抱歉,發生點錯誤。
重新載入
上海婆婆336 Shanghai Po Po 336:初次蟹逅
山區麵包王
2014-10-07
1620
1
分享
收藏
大概半年前嚟過上海婆婆336食飯,由於菜式帶點新派,又做得有水準,所以,對該餐印象唔錯,記憶猶新。從雜誌知道佢哋出咗啲蟹粉菜式,就搵埋幾個朋友一齊試吓,初次邂逅佢嘅蟹粉菜式,唔知水準又如何呢?
「上海婆婆336」跟「上海婆婆」有咩關係?336又點解呢?環境、菜式類別……依啲晌上次食評都介紹過,所以,都唔多費唇舌。雖然,聽講尖沙咀食肆嘅生意差咗,不過,仍有不少食店嘅生意不俗,就好似今晚所見,婆婆嘅生意認真唔錯,睇落估計都有九乘幾滿,當然都仲要睇人均消費額先準,食肆就最怕旺丁唔旺財,可是作為食客,人哋嘅生意額就難知啲喇。
既然一心嚟食蟹粉菜,自不然聚焦晌個創意蟹粉系列餐牌上,由於我哋唔咩蟹粉狂熱份子,而且,有啲上次試過嘅心水冷盤又想介紹俾朋友,所以,眾多蟹粉菜中我哋只點選咗其中兩款。此外,再按大家喜好加啲富特色嘅菜式,樣樣有啲,就成為今晚聚餐嘅選擇。

bowl四小拼(脆鱔、小排骨、烤麩、肴肉)$95
之前試過佢嘅脆鱔,超正,正想介紹俾朋友,朋友就心多多不如揀個四小拼,因為一次過試到多幾款冷菜。黑掹掹嘅脆鱔依然脆卜卜,沉厚酸香;小排骨喺幾款冷菜中較平實啲,肉質倒算做得鬆化;烤麩軟軟綿綿,索滿醬油;肴肉晶瑩的骰,豬肉凍做得有咬口,但感覺蹄肉偏少。
bowl魚籽煙燻蛋 $18隻
依個煙燻蛋喺重點推介俾朋友,賣相誘人,金黃蛋黃半凝半黏,而蛋香濃郁,溏心效果出眾,一小撮黑魚籽更能提升燻蛋嘅味道層次,朋友都讚佢好食又有賣點。
創意蟹粉系列
今次上海婆婆推出咗10道蟹粉菜,都算幾多種類,有包點、小菜,連飯麵都有。
bowl蟹粉生煎包 $82
今次無揀小籠包,反而對個蟹粉生煎包興趣大啲。一客有3個,個個飽滿大隻,包底煎得甘香鬆脆,內裡豬肉加埋蟹粉,搓得鬆化唔死實,入口絲絲蟹肉,用料十足。
bowl蟹粉炒粉皮 $102
蟹粉生煎包做得有啲意外驚喜,不過,個蟹粉炒粉皮就差少少,雖然都落足蟹粉、蟹膏,可能做蟹粉個茨汁太多,撈埋啲粉皮有種濕漉漉嘅感覺,粉皮亦未見爽身,相信可以做得更好。
bowl乾燒蝦球 $128
上次試過一道鹹香蝦球,以鹹蛋黃炒鮮蝦球,實在好食,不過,朋友都怕膽固醇超標,所以改選乾燒蝦球。鮮蝦球依然具質素,既大隻,又鮮爽,配一個酸辣醬汁,少辣微酸,入口挺開胃,的確叫人味。
bowl松子黃魚 $168
唔知點鮮,好多朋友上上海館子都喜歡叫依道菜,小弟覺得喺鍾意其賣相好睇。一片橙紅嘅黃魚,鎅花唔算好分明,但做到外酥魚嫩,茨汁甜酸細緻,仍有上次食到嘅水準,唔會有咩大起大落。
bowl腿茸津白 $65
清清淡淡嚟一道腿茸津白,比起奶油津白無咁重味,但以上湯灼煮,兼糝上碎碎嘅金華火腿,清淡中不失一點鹹香。
女生果然有兩個胃,之前仲講話夠喇夠喇,飽晒喇,要由小弟包底,估唔到轉頭一口氣點4款甜品都面不改容。

bowl豆沙窩餅 $45
老牌上海菜甜品之一,一份可以切開8件,餅皮炸得金黃香脆,無多餘油份,內裡薄薄一層豆沙,餅面仲加咗少少椰絲,清甜好食。
bowl香蕉高力豆沙 $45 / 4件
高力豆沙做得軟綿綿,一口咬落非常柔軟,伴隨豆沙及香蕉肉,少甜清香,滋味非常,不過,今次明顯得好少豆沙,否則味道更綿香。
bowl南瓜餅 $40 / 4件
依個喺小弟「飛弗」,因為南瓜餅軟綿煙糯,寧捨有咬口,而且,佢哋做嘅南瓜餅又唔黏牙,淡淡南瓜味,襯豆沙,唔錯!不過,事後先有為意,對上3個甜品都喺豆沙餡,實在有啲重複嘅感覺。
bowl酒釀丸子 $28
咁多款上海甜品中,以酒釀丸子相對無咁大興趣,可能一向都酒嘅興趣都唔大,不過,你叫到嚟,我又絕對唔會錯過。丸子煙韌香糯,甜湯帶有淡淡桂花甜香,又有淡雅嘅酒味,但不知何解,湯內有少少熟唔透嘅丸子,要扣分啊!
茶位收$6位,連埋收加一,每人大概$200,都算合理。今次點菜比上次不遑多讓,食得大家稱心滿足,雖然其中一道蟹粉炒粉皮未如理想,佐其他菜式仍保持水準,故此,相信仍會有再見「婆婆」嘅機會。

個人評分
味道:8/10
環境:8/10
服務:8/10
抵食:8/10
平均每人消費:HK$200

餐廳資料:
上海婆婆336 Shanghai Po Po 336
尖沙咀彌敦道63號iSQUARE國際廣場6樓605-606號舖
2806 1833


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
人均 $200.00
商店 上海婆婆336 (尖沙咀店)
特搜總編E2014-12-18 12:32:26
+ 追隨
舉報
恭喜!經過「SeeWide評審團」一致通過,你的發佈已被選為推薦攻略!你不但可以獲得200經驗值,更能累積200探險里數作為開展下次探險之旅的旅費!
回覆