「懷舊」始終喺羅麥記最大嘅賣點，尤其幾位朋友都喺有番少少咁上下，對餐廳內好多事物，如飛行棋、粉藍色手冊、舊式二極管電視、撥輪式電話、綠白格仔地磚、懷舊商標……等等，都叫我哋可以講過不停，緬懷一番！

言歸正傳，大家唔停咁講都應該肚餓吧！晌餐牌上思量一番，朋友面對樣樣都想試嘅心態，都要狠心咁一人揀一樣作決定。

紅豆冰小忌廉奶茶 $38（跟主食$28）

上次試過紅豆冰粒粒奶茶，所以提議朋友一試，朋友都讚佢唔錯，由頭到尾奶茶味都保持到，無被溝淡嘅情況。今次小弟就試另一款小忌廉奶茶，唧上大抹忌廉，外觀變得靚仔咗，撈勻之後，口感更加柔滑如絲，不過，茶味會稍稍沖淡少少。

蝦多士 $58

因為喺店家嘅十大必食之一，上次食過亦覺得有水準，所以推介俾朋友。新鮮熱辣，蝦膠爽彈足秤，多士炸得金黃香脆，入口又唔算油膩，翻兜水準依然。

羅記炒蛋 $28

另一十大必食之一，炒蛋果然炒得滑嫩，無過老，仲帶有點點蛋漿，集香滑一身，如果糝少少香草碎，吊吊味，可以有唔同效果；伴有半件牛油厚多士，搽上厚厚一層牛油，啱晒小弟。如果你話三幾朝就有一份咁嘅炒蛋做早餐，幾令人賞心樂事呢。

香煎紅酒牛脷 $45

一小碟精精緻緻，色澤深沉嘅牛脷切成一口一小件，因為煎過，表面有輕微焦脆感，咬落好軟腍，又有輕輕紅酒味，以及牛脷獨有嘅羶香，易入口，喺一份唔錯嘅小食。

避風塘鮮魷 $58

熱氣嘢總喺人人愛，加埋以炸蒜粒嘅避風塘做法，甘香惹味，誘人小食。上次試嘅避風塘雞翼已經覺得好食，今回嘅鮮魷又喺令人回味，不單鮮魷粉漿薄，鮮魷味突出，唔似雪藏貨，沾滿炸蒜及七味粉，好易一件接一件食唔停。

磚頭焗咖喱芝士蝦球飯 $92

個「磚頭」大得無三幾個人都咪叫，麵包磚外層焗得脆脆，而裡面一半喺麵包，一半喺白飯（炒飯相信更好），上層鋪得滿滿咖喱蝦球，咖喱香氣撲鼻，而蝦球既大粒，又爽口，撈勻個炒飯食一流。不過，食到尾淨番唔少白麵包，唔食好似有啲嘥，所以店家有個溫馨窩心提示，就喺如客人有需要，可以向職員索取醬汁回點用，仲要有蕃茄汁、咖喱汁及白汁3款選擇，期望大家唔好嘥嘢啫，抵讚！

懷舊香蕉船 $38

嚟得懷舊就要走多少少，一於以「香蕉船」作結懷舊到底。老實講，豆丁年代，經濟邊有咁好，細個嗰時未食過香蕉船，一盒牛奶公司三色雪糕已經喺難得嘅極品。所以，晌隻「香蕉船」見番三色雪糕：朱古力、士多啤梨、雲呢拿，勾番唔少兒時食雪糕嘅片段，香蕉夾雪糕，入口一陣冰涼、香甜，慢慢晌口內化掉，無嘩一聲嘅感覺，卻有一份回憶嘅味道。

晌香港，雖然仍有少量真真正正嘅冰室老字號，但基於鋪租、人工、接班人……種種問題，執一間就少一間已經喺個事實，故此，好似羅麥記依類仿懷舊嘅餐廳亦逐漸多起嚟，所以，舊物依然引起很多人嘅共鳴，大家都未忘昔日情懷。

個人評分
味道：8/10
環境：8/10
服務：8/10
抵食：7/10
平均每人消費：HK$115

餐廳資料：
羅麥記 Law Mark Kee
屯門屯門鄉事會路83號V City 1樓11號舖
2618 3703