抱歉,發生點錯誤。
重新載入
米走雞 Running Chicken:芝味雞煲
山區麵包王
2014-08-15
2132
1
分享
收藏
一向都好鍾意食帶有芝士嘅食物,例如芝士餅、意粉、薄餅……等等,而食薄餅更經常糝滿芝士粉晌薄餅之上,睇見好幾位朋友對長沙灣「米走雞」所撰寫嘅食評,引起小弟唔少興趣,加上地點幾就腳,由屋企搭兩個站地鐵就到,所以,就捉埋兩個朋友,搵個閒日夜晚過嚟試一試。
由於餐廳位處青山道近尾一截,附近都喺舊樓多,以及幾個待發展嘅地盆,所以,入夜都有啲靜,人流唔多,而入到餐廳內,亦感覺客人以街坊客居多。室內環境雖然無乜雅致嘅裝修,但夠晒乾淨企理,精簡平實。
離遠走近餐廳時,已晌門口見到佢兩個主打火鍋嘅燈箱:「黃金芝士雞煲」及「火焰麻辣雞煲」,為着前者而來,所以,亳無懸念。其實,原來仲有其他湯底供打邊爐選擇,例如:香濃豬骨湯、惹味沙嗲湯、四川麻辣湯、粟米蕃茄豬骨湯幾款。
啱啱坐低,店員就遞上A4大細一頁過嘅點餐紙,雖然雞煲已定,但當然都要先細閱一下有咩選擇。火鍋配菜由肉類、海河鮮、蔬菜及菌類、內臟、丸類,到粉麵,大概60多款食物,此外,仲有酒水。除咗一啲時價嘅海河鮮外,感覺整體定價亦喺平實,有啲配菜仲有全份、半份供選擇,非常有彈性,點餐紙右下角更列明4-11月夏季期間免收加一添,讚呀!
bowl黃金芝士雞煲 $128
芝士雞煲有分大細,大嘅$168,細嘅$128,曾問過店員細煲份量有幾多,佢話細嘅有一隻嘅份量,而大嘅則有隻半,但佢補充一句,為咗客人食得暢快,一啲無肉嘅下欄都會清走晒,但睇落又真喺好足秤,好大鍋。雞件本身已先處理過,所以,送上枱已呈金黃色,芹菜墊底,加上自家調校嘅芝士漿及乾蔥,待雞煲再滾起就食得。雞肉都算嫩滑,配芝士又幾OK喎,啲芝士頗香濃,滑溜唔太杰,但好掛汁,有少少食緊芝士火鍋咁,真想搵件法包沾啲芝士食。
清晒啲雞件,開始加入奶白色嘅上湯打邊爐,而配料亦隨即送到。由於個雞煲著實唔少,為免食唔晒而嘥嘢,所以,我哋採取邊食邊點嘅策略,先嚟一碟特級雪花肥牛、響鈴、蜂巢冰豆腐及竹笙,及後唔夠先再追加。
bowl特級雪花肥牛 $88(細份) 
肉類有牛頸脊、牛柳粒、羊肉片……等等,據店員介紹,佢哋啲肉大部份都喺晌附近街市新鮮買。由於同行朋友都唔喺食肉獸,所以,都唔敢點太多肉,只點咗一碟細雪花肥牛,雖然肉質好鮮嫩,但實在偏肥。
bowl響鈴 $38
一客響鈴有10條之多,都只喺賣$38,輕灼數秒,外層吸咗少少湯汁有份軟軟腍腍,咬落內裡仍有些微脆身,豆味唔算好強,屬中規中矩嘅水平。
bowl蜂巢冰豆腐 $35
豆腐放入湯內,煮透吸滿湯汁後,變得煙韌有咬口,口感幾得意,真喺唔知邊個咁醒諗出依樣嘢。其實好多嘢雪過之後,質感及味道都有變,所以,冰豆腐真喺唔可以當食一般豆腐嚟睇!
bowl竹笙 $28
雪白嘅竹笙滿滿放得一碟,賣$28唔知佢毛利有幾多。竹笙本身無乜味,但入口爽脆,又好吸汁;最大賣點喺健康有益,促進新陳代謝,降血壓,減膽固醇嘛。
bowl秘製鮮蝦蟹籽餃 $25(半份)
見啲丸類都唔太特別,所以,就不如試試佢嘅秘製鮮蝦蟹籽餃,餃子喺自家包製嘅,以鮮蝦、蟹籽做餡,味道算唔錯,但唔會太有嘩一聲嘅感覺。
bowl金菇 $28、白菜仔 $15(半份)、生菜 $15(半份)
一連幾款蔬菜一次過分享,其實,都喺啲晌街市常見嘅種類,不過,街市貨色,夠新鮮,又靚仔。
bowl飲品
幾款啤酒、汽水外,仲有奶茶、檸茶添,不過,唔知質素如何,都喺檸7、檸樂($14)夠穩陣,冰底加檸檬,自斟自飲。
最後都俾個笑,不過,正式嚟講,個笑喺俾個黃金芝士雞煲;配料方面,只可以俾個OK佢,實在有待改進,誠然服務搭夠。當然,我哋只喺試咗三幾樣嘢,無點試佢啲貴價食材,或許有啲未夠全面,但來日方長,咁近我住嘅區域,再幫襯容乜易。

個人評分
味道:7/10
環境:7/10
服務:8/10
抵食:8/10
平均每人消費:HK$150

餐廳資料:
米走雞 Running Chicken
長沙灣青山道383號地舖
2813 8522


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
人均 $150.00
商店 米走雞 (長沙灣店)
特搜總編E2014-11-14 17:07:26
+ 追隨
舉報
恭喜!經過「SeeWide評審團」一致通過,你的發佈已被選為推薦攻略!你不但可以獲得200經驗值,更能累積200探險里數作為開展下次探險之旅的旅費!
回覆