抱歉,發生點錯誤。
重新載入
落雨天、購物天
May姨blog
2009-03-09
787
0
分享
收藏

星期日,原本冇打算去shopping既,見Bibi又去咗跳舞,兩老咪又閃去元朗食粥咯。


爸爸帶人亂咁兜,我都唔認得d路。先去發記叫碟齋腸、兩碟炒米(今日炒麵居然賣晒喎)、豬潤粥、白粥。$44,飽到上心口。




齋腸係預期的滑




唔食豬潤粥好似好對自己唔住, 見唔見到佢地俾心機切既蔥花呀?




D豬潤真係好靚, 又大塊




原本炒米係有埋椰菜既, 因為第一碟上檯既時候唔記得影, 諗住仲有一碟, 咪下一碟先影咯, 點知炒第二碟俾我地果陣, 連椰菜都賣晒, 所以第二碟只得芽菜, 白雪雪既.咁唯有拎返第一碟既殘餘部份俾大家睇下啦.




爸爸既白粥,今次連鹽都未放既, 我試過味, 證明佢係連味精都冇既.


大家只要睇下炒米既碟, 就知煲粥有幾巨型啦!!!




黎得呢頭,唔去十蚊店巡下,又點對得住自己呢?呢d就係我今日既戰利品啦:




見唔見果d IQ積木呀? 費事打d同事既細路主意啦, 都係自己買啦, 鋸開少少就可以用.


呢度既街市咁多野賣,真係唔買都睇下啦。走去買粟米,明明寫五蚊份既(但個牌放係隔離d菜上既, 但呀姐把口猛話五蚊份架),呀姐見我生面口,居然話要十蚊喎!可能佢見我一定係好洽架啦,咁我都知自己係傻既,或者呢度d野真係咁貴既呢。點知行多幾處,都係十蚊六條架!真係要認住呢只鷹啦。


同呀婆買紅蘿蔔仔,都係五蚊。又靚又香!




之前經過大同老餅家,我話想入去買下野。爸爸又帶我兜路,咁啱經過一間賣膠袋同快餐用品既鋪,唔知有冇zip袋賣呢?又走入去八下,裏面都好多野賣,連鯉魚年糕既模具都有。買咗心心錫紙朱古力兜、焗蛋糕既紙杯(其實我冇用既,但或者d親朋好友會啱用,買咗先)、0號、1號、2號zip袋仔各一包。




咦?乜有間永達農場既店既?原來係賣走地雞、有機菜同外國進口凍肉既店黎,入去望下,買咗包豬扒,唔知好唔好味呢?聽晚爸爸要返學,我同Bibi又可以作反啦!蝦, 我地食粟米豬扒好呢? 還是鮮茄豬扒好呢?




終於都去到大同餅家,執咗馬仔、芝麻餅(比較厚身既,好鬆化,Bibi話一早就想食,但見未開就唔敢搞住,夜晚見我開咗,幾開心呀)、炒米餅(爸爸堅持要執返佢既童年回憶喎)同埋兩個熱辣辣既雞尾包。爸爸好衰,鬼咁粗鹵,一挾就挾兩個包,搞到扁晒,好可憐啊,我最憎人咁摧殘d物件架啦。唔去過呢d老餅家都唔知唐餅係一斤四個既,每個禮餅大概四兩重架!




呢塊就係爸爸既童年回憶啦, 棚牙差d都咪制呀!味道都唔錯既.




根住要行去總站坐輕鐵,行行下,摸住果兩個熱辣辣既雞尾包,唔咬返啖好似好對佢地唔住喎!咁咪一路行、一路食咯,d餡熱到辣鬼死呀。點知俾爸爸發現咗添,又要俾佢食啦。所以未去到車站就食晒咯。


新界原來真係有好多木棉花架,沿途所見,隔冇幾遠就有一棵,甚至幾棵盛開既木棉樹。大家睇下,可惜今日天色麻麻,所以唔可以將鮮明既花色顯現。





============================================

感謝 May姨Blog 提供以上資料

May姨Blog的網誌: http://maylibibi.blogspot.hk/


============================================

~END~
商店 大同老餅家 (元朗店)