冬至晚飯番娘家食，奶奶嘅冬至飯前晚食咗，但正日陪唔到奶奶，怕佢一個人寂寞，約佢食番個lunch。奶奶揀咗日本菜，想大家坐得舒服，於是就揀位於Isquare嘅匠伊兵衛。

因為太遲book位，冇哂window side嘅位置……不過，我哋啲位反而係坐得舒服啲嘅，只係……餐廳好熱好焗……我坐到要走出洗手間除衫……一行出餐廳，涼哂！除完衫再番入去坐，仍然係焗到想暈……

三個人，點咗三個餐，問waitress「刺身天婦羅定食」有咩刺身，佢就話視乎當日邊隻刺身新鮮，但大路款如三文魚就必有，其實，我關心嘅係有冇海膽啫，知道有後，即點！

刺身天婦羅定食 ($210)﹕天婦羅完全唔熱，連微暖都不如！粉漿唔均勻，一粒粒好似癌細胞咁痴喺啲炸物上，一件件天婦羅食落仲好大陣油益味……劣！刺身方面，唔覺得特別新鮮，不過個原膽原隻上，賣相好吸引！雖然唔鮮甜，仲有少少腥，但唔苦我已經偷笑。個set仲有牛肉，但又係唔熱加好嚡……蒸蛋又係唔熱……仲要好鹹……麵豉湯鹹到癲我就預咗架喇！個飯好大碗，但唔特別好食，我哋覺得碗飯唔係用日本米煮嘅！

銀鱈魚定食 ($135)﹕奶奶之選。條銀鱈魚又係整到超鹹……不過，三個定食最熱嘅就係呢條魚！

鰻魚飯定食 ($155)﹕拾爺之選。鰻魚毫無特別，天婦羅嘅質素同我set定食一樣……不過，呢個set都幾多嘢食，算係三個set之中最抵食嘅！但，以呢到嘅收費同食身水準，都係唔幫襯好過！

埋單$550，環境擠迫，空氣侷促，食物水準差劣，冇下次！

評分時間﹕
食物：劣
服務：中下
環境：一般
衛生：一般
價錢：overpriced
總結﹕唔會再試！

餐廳資料：
匠伊兵衛
尖沙咀彌敦道63號iSQUARE 國際廣場28樓2801號舖
2722 1009

============================================

感謝 honeyhinbaby 提供以上資料

honeyhinbaby的網誌: http://honeyhinbaby.wordpress.com/

============================================