「高．牽心」環境頗為闊落，橙色、白色對襯，配以手繪木椅，張張不同，反映年輕人嘅夢，就如色彩一樣，可以多姿多采。

因為店中確有聽障侍應，雖然他們大多曉得讀唇，不過，要是你能跟他 / 她以手語溝通，會是一份尊重，可是，相信無乜幾多個健聽嘅會識手語，但餐枱紙印有一個手語：「謝謝」，應該可以大派用場。此外，為方便你點餐，或作出一啲基本嘅要求，餐枱紙左列一堆圖案及數字，都喺好實用並希望你會用此跟聽障侍應「溝通」。當然，為免誤會頻生，餐廳內有其他健聽嘅侍應，所以，唔使太擔心溝通問題。

咪以為佢喺間社企就做得好hea，睇落一樣有板有眼，類別包括前菜、意式蘋果醋飯、披薩、主菜、甜品。此外，更有一個招牌菜推介餐牌，如：蜜糖蘋果燒汁豬仔架、黑松露野菌意大利飯、三色意式蘋果醋飯……等待，萬一諗唔到揀乜，大可晌啲招牌菜度下手。

散點有唔少選擇，但我哋鍾意點套餐，包食樣，包嗰樣，計落抵啲嘛。晚餐由A至H一共有8款，款式都頗多元化，不拘一國，有冷麵、有意式飯、有意粉、亦有扒，所有晚餐包括是日餐湯及飲品，另外加錢有升級優惠，如加$25可獲一件是日精選蛋糕，順帶一提，惠顧需收加一服務費。

青豆煙肉忌廉湯、香草蕃茄包

個餐湯真喺唔差，色澤青綠，幾濃青豆味，又隱約有一絲絲煙肉嘅肉燻香，當中有少少豆蓉碎，唯幼滑度就莖咗啲，但比起一般嘅紅湯、白湯，誠意及心思兼備啦。

香草蕃茄包味道帶少少蕃茄酸，但香草味強，可能放耐咗，有少少乾身，唔夠鬆軟，美中不足之處。

A. 鰻魚鮑魚麻醬冷麵 $82

老婆想淡快啲，就揀咗個冷麵。個冷麵入口冰涼清爽，而且，已經撈勻芝麻醬，個醬汁好香濃柔滑，唔會過「杰」；而餸料落得好足，有鰻魚（切片）、素鮑（切絲）、蟹捧、腐皮絲、青瓜絲、紫菜絲、蔥花，所以，味道紛陳。

E. 黑松露帶子意大利飯 $128

點單時會問你使唔使軟啲，因為怕有啲客人唔慣食意大利飯。意大利飯煮得煙韌而好有咬口，飯粒滲出濃郁黑松露香，超多野菌之餘，仲份量十足；至於煎帶子，鮮甜彈牙，有點焦香，令到個飯錦上添花。怪唔得個黑松露野菌意大利飯喺店中招牌菜之一！

蘋果甘筍汁

餐飲只提供一般嘅啡茶檸水，想健康啲，唔介意俾多少少加$12可以考慮轉果汁，全都喺鮮榨。老婆揀杯蘋果溝甘筍，如果兩溝就要加$15喇。味道以蘋果味重啲，感到清香，但天然健康先喺重點。

鮮奶咖啡

轉飲其他特色咖啡如意大利泡沫咖啡、鮮奶咖啡……等，要額外加$4。不過，我所點嘅鮮奶咖啡就真喺唔得。當咖啡送到後，我有再詢問過依杯喺咪鮮奶咖啡，回覆確認為喺，小弟亦無為此糾結，但跟一般普通即磨咖啡無乜兩樣，缺少豐厚奶泡嘅柔滑感，又沖到瀉晒，認真失望。事後再確認張單，真喺有收+$4轉鮮奶咖啡，如果沖到咁嘅質素，絕對離合格好遠。

作為一間社企餐廳，晌好多方面都做得唔錯，跟外間嘅Café無異，定價亦晌合理範圍，與其不斷追捧名店或長龍人氣店，倒不如搵啲時間支持依啲有心有誠意嘅社企小店。

個人評分
味道：8/10
環境：7/10
服務：8/10
抵食：6/10
平均每人消費：HK$126

餐廳資料：
高．牽心 Go Inside
紅磡都會道6-10號置富都會7樓741號舖
2668 0450