兩日前Facebook被仿荔園的餐廳洗版, 今日放假沒理由不去懷一個舊吧!!

我問阿太:「我哋當年拍拖無去荔園影過相咩?」身邊有人很大反應:「97年呀!大哥,我哋都未識呀! 影咩相呀??」…(記錯咗同XXX…?? 死!!收聲為妙...)

來到恒豐後面的德興街「荔苑樂園餐廳」. 嘩!! 赫然發現人山人海, 餐廳門口水涉不通, 等待籌號不算多, 60張枱而已.

借了旁邊餐廳代客泊車的膠凳給囝坐, 店員說:「隨便坐, 小朋友點企到咁耐吖, 佢哋E幾日真係超多人呀, 之前麻辣媽媽嗰陣好鬼靜啦…」(哦! 原來如此)

終於不停與大門口的木馬, 大象拍照後, 又整幢恒豐中心逛完, 足足等了一個半小時, 我們有得食啦!! YEAH!!

收銀處掛個大「白箭」招牌, 真的學得很足, 我有衝動掟個5毫子入櫃枱裡面呢!!

我印象中當年的荔園…大象很臭, 做粵劇的戲院又一陣味, 連鬼屋也是充滿異味. 但這隻「龍船」究竟是過山車, 還是海盜船呢? 印象已很矇矓.

最記得在掟香口膠附近, 有幾塊真人等身大的哈哈鏡, 不知為甚麼小朋友看到一定笑, 我也不例外.

我問老闆Kenji為何會由麻辣媽媽變做荔園, 他說:「因為上年香港好唔開心, 我同拍檔都係70後, 忽然想回到細個開心嘅日子, 一諗就諗到荔園囉」

我想SY抱緊怪獸合照, 他答:「我好驚, 好恐佈, 我唔敢掂佢」事後我說想買牠回家放在廳, SY:「吓? 你唔好講笑啦, 咁我以後咁睇電視呀, 咁大隻, 又醜怪! 」(我說笑他又會當真呢?)

如果不是餐廳又「神像寶洞」的設立, 我真的以為恐龍屋就是當年荔園的鬼屋喎. 多謝餐廳為我重拾不少當年回憶.

今日餐廳有8張坐椅扮成當日迫迫狹狹的叮叮船, 當年有6-8艘船仔, 塞在一個如元氣壽司迴轉帶大細的水池內, 轉轉轉, 小朋友的我最記得要扮開心和爸爸媽媽揮手, 其實我印象一點也不好玩.

餐廳花了不少心思, 例如有加油站式的飲品, 每份餐版也以舊式相簿設計而成, 中間還在網上找來不少從前荔園的圖片!! (如果店內有電視播放當年有關荔園的任何報導, 一定更加煞食)

食物方面…Kenji說:「保留2成川菜, 不過人流太多, 唔好意思, 今日豬手, 餃子,  炒蜆, 蝦多士都賣晒」

結果他推薦我們「金沙蛋黃醬炒雞」~鹹蛋黃炒雞, 正如我一隻鹹蛋也可以餸一大碗白飯一樣, 這款餸一點也不會輸.

我們點了一款兒童餐給SY, 賣相一流, 但這位挑剔的小朋友吃剩了一半, 我嘗試幫他吃罷其餘部份…結果我還是提早點吃更吸引的甜品好了.

「天奴夢幻樂園」這個由顏色, 創意, 到上枱都絶對令人醒神的甜品.

中間由兩塊朱古力餅做餡, 店員會在大門口的雪糕機為你圍滿雪糕.

再返回廚房, 舖上粟米片, OREO, 奇異果, 橙肉, 甘大滋及爆谷, SY完全被燈塔內的兩粒乾冰所吸引.

單單食這個包裝已經值門票價, 下次大家去「荔苑」不妨先吃飽後, 9時半左右來點這個「天奴夢幻樂園」吧!! 又開心, 又可以集體回憶, 更可以免卻傷腦筋點菜的煩惱.

結帳時荔苑會給你每人一片「白箭」, 算是一個完滿的句號, 心思與創意無限, 真的不得不讚Kenji與拍檔Matthew.

Kenji說:「我們由麻辣改裝成荔苑己經一個月, 但報紙一出, 這三天才爆人龍, 今日也派出二百多張籌, 我哋都無諗過反應咁好呀!!」

(今晚場面墟冚得差點迫爆整條德興街呀)

對!! 阿太還聽到有女店員向Kenji說:「我對腳今朝起身酸痛到不得了, 梗係尋日攰得滯…」好的創意應該是會有好回報的, 希望荔苑的食物也可以同時進步吧!!

阿太問我今晚意見, 我告知回憶的感情無限大, 食物質素已不重要. 她大聲反駁:「感咩情遮, 又無得掟香口膠, 又無踫踫車, 又唔見邱德根, 你回咩憶…」

我也想餐廳有真鬼屋玩, 不過卻不願踫見邱主席喇, 唔該!!

味道: ★★

環境: ★★★★★

服務: ★★★★

抵食: ★

推介度(向同輩): ★★★★

推介度(向後生): ★★

大仁生活facebook

http://dayanlife.blogspot.hk/2015/01/9018.html