抱歉,發生點錯誤。
重新載入
大街餐廳 Main Street Corner Cafe:有口街碑
山區麵包王
2015-01-03
1053
1
分享
收藏
唔經唔覺,原來香港迪士尼樂園晌2005年9月12日開幕至今,已經將近10歲。小弟唔喺迪士尼粉絲,同老婆入嚟玩,純粹輕鬆吓,我哋都好耐無入嚟,今次都只不過喺第二次。園內分開好多主題區,而每區都設有食肆或小食車,咁多間餐廳中,以晌「美國大街小鎮」主題區嘅大街餐廳口碑最好,正所謂有口皆碑,所以,食晏地點就揀依處,今次作為生日飯,點都要坐低慢慢嘆番餐,好好享受吓,亦希望同佢食好少少咁啦。
雖然時值「迪士尼飛天巡遊」時間,仲諗住啲人去晒睇巡遊而無乜人排隊添,查實好多人都同我一樣咁諗,睇巡遊其次,搵餐晏緊要,所以,嚟到都已經有十多人排緊隊。不過,又唔算等得耐,都只不過等咗10分鐘,算幾快。
排隊期間做乜好,一就喺睇定有咩好食,侍應會遞個精簡版嘅餐牌俾你消磨時間;
其次,咪就喺企定定睇巡遊囉,因為啲「花車」好大架,好高身,離遠都一樣望到。
室內環境以美國小鎮嘅餐廳為藍本,地方頗大,樸實簡約,無浮誇嘅堆砌,帶有少少美式鄉村風格。另一邊玻璃屋,儼如一個小溫室,四同都喺大型玻璃窗,光線十足,感覺更開揚舒服,可惜未能安排坐晌依邊。
雖然晌排隊期間都睇過個餐牌,但嗰個喺精簡版,餐廳內有個詳細啲、多少少嘢嘅。除有個亞洲特色推介($188 +10%)之外,選擇分門別類為飲品、沙律、餐湯、小食及三文治、主菜、意大利粉、甜品,選擇唔叫得好多,但基本嘅都有齊。
另外,如果想食套餐,有一款「大街餐廳可口可樂聖誕套餐」,其實就算唔喺聖誕,都會有不時換款,跟可口可樂創作嘅套餐,包前菜、主菜及甜品,賣$298 + 10%,但唔包餐飲,故覺得定價都偏貴,其實,晌迪士尼乜消費都高啦。
bowl麵包籃
隨即送上嘅麵包籃有兩款麵包,一款燕麥,質感粗身啲,但不失軟熟;另一款麥包則較香軟,搽點牛油,讓微暖嘅麵包將牛油慢慢化掉,簡簡單單。
bowl茉莉綠茶 $40
今日戶外天氣都幾凍,點杯熱茶暖吓身,而且,可以沖幾轉「襟」飲啲。茶包採用帝瑪(Dilmah)品牌,小弟對茶唔太研究,印象中佢喺嚟自斯里蘭卡,事後網上查查,原來真喺甚具名氣,堅持以100%純錫蘭茶葉製作,絕無雜質。話時話,我哋都沖咗幾轉嚟飲都仲夠味,而且,唔會頭一杯濃,跟住就淡晒,茶味又的確幾香,幾醇和;此外,每杯飲品都伯附上一小件米奇黑芝麻曲奇,而店員亦都好主動,不時問問使唔使加熱水。
bowl地中海素菜千層麵 $158
又千層麵,又全素,啱晒我老婆,但初頭睇餐牌時,真喺以為佢喺傳統所見嘅意式千層麵咁,一層麵皮,一層餡料,食落先知錯晒,但確喺好有特色。「麵皮」只得底面兩塊,原來喺煎蛋皮,而唔喺千層麵皮,中間則一層層夾有好多蔬果,包括意大利青瓜、茄子、甜燈籠椒、菠菜、洋蔥,以酸香鮮活嘅蕃茄醬襯托,認真好味,喺一道既開胃,又飽到肚嘅菜式。就連賣相都做得頗精緻,淋上忌廉,加樖小香草,好睇唔一定要太花巧!
bowl地中海海鮮意粉配龍蝦汁 $178
另一道主菜,睇中「老鼠」嘅推介菜式「地中海海鮮意粉」,賣相方面就肯定比千層麵擺得更靚,更有睇頭,如果稍加留意,會發覺啲海鮮唔喺亂咁堆砌,鮮蝦及露筍穿插於魷魚中間。除魷魚有3圈之外,其他海鮮都有兩件,所以,跟老婆可以一人一件樣樣試勻。青口及魚柳幾好味,當中嘅魚柳其實有兩款:三文同龍脷,不過口感唔錯嘅魷魚及蝦就鮮味欠缺咗啲,還好嘅喺麵條夠咬口,龍蝦汁底亦都出色。
兩個人入嚟食,兩碟主菜,加杯熱茶都已經四舊幾水,如果想入嚟迤吓,享受吓個用餐環境,不妨考慮佢個「大街聖誕下午茶」,供應時間3:00-5:30pm,二人用都只需$298 +10%。
打著迪士尼嘅招牌,服務自然無怠慢,上菜快,店員都殷殷勤勤;只喺作為樂園內嘅食肆,定價都明白會偏貴,而且菜式選擇唔太多,平時晌出面食嘢就食鋪租,晌度食嘢就食品牌。

個人評分
味道:8/10
環境:8/10
服務:8/10
抵食:7/10
平均每人消費:HK$210

餐廳資料:
大街餐廳 Main Street Corner Cafe
大嶼山香港迪士尼樂園美國小鎮大街
電話欠奉


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
人均 $210.00
商店 大街餐廳 Main Street Corner Cafe (迪士尼樂園內)
特搜總編E2015-01-13 09:38:32
+ 追隨
舉報
恭喜!經過「SeeWide評審團」一致通過,你的發佈已被選為推薦攻略!你不但可以獲得200經驗值,更能累積200探險里數作為開展下次探險之旅的旅費!
回覆