抱歉,發生點錯誤。
重新載入
IKI Teppanyaki Bento:燒遙自在
山區麵包王
2014-05-15
1338
1
分享
收藏
雖然唔喺住晌荃灣,亦唔喺晌依頭返工,但依區都算得上出沒頗多嘅區域,都睇住近荃灣西站一帶,近年變化不斷,好似以前死氣沉沉、得幾檔傢俬鋪嘅灣景廣場,依家因有Aeon(前身吉之島)進註,即時煥然一新。而對面嘅荃灣廣場,一向都好旺,但早幾年稍稍翻身之後,就更加多人,尤其六、日。今晚,就喺同朋友一齊嚟到荃灣廣場嘅IKI嘆日式鐵板燒。
一入門口左邊就喺長長嘅鐵板燒「舞台」,如果想睇睇師傅大顯身手,就當然坐晌依一排吧位啦,不過我哋人多勢眾,吧位點都唔方便傾偈,不過,入面好多二、四、六人枱,卡位,甚至圓枱都有一張(但近門口),人多人少都無問題。而且,間隔都闊落,無論獨立椅,抑或梳化位,都用上絨布面,坐落十分舒適。
以日式鐵板燒計,IKI嘅定價都算親民。鐵板燒以定食為主,包括香瓜菜、沙律、味噌湯和日本稻米白飯(湯及飯均有升級選擇),分傳統鐵板燒定食及特選鐵板燒定食,部份定食更設有二人前選擇,如「羊扒拼牛‧雞扒定食」(一人前賣$168,二人前賣$328),已列明各種扒類有幾多件,又可以額外加配食材,如鐵板燒牛舌2串(+$32)、加拿大虎蝦2隻(+$33)、鐵板燒活龍蝦1隻(+$88)……等等。
唔介意食貴少少,揀到最貴嘅鐵板燒定食「活龍蝦鵝肝牛扒定食」,都只不過喺一人前賣$218,二人前賣$428。
若果嫌設定好晒嘅組合唔啱心水,主餐牌內仲有一款叫自選定食,定價$118,8款食材中(加拿大黑豚肉、挪威三文魚扒、澳洲比目魚柳、美國雞扒、日式牛肉漢堡扒、美國安格斯牛肉、加拿大虎蝦、北海道帶子)任揀兩款拼出個人心水定食。
如果你想食得更慳更抵,「激安!晚市優惠套餐」應該成為你必然之選,星期一至日,每晚提供一款優惠定食,比正價平20-30%。當然,每晚只有一款,有啲仲喺二人前添,所以,要盡享優惠都要揀啱日子嚟。
除鐵板燒以外,仲有多款一品料理,如:清酒香蒜燒雞翼、和風醬油蕃茄、炸蝦天婦羅……等等,都分散叫價及跟餐價。
bowl蕃茄粟米沙律(定食已包)
定食所包嘅沙律,眼前依個就已經喺兩人份,的確幾大份,大蕃茄及粟米都清甜,羅馬生菜爽脆,以蜜糖、芥末、蛋黃醬所做嘅,味道帶甜,清新簡單。
bowl味噌湯(定食已包)
內有昆布、白蘿蔔片,麵豉味挺濃郁,唔會得個鹹字。
bowl和風茶碗蒸 $28(散叫價)/ $22(跟餐價)
茶碗蒸,傳統日本料理嘅風味小食,小杯內嘅蒸蛋認真超滑,仲有朕雞湯味,所以,嗒到既有蛋嘅香味,又有肉嘅鮮甜;蛋內仲有冬菇、白果、雞肉,不過,依啲配料都變得次要嘞,再者,雞肉有少少嚡,更喺美中不足嘅地方。
bowl鐵板燒牛舌(兩串)$38(散叫價)/ $32(跟餐價)
一客有兩串,每串仲要有兩大件牛舌及一件日本大蔥,其實幾抵食。牛舌汁燒,唔單只非常軟腍,厚身得嚟有咬口,邊位又帶少少脆,而且味濃,加上大蔥好香,真喺值得一試。
bowl汁燒日本瀨戶內海鮮蠔(兩隻)$38(散叫價)/ $32(跟餐價)
鮮蠔燒過之後,都仍然幾大隻,有睇頭,食落又睇唔出都幾有蠔味,而墊底嘅雜菌非常之多,以牛油炒,幾甘香。
bowl活龍蝦、大蝦、鮑魚鐵板定食
相信活龍蝦喺店家嘅主打食材之一,因為走出去參觀大廚晌鐵板上顯功架時,發現原來近門口位(鐵板燒爐後)有個魚缸養住啲龍蝦,所以,啲龍蝦新鮮程度唔使懷疑。
一份過嘅定食,有1隻小龍蝦、2隻大蝦及1件鮑魚,底下墊有唔少炒洋蔥,滿有香氣。龍蝦肉質好新,味道帶點鹹鮮味,大蝦就更爽彈,鮑魚亦唔差,煙韌有咬口,全部都只喺簡單調味,食番食材嘅原味,唔錯嘅海鮮配。佐料配海鮮茄汁,店員話以茄汁、橙汁、西芹做成,味道特別。
順帶一提,除個別鐵板定食附有相關醬汁外,每枱均一早擺放咗一門三傑嘅自家製醬汁:鐵板海鮮汁、IKI辣醬、鐵板燒肉汁,顧名思義唔使多介紹點用。鐵板海鮮汁味道帶有少少酸味,有提鮮作用,所以襯上述嘅「活龍蝦、大蝦和鮑魚的鐵板定食」就啱晒;而鐵板燒肉汁味道帶果菜味,有去油膩之用,所以,輪到食下面個「西冷牛扒併牛肉薄燒鐵板定食」就襯晒。至於個IKI辣醬喺點,無試到,就留番食過嘅人評一評嘞。
bowl西冷牛扒併牛肉薄燒鐵板定食
睇餐牌就見到店家所用嘅都喺安格斯牛肉,雖然據介紹未喺用最頂級,但質量依然有一定嘅保證。西冷加薄燒,一次過滿足兩種口感,5乘熟嘅西冷做得好軟腍,富肉香;而薄燒嘅牛肉好嫩滑,包住蒜片及蔥粒,惹味感提升。
bowl鐵板炒野菜 $38(散叫價)/ $28(跟餐價)
雖然每份鐵板定食都附帶有唔少炒洋蔥,不過,食多點蔬菜亦無妨,野菜喺菇菌同椰菜,加點木魚碎。
bowl鐵板炒麵(牛 / 雞) $48
睇睇個賣相,個炒麵似乎炒得唔錯,不過,始終無食到,不便評論。但聽同行朋友講,味道唔錯,只喺略嫌麵條有少少腍。
bowl鐵板炒日本稻米飯(牛 / 雞) $48
個炒飯又幾好食喎,揀咗雞肉,配料仲有蛋絲、蘿蔔粒,入口唔太油,飯粒爽身。
食鐵板燒唔飲嘢真喺唔點得,除了汽水、啤酒、日本清酒、咖啡茶之外,仲有幾款梳打特飲,小弟就比較有興趣啲梳打特飲,所以揀咗一杯荔枝梳打。
bowl荔枝梳打 $28
用上蜜糖、荔枝糖漿、檸檬梳打做嘅荔枝梳打,唔會太甜,入口酸爽,一邊食鐵板燒,一邊飲住梳打水,感覺涼快。
晌一個闊落輕鬆嘅環境,以中等價錢嘆一餐鐵板燒,服務亦都妥貼到位,跟相熟嘅朋友談天說地,開心又過咗一晚。雖然小弟做人未至於消遙自在,但拼搏還拼搏,輕鬆還輕鬆嘅,否則,做人好易燃燒淨盡,了無生氣。

由於喺朋友所獲獎嘅餐飲禮券,所以,所點嘅食物比正常份量為多,而以上份量應可供3個人享用,故此,是次消費大概平均每人$200左右,方便大家有個參考。

個人評分
味道:8/10
環境:7/10
服務:8/10
抵食:8/10
平均每人消費:HK$200

餐廳資料:
IKI Teppanyaki Bento
荃灣大壩街4-30號荃灣廣場4樓410號舖
2682 1126


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
人均 $200.00
商店 IKI Teppanyaki Bento (荃灣店)
特搜總編E2014-12-10 09:53:13
+ 追隨
舉報
恭喜!經過「SeeWide評審團」一致通過,你的發佈已被選為推薦攻略!你不但可以獲得200經驗值,更能累積200探險里數作為開展下次探險之旅的旅費!
回覆