第二朝八點就起身,梳洗完畢就落樓食早餐

愉景灣酒店既餐廳唔算大,座位唔多

但又難得地食物種類好多

重點仲要係"好食"

我老公話好少有酒店Buffet既燒賣入面係有大蝦

而且仲要好食

我既早餐~~~~

另一重點係佢有自己烘焙室,所有麵包自家新鮮出爐

仲有部好得意既pancake機

按個制,等一陣,pancake會係旁邊走出尼...

(張相係悠悠影既..所以...keke)

有好少見到既蜂蜜板,成板蜂蜜放係到,一睇就知新鮮無雜質

水果種類好多

除左一般酒店既蘋果橙外,仲有香蕉,龍眼,紅毛丹

(悠悠走出去影既紅毛丹,又影得幾好呢)

不過食物都係其次

我好中意佢有陽光照耀下食早餐

餐廳好貼心既,窗廉落到岩岩遮到頭既位置

身體可以曬住陽光嘆早餐,真係一流~~

食飽早餐,就去泳池玩喇

大家放心,我唔識游水既,只係去浸下,玩下水

所以唔怕食飽會抽根啦

泳池有一個普通池,一個BB池,一個按摩池,

仲有一個有石級既池

按摩池好夠力,好正,我座係入面唔想走..哈哈

玩到10點幾,就要去沖身走人

因為book左11點親子cupcake班呀

70蚊位既cupcake班,諗住實係有現成蛋糕,

然後比啲buttercream你唧上去,灑啲糖就係

估唔到...佢教畫左隻壞蛋獎門人個隻黃色東東

平時成日都整cake,今次我比悠悠自己玩晒

雖然出尼唔太似..哈哈

另一個竟然玩糖皮,糖皮算係貴價貨

竟然仲教整糖皮花,真係估佢唔到

睇下悠悠既成品 ^^

玩完cupcake,老公已經攪好check out

悠悠話要再去返Kids Room玩

電視一播怪獸大學

大人細路都掛住睇

但悠悠就醉心係佢既美術世界

而我就醉心係到影專心畫畫既悠悠到...哈哈

離開酒店,

我地出去商場影下3D畫先...

好好笑..不過太曬太熱,我地都無慢慢較角度呀,

無諗啲乜野pose呢...

拎返啲行李後,我地就出返碼頭搵午餐食

因為係碼頭個邊商場食野,滿$120就可以換船飛一張

我地去咗一間食日本菜既

可能依度西餐多,無乜日本菜

所以都幾多人等位呢

依間餐廳細細,環境普通啦

不過我諗算係最多外國人既日本餐廳..kaka

叫左兩個set,一個係全三文魚餐

有三文魚刺身,壽司,三文魚卷,煎三文魚同三文魚天婦羅

幾唔錯呢,另一個係便當

有魚,有牛肉,有刺身,有天婦羅,仲有麵豉湯同沙律添

埋單$280, 可以去換到兩張免費船飛,好抵呀

兩張船飛要成$80架

食飽都成三點幾

出去行市集囉~~~

市集唔係成日有架,想行要上網睇下先

見到有間幫小朋友畫手畫臉既

悠悠又想玩呢....

於是,佢就帶住隻靚靚蝴蝶返屋企啦~~~