗陣，奶奶就到喇，然後，姑仔又比我哋想像中早到。大家睇menu，揀嘢食。奶奶一路睇一路問我哋食咩好，但講講吓，就一如以往，得佢同姑仔話事……然後，今次唔知發生咩事，奶奶連姑仔揀嘅都摒棄……我叫拾爺快快叫waiter，拾爺仲傻更更，話冇揀哂菜，我心中一早定好想要食嘅嘢，佢仲唔快快叫waiter，奶奶再揀落去，我連唯一想食嘅前菜都冇得叫呀！同我結咗婚咁耐，佢都仲未意會我心中所想……我呢啲為食之人，menu睇一次就知食乜好啦，駛鬼揭嚟接去咩！呢到都唔知係因為地方大，定係waiter少，又定為waiter唔鍾意望客，搵極都搵唔到人嚟落單，結果……waiter嚟之前，奶奶由提議咗兩個前菜一個主菜變成又再揀多一個主菜……我本來想自己決定一個嘅希望幻滅……最後六個菜有四個都係佢話事……其中一個我揀嘅只係素菜類，原因係奶奶冇揀過菜，我只係負責執漏……然後，waiter覆單時，奶奶又嫌肉類嘅菜式過多，想cut一個，拾爺即刻表示唔需要。如果奶奶要cut我唯一點嘅前菜，我諗我真係會出聲話自己想食。唔係唔想敬老，但呢餐我有份食，我都想揀樣自己鍾意嘅嚟食架嘛……
鎮江水晶肴肉 ($80)﹕奶奶ban咗姑仔嘅甜不辣牛肉片嘅提議而揀呢個，其實我個人覺得呢個選擇唔錯，因為水晶肴肉功夫多，平常人家唔會自己喺屋企整。我上網搵過食譜，功夫真的太多，所以出外食飯，有呢道前菜嘅，我都傾向揀佢。呢到嘅水晶肴肉以片狀上碟，口感不及長條形，而且某啲水晶肴肉嘅啫喱部份過多，薑絲又少得可憐，收呢個價，唔值！
紹興酒香醉雞 ($88)﹕奶奶又再ban姑仔嘅四川成都口水雞提議而改為揀呢個，今次我反而buy姑仔揀嘅菜，因為醉雞我自己都整到。不過，呢個醉雞整得好味過鎮江水晶肴肉，起碼隻雞都幾滑，不過就冇咩雞味……面層嘅雞冇咩酒味，底層可能浸得耐啲，就較為入味……我唔知呢個做法係餐廳故意定點，但我覺得如果係整得好嘅，應該兩層都要入味。
川味蒜泥白肉 ($80)﹕奶奶讚我點嘅呢道菜夠清新！相中冇影到，其實呢道菜仲附有川味辣醬，要點幾多，悉隨尊便，確係唔錯！不過，我覺得白肉片太薄，唔太食得出肉味，整道菜式反而被青瓜搶哂味……
($108)﹕個人覺得個sauce太甜！雖然啲肉都叫易離骨，但口感有啲霉……全碟得嗰5件骨，性價比低！
家鄉紅燒肉白頁結 ($108)﹕呢道菜一上枱我已經覺得個售價過份，根本就係枝竹火腩煲嘛！當枝竹火腩煲同佢一同出現於飯枱上時，奶奶話兩樣嘢好似……兩樣都係佢揀嘅，根本上佢一點，我同拾爺已經咁覺得，佢完全浪費咗一個點菜quota！紅燒肉超多肥膏，如果啲肥膏整得好，大廚做到其溶於口都ok，可惜我食到嘅係硬硬嘅一嚿……呢道菜，劣！
楊柳青青萵苣絲 ($88)﹕見個名改到咁靚，奶奶又冇叫菜，於是就點呢個。味道嘛……本身個菜嘅味冇特別，但廚師整到過鹹……唔ok…… 食完所有嘢，waiter問要唔要甜品，奶奶問都冇問我哋就答唔要……拾爺即刻叫waiter俾個menu我哋睇，結果menu嚟到，奶奶又要睇，睇完又要叫……
香芒凍布丁 ($27)﹕奶奶點嘅，我唔知係咩味，只係覺得喺呢到食呢個甜品，好似唔太match……
品味焗西米布甸 ($26)﹕本來想同拾爺叫高力豆沙一齊開心share，但奶奶叫咗個一人甜品自己食，姑仔又話唔食，我哋冇奶油叫個一碟5件嘅甜品兩個人去食嘅啫，所以我揀咗呢個我冇機會自己整到，又充滿童年回憶嘅甜品同拾爺share嚟食。味道嘛，ok啦。 茶錢$16位，我要求唔要一嚟就上枱嘅前菜，AE白金卡折後$600，食物水準一般，不過環境算幾唔錯嘅，但應該唔會再幫襯lu。
評分時間﹕
餐廳資料：
感謝 honeyhinbaby 提供以上資料 honeyhinbaby的網誌: http://honeyhinbaby.wordpress.com/
|
| 商店 | 白玉蘭 Shanghai Jade |