抱歉,發生點錯誤。
重新載入
上海婆婆336 Shanghai Po Po 336:尋求突婆
山區麵包王
2014-04-30
1384
1
分享
收藏
小弟家住美孚,曾幾何時都有一間「上海婆婆」,其實質素都唔差,裝修又夠時尚,不過,最後都結咗業;亦曾經幫襯過牛頭角道淘大商場嘅「上海婆婆」,仲記得一大班人食得好滋味添。今回老友吹雞叫開飯,地點喺嚟尖沙咀國際廣場嘅「上海婆婆 336」,知道佢喺「上海婆婆」嘅副線,針對年輕朋友,當然好有興趣啦。又再次掹住食友衫尾,小弟就老實不客氣,多謝老友請客!
查實都未嚟過上海婆婆336,嚟到先知咁唔同,一反傳統老派滬菜店嘅格局,若非門口有大大個招牌,否則都可能以為自己搵錯地方。餐廳嘅用餐區以環形設計,正正中間喺廚房,近門口左邊嘅卡位似足西餐廳,而近門口另一列吧位已夠晒有型,繼而再進入大廳,不規則花紋地磚搭水泥地、水泥牆身、鎢絲燈膽、木枱木椅,懷舊得嚟型格唔老套。最意外喺晌尖沙咀依啲黃金地段,枱椅排得一啲都唔密,所以,坐落輕鬆舒服。
主餐牌印刷精美,分門別類有齊冷菜、湯類、豆腐、河海鮮、豬牛、雞鴨、小炒蔬菜、飯麵、手造拉麵、點心、甜品及飲品,選擇過百款,可謂一應俱全。除咗有列明一啲「本店推介」,等大家減少選擇困難,仲有一啲「辛辣」提示,而部分菜式又有圖片以供參考,確實喺依家對食肆嘅要求。雖然,上海菜嘅基本特點為湯滷醇厚、濃油赤醬、糖重色豐,但現今講求健康之下,又喺針對年輕人市場,所以,菜式晌味道上都略作調校!
等候上菜時,再細看餐枱紙,始知道「336」嘅意思,仲以為好似阿信屋個代號喺股票「冧吧」,啊!原來喺上海話嘅諧音「謝謝儂」,即喺多謝你咁解,明白晒!
冷菜足足有22款,一般都喺細細份,對下幾款冷菜都屬「本店推介」,除咗個醉雞皮唔夠爽,其他嘅都做得相當出色,幾款都值得推介,而最得歡心就喺個燻蛋,超正!
bowl無錫脆鱔 $88
黑掹掹嘅脆鱔賣相一啲都唔討好,佢唔止醜,仲「心靈」脆弱,一咬估唔到脆鬼到卜卜聲,真喺跟平時食鱔嘅口感完全兩回事;再用糖醋做個汁,件件脆鱔都掛滿汁,沉厚酸香,上佳嘅開胃冷菜。
bowl冰鎮醉黃油雞 $72
何止「冰鎮」,直情「霜降」!晌醉雞面放上一層碎刨冰,未食已感到涼透心。食嘅時候,醉雞份外冰涼清爽,加上酒香淡雅,入肉三分。不過,仍有改進地方,味道相對鹹咗少少,而雞皮亦未夠爽。
bowl芹香小木耳 $48
木耳本身好爽脆,入口有少少醋香,又帶少少日本芥辣味,一啲唔嗆喉或攻鼻,點到即止;至於內裡嘅西芹粒,覺得點綴大於實際。
bowl魚籽煙燻蛋 $16 / 隻
賣相實在一流,蛋黃金黃,半凝半黏,加上點點黑魚籽及一小片薄荷葉作裝飾,份外誘人。燻蛋有輕輕煙燻味,蛋黃柔滑凝香,溏心效果出眾,一半配黑魚籽食,蛋香中有份鹹鮮,另一半配薄荷葉食,濃郁裡有份清爽,好食唔在講,味道富特色!
bowl砂窩醃篤鮮 $32位 / $98例
湯類以醃篤鮮較實惠,湯底奶白,但飲落鹹香,內有五花腩、金華火腿、百頁結、小棠菜、竹筍,腩肉及火腿吊起成個湯嘅味道,而竹筍切得大舊,特別爽脆。
11款河海鮮類中,揀嚟鹹香蝦球及松子黃魚,雖然唔喺「本店推介」,但做得不俗。
bowl鹹香蝦球 $122
鹹香菜式一向好啱小弟,加埋配合大海蝦,超啱心水啦。睇落應該喺一道唔太複雜嘅菜式,大海蝦泡油後再加鹹蛋黃炒,簡單得嚟味美,蝦鮮肉爽,鹹蛋黃惹味鹹香,最欣賞喺個鹹蛋黃漿做得薄薄一層,仲帶點酥脆口感。
bowl松子黃魚 $158
黃魚嘅鎅花唔算好分明,但淋上橙紅嘅甜酸茨汁,其實已經好吸晴。黃魚外皮都幾酥脆,魚肉亦幾柔嫩,茨汁甜酸細緻,雖然菠蘿喺罐頭貨,松子仁及青豆都喺裝飾多,但整體而言,做得唔錯嘅菜式。
河海鮮類都食得滿意,咁豬牛、小炒蔬菜類又如何呢?
bowl開心果露筍炒牛肉粒 $88
初頭有啲擔心,露筍炒牛肉粒應該幾好,但加開心果好似唔太夾。最後出嚟個效果唔嗻話好差,亦唔講得有驚喜,其實。脆口嘅露筍粒,配搭埋嫩滑牛肉粒,食味已經不俗;開心果帶點鹹香,但口感唔喺脆,又唔喺腍,有少少煙韌咁樣,感覺有啲唔知點!如果真喺要加啲果仁類嘅嘢,老套啲嘅炸腰果唔知會唔會效果好啲呢?所以,作為「本店推介」菜式,個人覺得有啲落差!
bowl野生椒牛仔肉 $75
不愧喺「辛辣」菜式,睇個樣都已經嚇得吓,實際上就真喺唔止靠嚇,辣勁鮮明。牛仔肉非常細嫩,入口柔滑,惹味刺激,嚐辣嘅老友更加唔好錯過。之後點咗個蔥花家常薄餅,夾埋啲牛肉食認真唔錯喎!
bowl乾煸四季豆 $62
四季豆乾煸得夠乾身,最滿意喺四季豆仲保持一定爽口,加有少少肉末、中芹粒,口感豐富咗,又喺另一惹味之作。
飯麵及手造拉麵類亦有好多選擇喔,前者有10款,後者更多,有成15款,想飽肚墊底,梗有一款啱你合味。
bowl黃金炒飯 $68
「黃金」喺嚟自黃薑粉,唔單止炒得粒粒金黃好睇,兼且有朕朕黃薑香,朋友仲話黃薑具活血及止血功效,所以個飯既好食,又有營;此外,仲加入蝦仁、牛展粒、鹹蛋黃同炒,飯粒又分明,意外咁好食。
嚟到食上海菜,又點可以唔試吓啲滬式點心,一口氣試咗4款,非常滿足!
bowl336小籠包 $32 / 4隻
摺紋及收位都似模似樣,而皮薄有得你睇,一眼就望到小籠包內盪漾嘅湯汁。熱辣辣趕快食,一夾無黐底,原來墊咗一薄片蘿蔔,好細心呀!小籠包內湯汁果然豐滿,豬肉餡又打得鬆化,唔沾醋食都OK。
bowl阿蘇大籠包 $30
依個珍寶呎吋嘅「大」籠包,叫嚟都志在見識多,大大個大籠包,湯汁一樣滿載,店員教路正確食法應該先用飲管飲晒啲湯汁,再慢慢食得包。我哋貪得意試吓夾唔夾得起佢,師傅果然手工到家,皮依然搓得薄,但夾起嚟又唔易穿。
bowl蔥花家常薄餅 $52 / 4件
除蔥油餅,仲有依款蔥花家常薄餅, 即叫即做,所以送上枱時熱辣辣。家常薄餅比起蔥油餅薄身,我估大概喺蔥油餅厚度嘅1/3,柔韌中帶點鬆脆,餅內混入滿滿蔥花,蔥香十足。再加埋一大片野生椒牛仔肉,別有風味!
bowl青花椒湯雲吞 $45 / 8粒
小弟覺得個雲吞雖然唔喺重點,但皮滑肉香,手功唔差;個花椒湯反而喺高潮所在,湯頭睇落幾清,入口微辣,隨之而來就喺花椒嘅麻香,一陣陣令條脷有點發麻嘅感覺,過癮有趣嘅味道。
最後嘅甜品時間,香蕉高力豆沙唔少得,又有小弟心水嘅南瓜餅,反而個凍什果酒釀丸子本著一試心態嚟試吓。
bowl香蕉高力豆沙 $42 / 4個
雖然一客4個,但亦可以要求加碼,較具彈性,多一個就額外俾多$12啊!粉糰炸得漲漲,入口非常軟綿綿,內裡夾雜香蕉與豆沙,清甜滋味。
bowl南瓜餅 $38 / 4個
同樣可額外加碼,亦以豆沙作為餡心,不過,份量比起做高力豆沙為多,豆沙又綿又沙。而南瓜餅餅身其實又唔喺好重南瓜味,反而,做得挺身,煙糯唔黏牙,質感唔錯。
bowl凍什果酒釀丸子$28
酒釀丸子食得多,店家都有賣,同樣$28一碗,不過,凍嘅仲要加什果印象中應該第一次,明顯針對後生仔嘅搞作。夏天食又幾唔錯,清清涼涼,又有點酒香及桂花香,多咗什果,無咁單調,只喺嫌丸子好似煮得未夠透!
正所謂睇戲食飯、食飯睇戲,一喺睇完戲先食飯,一喺就食完飯跟住睇場戲,樓上就有間戲院,拎住當日戲飛嚟食飯,有9折,咁個邏輯喺咪應該先睇場戲,跟住落嚟上海婆婆度食飯呢!
環境舒服咗,菜式精緻咗,服務又到位……為嘅都喺不斷尋求突破,傳承之間,都讓更多後生一輩認識上海菜,「婆婆」,336啊!

個人評分
味道:8/10
環境:8/10
服務:8/10
抵食:8/10
平均每人消費:HK$180

餐廳資料:
上海婆婆336 Shanghai Po Po 336
尖沙咀彌敦道63號iSQUARE國際廣場6樓605-606號舖
2806 1833


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
人均 $180.00
商店 上海婆婆336 (尖沙咀店)
特搜總編E2014-12-04 19:02:38
+ 追隨
舉報
恭喜!經過「SeeWide評審團」一致通過,你的發佈已被選為推薦攻略!你不但可以獲得200經驗值,更能累積200探險里數作為開展下次探險之旅的旅費!
回覆