「晌西環遊轉」喺講緊同朋友搵「優閑」嘅經歷，明明話晌第二街，一來一回行過都唔見，啊！原來小店晌石階橫巷之上，不過，讓人感覺更寧靜。認識依間小店喺從食友口中得知，知道店主阿Ling喺位小妮子，隻身一人撐起成間店，憑幹勁往前衝，逐步逐步做出一點點成績。

小店環境唔大，呈長方形，牆壁貼上好多得意公仔，有花花草草，有熱氣球，有樹有雀，甚有童話小國之感。由於開放式廚房已佔去鋪面一半嘅面積，所以，除幾個吧位之外，就只有兩張二人枱。而招呼、做菜、收拾都喺由阿Ling一腳踢包辦晒，故此，都唔可以一次過應付太多人。就算嚟幫襯嘅朋友，都要有份悠閒嘅心，因為所有食品、飲品都喺即叫新鮮製做，要耐心等候一下。

既然餐廳叫得「甜品班戟店」，法式班戟自不然成為主打，翻一翻餐牌，班戟有甜有鹹，前者佔多數，一共有12款（$28 / 半份，$40-$44 / 全份），不過鹹嘅亦有7款（$25 / 半份，$38 / 全份）；此外，仲有其他特製嘅班戟同甜品，如心太軟、法式焦糖燉蛋，以及鹹點牛角包。另一方面，亦提供多種飲品類別，如即磨咖啡、抹茶特飲、絲慕雪（smoothie）……等等。

#9芒果配焦糖汁伴榛子雪糕班戟 $28

其實所謂半份、全份，都喺講做班戟時個直徑做幾大，小弟揀坐吧位，最好就喺可以睇到店主點整份班戟。熟練嘅手勢三兩下就整好餅皮，再加入芒果肉、鲜忌廉、焦糖汁，捲起之後，放上Movenpick榛子雪糕（原餐牌喺士多啤梨雪糕，可以更改）及榛子仁（可揀杏仁碎或朱古力粒）就大功告成。

班戟皮又薄又綿，富蛋香，邊位又香脆可口，而原粒榛子仁既脆且香，大大粒好有睇頭；至於，Movenpick榛子雪糕榛子甜濃，香甜柔滑；班戟內大大片嘅芒果肉，清甜好味，向店主問過，芒果採用呂宋芒，所以，質素有番咁上下，店主仲話，焦糖汁、鮮忌廉都喺自家煮、自家打，務求焦糖汁唔會太甜，而鮮忌廉亦唔會太「漏」，所以，一啖一心機，$28其實好抵食。有時晌啲雪糕專門店食球雪糕都幾十蚊啦，何況依家仲有咁多嘢。

#7紅桑莓配士多啤梨汁雲呢嗱雪糕班戟 $28

同樣落料十足無欺場，雲呢嗱雪糕香滑，再配以酸爽嘅紅桑莓、香脆嘅榛子仁，內裡混有味道自然嘅士多啤梨汁，一樣具水準嘅法式甜班戟。

瑪莉雞肉芝士班戟 $40

試過甜，點都要試份鹹嘅，依個喺3款特色鹹班戟之一，其餘兩款喺生果配棉花糖班戟及自家鹹牛肉芝士班戟，而特色鹹班戟無分半份 / 全份，只有全份份量。原來全份真喺幾大份，拎上手好有重量感，而捲起嘅班戟有近成呎高，一個人食一份可以夠飽肚。所有鹹班戟都可以配一款醬汁，選擇有沙律汁、法汁或千島汁，我哋揀咗千島汁，整體而言，味道又真喺唔錯喎，雞肉落得無手緊，軟滑又有香草味，有埋火箭菜、芝士，令味道唔單調，有層次。店主話個班戟餅皮跟甜嘅有少少分別，初頭無留意唔多覺，講完之後再食多兩啖，感覺倒有些微分別，原來甜嘅以小麥粉做，至於鹹嘅則用喬麥粉做，估唔到少少餅皮都咁考究。

法式班戟製作認真有水準，又試埋啲飲品如何？依家外面郁吓都超過30°C，由電車路行上嚟第二街話長唔長，短亦唔算短，但足夠行到一身汗，所以，冰涼嘅嘢飲喺首選，否則，平時嘅我多數都一杯鮮奶咖啡襯住食甜品。

Purple Smoothie $29

絲慕雪有3款味道：Summer Pink Lady、Purple及Yellow，隨意挑咗一杯Purple Smoothie，其實睇住店主做杯絲慕雪，都可以喺件賞心樂事。紫紅色嘅Purple Smoothie，外表帶點冷艷，以香橙、藍莓、香蕉鮮果肉打成，只喺加咗少少糖水，稱得上成份天然，不過，奇怪在唔見佢整嘅時候有落奶或忌廉，有別其他做絲慕雪嘅手法，不過，入口質感仍然夠綿密細滑，果香四溢，天然清爽，冰凍透心，絕對喺杯對抗盛夏熱浪嘅消暑奇冰。

凍忌廉紅豆牛奶抹茶 $36

朋友所點嘅牛奶抹茶，同樣唔失禮，以鮮奶咖啡嘅手法做出嘅牛奶抹茶，抹茶味不俗，口感幼滑，雖然杯面唧咗唔少忌廉，但忌廉都喺自家打，少甜，輕盈，將抹茶搞勻都唔會太甜賺。再者，紅豆都採用大粒靚貨，煮得軟腍清甜。

「優閑」雖然地方細細，但坐落感覺舒適，真喺有一份休閒。對區外客而言，佢個位置確實有少少隔涉，但感受得到店主對食物嘅熱誠同認真，加上咁嘅價錢有如此質素，值得再繼續支持！希望小店繼續努力！

個人評分
味道：9/10
環境：7/10
服務：8/10
抵食：9/10
平均每人消費：HK$80

餐廳資料：
優閑甜品班戟店 Leisure Time Crêpe
西環西營盤第二街88號常豐里2號怡豐閣6號地舖
8100 0993