抱歉,發生點錯誤。
重新載入
鍋居火鍋專門店:安樂鍋
山區麵包王
2014-06-23
2977
1
分享
收藏
一向都鍾意「烚吓烚吓」,一邊烚,一邊食,又一邊吹水,尤其一大班人,特別有氣氛。同班「死佬」朋友就例去長沙灣嘅新星,簡簡單單平靚正嘛,但今趟朋友吹雞,一切有佢打點,難得唔使自已傷腦筋諗地方,安安樂樂食火鍋,真喺一餐輕鬆嘅安樂「鍋」。
鍋居雖位處福華街,但唔喺近地鐵附近嘅一截,不過,對於晌深水埗成長嘅小弟,當然搵佢唔難。餐廳樓面面積唔喺好大,裝修帶點中國風,一邊一列卡位,最啱三幾位老友或一家大細;近門口又有啲大枱,適合十個八個老友記,最有趣喺入門口右邊,有啲活動趟板可間出一個個室,雖則隔音有限,但總算成為私人天地。
未講火鍋之先,店家提供餐前小吃,如泡椒鳳爪、炸魚片頭、炸雲吞仔……等等,有興趣嘅朋友就不妨叫一、兩碟試試;更估佢唔到連冷盤刺身都做埋,有三文,有生蠔……。
食火鍋湯底喺重點之一,一共11款湯底可供選擇,有平有貴,由最平$48嘅豆腐清湯鍋,到最貴$218嘅秘製豬肚竹絲雞鍋;其次,火鍋料嘅質素都好重要,概略望一轉張點菜紙,選擇亦一樣唔少,仲算喺精選嘢,有咩類別及款式唔多講,反正掃描晒成張點菜紙俾大家參考,仲一目了然好過小弟呃版位逐樣講啦。
起動之前,順便講埋啲醬料,一個小木架6款醬料喺齊度,有蔥花、蒜蓉、辣椒、麻醬、炸蒜及沙嗲,唔算多,但都夠晒基本,收費位位$15,真喺點都要混幾款撈吓。小弟就較常蔥花、麻醬、炸蒜撈沙嗲,濃香中有份清新。
bowl鍋居喇沙鍋 $68
幾款湯底中,以依個喇沙鍋最心水,因為一來喺店方推介,二來賣$68唔貴,再者小弟亦鍾意喇沙份惹味。一大鍋喇沙湯,滿滿嘅雜菇,味道唔算辣,惹味猶在。
bowl手切肥牛 $108 / 細、$138 / 大
肥牛跟火鍋真喺走唔甩,雖然牛肉有幾款推介,如至尊手切肥牛($298)、頂級手切肥牛($198 /細、$248 /大),不過,唔想花太多,又唔需要食到咁盡,依個手切肥牛已夠貨(圖為大份)。牛肉油花分佈平均,薄切輕灼,口感柔軟嫩滑,帶有少少油脂,夠晒滿足!
bowl蒙古羊肉片 $52
羊肉片刨成薄片,同樣輕灼可以,入口軟滑,唔太羶,加上以喇沙湯嚟灼,對唔多食羊嘅人會更易入口。
bowl鮮四寳丸 $68
四寳有牛肉丸、鯪魚丸、鮮蝦丸及墨魚丸各兩粒,店員話全部都自家製,食過就知有質素,無欺場,點四寳丸適合人少嘅朋友,可以一次過試唔同嘅丸類。
bowl手打鮮蝦丸 $78
好幾款丸都話喺推介,依碟手打鮮蝦丸又如何。不愧為新鮮手打,蝦鮮味十足,還加入粒粒蝦肉,而且,口感爽口彈牙,令人回味。
bowl響鈴 $35
又喺啲店員嘅重點介紹,話喺晌附近甚有名氣嘅樹記取貨,將響鈴輕浸幾秒,仍有種香脆嘅感覺,又滲入少少湯汁香味。
bowl自製韭菜餃 $48
又喺誠意之作,韭菜餃自家製,粒粒包得飽滿,內裡填滿韭菜,一咬一口都喺韭菜香。
bowl水魷鬚 $48
魷魚鬚粗身大條,口感爽彈,由於魷魚鬚一般味淡,所以,襯番依個喇沙湯食落正好多。
bowl脆肉鯇魚片 $42
脆肉鯇一向喺打邊爐嘅心水選項,灼過嘅鯇魚片,鮮嫩而脆口,鮮甜好味。
除咗以上介紹,都仲有食其他嘢,如蔬菜、公仔麵、烏冬,不過,無咩太特別就唔多講。除咗醬油費,仲有酸菜小食(@$10),汽水$12罐,酸梅湯$28渣,另收加一服務費。9:30pm後入座計,食品一律8折,不過飲品除外。香港人真喺熱愛打邊爐得緊要,火鍋店隨處可見,你又會唔會跟朋友襯盛夏之祭嚟一次火鍋聚?

個人評分
味道:8/10
環境:7/10
服務:7/10
抵食:7/10
平均每人消費:HK$250

餐廳資料:
鍋居火鍋專門店
深水埗福華街 191號地下
2780 1618


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
人均 $250.00
商店 鍋居火鍋專門店
特搜總編E2014-12-08 11:24:13
+ 追隨
舉報
恭喜!經過「SeeWide評審團」一致通過,你的發佈已被選為推薦攻略!你不但可以獲得200經驗值,更能累積200探險里數作為開展下次探險之旅的旅費!
回覆