不過需補充說明一下，由於同老婆唔喺咩覓食團，自由行隨處盪，志在放鬆一下心身，只喺臨離開時，晌樟宜機場T3分店食過，加上只有兩公婆，可試嘅嘢有限，所以，絕對唔喺一個全面嘅亞坤比較，再者，人人對味道要求有別，純粹跟大家分享一下，唔使對小弟食文太認真！

講講新加坡亞坤先，除上述嘅機場店，亦有路經武吉士（Bugis）白沙浮商場（Bugis Junction）分店，成個地庫喺美食天地，有好多出名嘅食店，如麵屋武藏、翡翠拉麵小籠包、板長壽司、Subway、Bread Papa、BreadTalk、Twelve Cupcakes……等等。而依間亞坤店舖較細，但光猛企理，由於傍晚時份經過，未見好多人，不過，就算唔使等都未有試，因為晌附近有個雅柏熟食中心，仲多地道嘢食，留肚去嗰邊食晚餐。

加坡亞武吉士白沙浮商場（Bugis Junction）分店

至於機場店，因為當日我哋12:30pm到，亦喺未有好多客，不過，食完個晏晝1:00pm走時，則好多晌機場嘅上班族喺度搵食。而裝修亦催向簡單，舊式方形木櫈，有少少老舊大牌檔味道。唯一特別喺，依間店喺24小時營業，不論大家搭咩時間飛機，想食亞坤都應該可以食到。

 新加坡樟宜機場T3分店

 12:30pm時嘅情況

1:00pm午飯高峰時嘅情況

食物嘅種類選擇唔多，抬頭一望乜都睇晒，一行招牌吐司，一行冷熱飲品，另一行吐司套餐，而飽肚嘢只得4款：叻沙（Laksa）、馬來西亞鹵麵（Mee Rebus）、泰國酸辣米粉（Mee Siam）及咖喱雞（Curry Chicken），而依4款嘢香港店都有得買。

最後點咗Set Ａ咖椰牛油吐司套餐（平時慣用「咖吔」，「咖椰」喺店方用字），每份SGD4.8（~HK$30 @6.257），以及一客咖喱雞，SGD5.5（~HK$34.4 @6.257），定價無疑比香港店平出一大截。

咖椰牛油吐司套餐 SGD4.8（~HK$30）

套餐包兩隻糖心蛋及啡茶一杯，落單後拎住號碼牌等送嚟。一份咖椰牛油吐司有4件，咖椰醬本身雖然偏甜，但薄薄塗得平均，再夾住一小片牛油，甜度恰到好處，全麥吐司亦鬆化脆口；老婆一向唔食生蛋，所以糖心蛋就由小弟一人處決，睇樣好綿滑，不過蛋黃有少少過度凝固，唔算完全嘅軟綿，不過，加咗黑醬油，整體味道仍然不俗；至於杯熱牛奶咖啡，唔使加糖，入口醇香，濃郁而唔帶酸味。順帶一提，咖啡（或茶），都分為牛奶咖啡（Kopi，咖啡加煉奶）、咖啡-O（Kopi-O，咖啡加蔗糖）、咖啡-C（Kopi- C，咖啡加花奶及煉奶）。本來後尾想追加一客散點嘅雪糕吐司（SGD2.4），雪糕有得揀榴槤添，可惜唔知咩原因，無得買！

咖喱雞 SGD5.5（~HK$34.4）

一客咖喱雞伴有4片百吉包，亦可要求改配多士。味道唔錯，咖喱頗香濃，無印度咖喱一類咁多香料味，唔似馬來西亞咁重椰奶，但又唔似港式咖喱咁單一，中等辣度，頗醒胃，搵百吉包沾咖喱索滿汁真喺好好食，老婆仲勁讚個咖喱好得；雞肉唔嚡亦唔叫得好滑，質感有啲似似哋楊協成嘅咖喱雞咁，反而薯仔挺實淨，又有薯味。

香港亞坤又如何？由開業到依家，人龍不絕，雖然見食評負面多過好評，仍有唔少人慕名朝聖。

香港人始終重視包裝，所以店內環境都落重本少少，挨住落地玻璃窗有大梳化椅，其他櫈亦喺有梳化椅墊，光猛開揚、份外舒適。近入口嘅一幅牆畫，女孩拎住「阿坤外賣」遊歷新加坡各處名勝，再次強調「她」嚟自星洲！連所有杯碟都印晒「亞坤」個嘜頭。

食物種類頗多元化，嚟到香港，當然亦加入新嘢，如香港店獨有嘅牛肉丸湯河粉、火腿雞肉通心粉、咖椰球……等等，以冀吸引更多客人。大致上，種類分為原製吐司、吐司套餐、三文治、蒸麵包、招牌飯、招牌麵、沙律、蛋食，以及多款咖啡、奶茶、鴛鴦、特色沙冰等，實在選擇多多！

咖椰牛油吐司套餐 $39

香港店跟新加坡機場店，散點吐司多咗草莓吐司塊及火腿芝士吐司條2款，不過，相反少咗1款當地名為Butter Sugar Toast；吐司套餐除Butter Sugar Toast外，款式都喺一樣。要比較，就梗喺盡量試番多款，所以，亦點一客Set A咖椰牛油吐司套餐，同樣一份咖椰牛油吐司、兩隻糖心蛋及熱啡茶一杯，可是定價比新加坡店貴30%啊，可見租金嘅「魔」力！個人而言，咖椰牛油吐司真喺跟晌機場店食到嘅無乜分別，依然薄脆鬆化嘅全麥吐司，依然薄而細塊嘅牛油；今次試到嘅糖心蛋效果好好多，蛋黃半凝固，始終若跟足程序，以指定溫度、時間烚煮，出錯機會都較細；杯熱牛奶咖啡，味道同樣濃郁醇香，唯一分別，似乎比嗰邊大杯少少嘞。

咖喱雞 $48

兩地店舖嘅分別喺，香港店嘅咖喱雞則跟吐司或飯，無百吉包，此外，定價要比新加坡店貴40%喔！味道上，似乎兩地相差無幾，咖喱汁一樣香濃唔太複雜，但質感相對上較杰身少少；內裡同樣有薯仔同雞件，不過無雞鎚，卻有雞翼，啲雞亦喺算唔上嚡，亦唔叫得嫩滑。

綜觀兩地店鋪嘅出品，其實水準相若，就算有分別都喺微差，不過，睇埋其他人嘅食評，發覺似乎水準頗為唔穩定，服務亦都比較混亂，究其原因，估計以目前嘅人手根本應付唔到人潮。做咩都喺架喇，一急就亂，一亂就錯。再者，因為各項成本，香港店嘅定價實在貴好多。所以，小弟覺得想食平靚正又唔使等嘅亞坤，倒不如有機會去新加坡玩之時先去試，就算無機會跑到老遠過新加坡，想慕名一試香港店，都喺讓熱潮過去，等營運、製作上晒軌道才去幫襯，先為上算。

個人評分
味道：8/10
環境：8/10
服務：5/10
抵食：6/10
平均每人消費：HK$44

餐廳資料：
亞坤 Ya Kun Coffee & Toast
尖沙咀漆咸道南45-51號其士大廈地下C & D 舖
39710884