抱歉,發生點錯誤。
重新載入
前門飯莊 The Door Northern Chinese Dining:擁滬有理
山區麵包王
2014-06-22
1447
0
分享
收藏
若非小組成員搞活動,都甚少入到嚟青衣,我哋先飯聚,再打波。每次入到嚟都有朋友負責晒所有事,安心食,安心玩,而揀前門飯莊作為飯聚地點,朋友話貪佢有個房仔,可以自成一角,又無消費要求。
餐廳環境幾雅致,燈光柔和,牆上掛有好多中式提字。而我哋所處嘅「廂房」,其實喺半開放式,無實心嘅牆,亦無門,只喺有啲間柱,又晌角落位,騷擾性比坐大堂低好多。
前門飯莊主要賣上海菜,亦有少少京菜同川菜,由冷盤前菜、熱葷大菜、點心粉麵、甜點糖水,款式超過70、80,選擇多多,部份菜式有圖有相作參考,而且,睇落價錢亦唔算貴。除茶錢收每位$7、加一之外,都無其他雜費。
冷盤前菜多達23款,好多知名嘅滬式冷盤都有,如四喜烤夫、蔥油海蜇、雞絲粉皮……,而京式嘅北京水晶肉,川式嘅四川口水雞,均有供應。
bowl醬香凍茄子 $45
凍茄子口感腍腍滑滑,冰涼清爽,所謂「醬香」,有點鹹鹹辣辣嘅味道,又滲出絲絲蒜香,食落都幾醒胃。
bowl香糟醉雞 $70
醉雞晌滬式冷盤中一向都喺好受歡迎,而依道香糟醉雞亦喺冷盤嘅廚師推介之一。一客醉雞份量不少,酒糟香氣撲鼻,外皮好爽,雞肉頗滑,果然有水準。
bowl京蔥醬汁牛肉 $53
牛肉喺用上牛展,滷煮後,配上京蔥及醬汁,都算一道簡單冷盤,但味道絕不簡單。牛展滷得軟腍,帶微微鹵水香,配京蔥嘅香爽,醬汁嘅濃香,食味不俗。
嚐過前菜,又喺到大菜嘅時候。家禽類點咗一個山東手撕雞,加多一客鴨崧配叉子燒餅,兩者都喺廚師推介;蔬菜類就揀嚟濃湯大白菜,熱葷主食應該都差不多。
bowl山東手撕雞 $98
只賣$98有成隻手撕雞,大家都明白喺冰鮮貨色,尤其依家啲冰鮮貨色一啲都唔差,除非做白切雞,否則都唔喺咁易分得出喺新鮮定冰鮮。手撕雞以濃香醬油製作,再手撕而成,雞肉比想像中滑,而且十分惹味,抵食。
bowl鴨崧配叉子燒餅 $80
除鴨崧,亦可揀雞崧,嫌一份叉子燒餅唔夠填晒咁多鴨崧,可以另外叫淨燒餅($25)。鴨崧炒得幾香,又加入松子仁,叉子燒餅烤得薄薄脆脆,包面沾得滿滿芝麻,鴨崧配燒餅,夾埋一齊回味無窮。
bowl濃湯大白菜 $58
大白菜改咗紹菜,不過咩菜都唔喺重點,大家都志在有啲蔬菜落肚。至於個濃湯,都算唔錯,不過,又唔會令你一飲難忘嘅程度。
一啲飽肚嘅粉麵及點心都喺唔少得,所以,點咗3客粉麵,2客點心。雖然我哋有成10個人,但女士、細路佔多,況且,仲有個蛋糕做甜品,所以夠晒食。

bowl三鮮兩面黃 $68
個兩面黃認真失望,一向對兩面黃個印象都喺麵餅底面煎香金黃帶脆,中間柔軟。不過,眼前依碟似一般粵式嘅肉絲炒麵,只喺肉絲換嚟肉片、蝦仁,唔喺話佢個味道差,如當為一般中式炒麵,其實做得幾好食,材料又多,只喺欠缺咗應有風味啫。
bowl四川擔擔麵 $35
雖然個兩面黃失望啲,但個四川擔擔麵又的確唔錯喎。擔擔麵麵質柔韌有嚼勁,配合濃濃湯汁,有些花生香,帶點點辣,真喺幾好食。
bowl雪菜肉絲湯麵 $35
為顧及各人需要,一個辣嘅,就自然點一個唔辣嘅湯麵。雪菜肉絲本身味道溫和,如無咩太大失誤,都唔會難食得去邊。
bowl灌湯小籠包 $45
小籠包外皮唔算薄,亦唔可以話佢厚,至少從外觀都透到內裡嘅湯汁,不過,湯汁就真喺幾爆,要小心食,免得濺到一身都喺;豬肉餡亦都鬆化,唯一要挑喺個收口摺位比較厚,影響個口感。
bowl銀絲卷 $18件
依個應啲做媽媽嘅朋友要求,搵啲包俾阿囝囝食,正路就嗌1蒸1炸,各有所好。蒸嘅銀絲卷口感極之鬆軟,又唔黏牙;而炸嘅銀絲卷口感香脆,內裡軟綿。
餐廳本身有收切餅費嘅要求,不過,佢話只要點一客甜品就可以豁免。我哋帶咗個蛋糕去慶生,而個棗泥拉糕就因此只點咗一客,溫馨提示,個棗泥拉糕即叫即蒸,而又製作需時,所以有心試就記得預早少少落單。
bowl棗泥拉糕 $34
以紅棗搓成棗泥,再做成富上海特式嘅拉糕,面頭再加滿瓜子仁,擺成花形,幽雅別緻。拉糕質感軟糯,黏黏綿綿,啖啖都滲出濃郁紅棗清香,甜度又啱啱,怪不得列為廚師推介嘅甜品之一。
由於我哋一早訂枱兼食6:00pm,早段客人唔多,服務都無問題,不過,後段開始多客,人手有啲緊,所以,有啲服務都怠慢咗。但喺,整體都令人滿意嘅,況且,菜式選擇多,收費亦合理,地點又方便,值得再幫襯嘅菜館。

個人評分
味道:8/10
環境:8/10
服務:7/10
抵食:7/10
平均每人消費:HK$110

餐廳資料:
前門飯莊 The Door Northern Chinese Dining
青衣青敬路33號青衣城3樓322B號舖
2186 7733


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
人均 $110.00
商店 前門飯莊 The Door Northern Chinese Dining