想幫襯這店好耐，只是店舖唔係好大而等位的人相當多，沒一定耐性都唔得，碰啱這次頗早還未開始晚市，幾大都要試試。  

先來一碟鴨舌，滷水好淡，不過幾好食播。  

麻香雞腳筋都幾"了能"，即是成隻雞腳下面那個轉彎位後面，唔知邊間凍肉舖有這塊雞供應。講返雞腳筋都幾爽口，唯有點唔夠味，其實都唔怪得晒人，這個部位不索汁，這裡的汁又不是幾夠杰，兩野汁就流晒去碟底，食時最好先撈一撈。  

主角鵝片出場，對這次的鵝片真的又愛又恨，愛的是滷水味道相當好，不太甜仍有淡淡的滷水味，醬油味平衡得幾好。恨的是鵝片沒想像中多肉汁，應是老了一點點。另一個恨是切鵝片那位師父仔刀功頗差，唔知係唔係近來店舖擴張得太快"刀手"未學滿師就要出場。有乜問題?明眼的可能第一眼就見到每片鵝片不同厚薄，第二個更大的問題沒有拍照，因主要集中在中間的鵝片，師父仔要用幾刀才能把一片鵝肉片出，偏偏每下又不十分平衡令鵝肉片中間微起角，同一片多處厚薄不一，刀口纖維方向不一，令人覺得鵝肉稍稍無咁滑。好在老細當時剛剛未返唔係實一腳申開佢。  

滷水豬腩肉麵有咁多豬腩肉想話唔底食都唔得，不過這碟是失敗之作，麵雖很爽口且加了豬油及滷水後很香口好味，但麵的鹼水實在太太太重，食落口全是鹼水的苦味，當然麵是買回來的，但麵廠為求爽口可能多放了很多鹼水。第二豬腩肉滷的時間唔夠，肉較實唔淋滑及唔夠味，滷水汁本身太淡，不過點點鵝片的滷水就很好味。而雞蛋就幾好幾有滷水味，相信滷了約兩至三小時，比很多店舖無味的滷水蛋要好。其實如果自己有很多時間能做出更好味的滷水蛋，一般用滷豬肉的滷水浸四小時以上更好，若能煮滾後連肉放焗爐180度浸一個鐘後爐內自然冷卻更佳。  

最後的鴨下巴是連鴨舌的，整個鴨下巴連入面的骨及肉都好夠味，唔太淋太硬。自己唔太好這個東西所以唔評太多，只能說應是有水準之作。  

感謝 All About Foods 提供以上資料

個人日誌: http://hkgfoods.blogspot.hk/