精緻全自助早午餐由11:00am開始供應，我哋就11:00am準時到達，唔好講話裡面未準備好，就連接待處都無人，入到去搵個侍應問問，佢仲好似如夢初醒，都未識安排入座，又唔知我哋已訂咗位，擾攘咗大概10分鐘先有另一個侍應幫到手，帶我哋入到餐廳尾嗁6人枱。整體嚟講，餐廳嘅空間感幾足，裝修簡約，氣氛隨和，木地板，牆上少少佈置，以及一啲小擺設，唔太花巧，感覺隨意。

由於餐廳嘅準備不足，我哋坐低都仲要等佢哋放食物，而食物區就正正晌入門口左邊，一長一短兩張大長餐枱，一眼睇晒。一邊喺餐湯、沙律、冷盤及熱盤，另一邊喺果汁、生果及甜品。以款式論，真喺少得幾可憐，期間亦無乜點轉過款，基本上兩、三轉就已經可以試晒所有嘢。等小弟先介紹有咩食，再評一評味道。

餐湯

去到個煲又未插制，湯又未出嚟，可以話喺千呼萬喚始出來。點知，只喺栗米忌廉湯，當然唔喺罐頭加蛋花嗰隻，色澤淡黃嘅栗米忌廉湯，淡淡嘅栗米味，質感都還喺滑身，但一間以質取勝嘅意大利館子，而賣到近$200一個早午自助餐，個湯絕對飲唔出會喺咩高質素出品。而麵包籃更喺無出其右嘅普通，兩款方包，一隻白，一隻麥，跟生命麵包同級，真喺唔多應該出現晌一間意大利餐廳度囉！

沙律

3款生律菜：火箭菜、什錦生律菜、羅馬生菜；配料卻只得4款：栗米粒、車厘茄、煙肉碎同烘麵包粒，連一啲意式食材都無，如橄欖、水牛芝士、巴馬臣芝士粉，就當小弟詞窮，點諗都只喺用普通嚟形容；更甚者喺3個醬汁：他他、千島及凱撒（遠睇仲以為喺芥辣添），與其叫醬汁，叫醬膏倒還貼切啲，用嚟點吓炸魚薯條都仲可以，撈沙律真喺完全唔掂喎，幸好後尾都有拎樽黑醋同橄欖油出嚟，先求番我份沙律一命。

冷盤

唉，整個自助早午餐最亮點唯一可數算喺啲冷盤，沙樂美腸、凍肉腸、巴馬火腿、煙三文及巴馬火腿配哈密瓜……等等。幾樣冷盤都好有水準，沙樂美腸鹹香好食，巴馬火腿及煙三文非常油潤甘香，巴馬火腿配哈密瓜亦叫人食得滋味。夾埋啲沙律，成為一道味美嘅頭盤！

熱盤

初時，對啲熱盤有一定嘅期望，可惜的是，唔止選擇少，何來「精選」可言！芝士焗西蘭花及椰菜花、芝士千層麵、炸薯角、燴牛頰、煎鱸魚；原本仲有隻烤火雞，但因為盞暖燈燒爆燈膽，跌咗啲玻璃碎落隻雞度，成隻火雞回收之後，都無另一隻替代，取而代之只喺一盆炒滑蛋，極之欺場。其後，轉款都只不過喺牛仔腸、煙肉、烤蕃茄，超市貨式嘅炸魚手指。當中，燴牛頰、煎鱸魚做得有水準，因為做得香濃，富肉汁，質感柔軟，而個炒滑蛋亦都好食，炒得非常嫩滑。

果汁

餐飲以外，一邊橙汁，另一邊蘋果汁，無限任飲，不過，你都明白喺現成貨嚟！

生果

生果盤有新鮮西瓜、哈密瓜及菠蘿，少少士多啤梨做裝飾，雖然都夠新鮮、清甜，其實，都喺屬於啲唔太貴價嘅大路貨色，個人認為都只不過喺提供一啲飯後果應吓場。

甜品

甜品總算喺最有睇頭一欄，個裝蛋糕連小杯裝及件裝甜品，一共12款，期間亦無轉過款。整體甜品的確有水準，意大利芝士餅、松露朱古力蛋糕、熱情果及雜莓奶凍、心太軟等幾款都好好味，滿足到小弟嘅要求。不過，唔喺人人都好鍾意食甜品，我屋企人就喺嘞，太甜、太肥、太漏都唔啱！

iScream雪糕

餐後免費送上iScream雪糕喺Carpaccio嘅特色，不過，就算喺食自助早午餐，都只喺限於一人一小球，想食多杯都唔得，仲要無味道揀可言，唔知可唔可以講佢喺小家呢！

鮮奶咖啡

自助早午餐另外再包一杯餐飲，因為已知道佢喺用上意大利品牌Lavazza，所以，鮮奶咖啡成為小弟不二之選，泡沫幼滑，啡味醇香。

即製薄餅

之前有睇過其他食評話久唔久會由侍應奉上熱辣即製薄餅，我哋由11:00am坐到12:15pm都未見有，差唔打算埋單走人，先見有此服務，真喺唔知喺咪客少費事做，因為是日全場都只得3枱客喺食依個自助早午餐。講番件薄餅，本身質素喺唔錯嘅，菠蘿、巴馬火腿，即喺自助餐枱嘅現成料，其實，可唔可以俾啲心思用上其他材料呢？例如水牛芝士、蘑菇、雅枝竹、黑橄欖、鯷魚……等等意式食材，因為我見佢個散叫餐牌都有好多特色薄餅供應，所以，依個「任食」薄餅俾我覺得喺行貨之作。

雖然個早午自助餐供應時間為11:00am-3:30pm，不過，12:30pm多啲我哋都已經要走人，因為一來真喺好少嘢食，二來亦唔見好高質素，再坐落去都喺打牙骹，不如早點離開返屋企做吓自己嘢！由到達餐廳，到埋單結尾，都唔覺得間餐廳有好好準備過招呼客人，食咗千幾蚊，可能還比不上散叫，抱歉，第一次帶屋企人食早午自助餐，令佢哋只有失望而回。

個人評分

味道：8/10
環境：7/10
服務：7/10
抵食：8/10
平均每人消費：HK$210

餐廳資料：
Carpaccio Pasta Pizza Vino
尖沙咀彌敦道63號iSQUARE 國際廣場3樓307號舖
2328 5202