|
太興 Tai Hing：我的星期六美孚早餐 ~ 老婆之選
|
|
山區麵包王
2014-04-19
1367
0
|
分享
收藏
其實，由屋企行過去太興（曼克頓山）真喺幾鬼遠，不過，老婆試過佢啲早餐話好食，點都要搵次拉埋我去，請我食番餐喎，佢咁有誠意，行到落荔枝角都得啦！
翻一翻早餐餐牌，首先見到一個「人氣早餐」系列（N1-N3），主打喺火腿通粉配鬆脆多士，再拼香滑炒蛋 / 美味火腿 / 香草腸，朝氣價$31，可免費改米粉，但轉公仔麵另加$3。火腿通間唔時都有晌屋企整嚟食，所以，興趣唔大。
另一組早餐系列「精美早餐」（A-K）共有10款，無特定主打，喺唔同嘅食材組合，賣$29 / $31。而所有早餐都配熱飲，咖啡喺即磨高級級別，仲有特別少少嘅柑桔蜜、柚子蜜、鹹檸水可揀，結果老婆要早餐C（自家製糯米雞），小弟則點咗個早餐D（沙嗲牛肉香腸湯通粉），兩款都喺賣$31。
糯米雞無話特別大隻，但糯米軟糯黏韌，帶有少少荷葉香，冬菇、臘腸、腩肉……等等，實在多料，再者內裡嘅汁醬惹味。
老婆試咗杯柑桔蜜，感覺幾天然滋潤，柑桔味清香，初時真喺以為用醃過嘅柑桔加蜜糖做，埋單時問一問侍應生，原來都喺現成貨一大樽嘅來貨做。
我成日覺得「沙嗲牛肉」喺好多香港人晌外出食早餐嘅集體回憶，一般茶記早餐梗有沙嗲牛麵可揀。整碗通粉同樣幾足料，通粉本身份量唔少，沙嗲牛肉腍滑香軟，沙嗲汁又夠香，加埋條香草腸，唔喺過鹹嘅雞肉腸貨色，脆卜卜，感覺喺唔同啲，食完夠晒飽肚。
餐飲可以免費升級成為意式泡沫咖啡，又唔使額外加錢，真喺大方。見杯咖啡面面嗰兩大點啡色，就知佢啲泡沫咖啡喺用機沖，撳個制就搞掂。幸而，啲咖啡又確有啲水準，奶泡幾豐厚，入口頗香醇，三十零蚊個餐就有杯泡沫咖啡飲，你仲想點！
最後，仲想講多少少有關服務，講到底太興都只喺間摩登茶記，但除咗裝修光鮮之外，清潔服務亦睇得出落過功夫，部份小櫃旁都擺低垃圾剷、掃把、垃圾鉗，讓侍應可第一時間處理地下嘅垃圾，無一般茶記咁地踎，感覺更乾淨企理，值得一讚。
有機會晌其他時段再嚟過，睇吓佢其他嘢食又得唔得！
個人評分
味道：8/10 環境：7/10 服務：7/10 抵食：8/10 平均每人消費：HK$31
餐廳資料：
太興 Tai Hing 美孚寶輪街9號地下C號舖 2371 3368
感謝 山區麵包王 提供以上資料 山區麵包王的網誌: http://garycwm.blogspot.hk/
|
~END~
人均
$31.00
| 商店 | 太興 (美孚店) |