由於餐廳處於舊樓內，所以，由地下，以至走到門口，都睇唔出佢喺一間法國餐廳。不過，一內進環境就會截然不同，一室黑與白，樓底高，小巧水晶燈，富情調，氣氛果然夠浪漫，枱椅安排闊落，予人寧靜安舒，可以好好享受一頓飯嘅感覺，跟樓下喧嚷嘅銅鑼灣喺一個完全嘅抽離。

除咗環境夠氣氛，餐具擺設亦都一絲不苟，刀叉、湯匙，又外至內，整齊排列，又明顯大細之分，讓唔太熟餐桌禮儀嘅朋友亦唔會太大出錯。

意大利有汽礦泉水 $48、 意大利血橙果汁 $38

好多時，一啲高級餐廳都會晌枱上放樽礦泉水，當然喺需要付費啦。San Pellegrino意大利有汽礦泉水，嚟到依啲地方，喺需要見識吓，雖然話有氣，但又唔會好似梳打水咁多汽，晌每道菜之間飲一、兩啖可中和番個味蕾。

而另一枝細細樽嘅San Pellegrino意大利血橙果汁，若非因為「血橙」，$38的確覺得有點貴。色澤較一般橙汁略帶鮮紅，飲落橙味較清甜，感覺自然。

Pieroth Blue白酒

由於餐廳無申領酒牌，所以，無餐酒供應，但非常歡迎客人自携暢飲，絕無開瓶費。而小弟亦非好酒之徙，但席間跟店員晌飲食上有唔少交流，佢話好想請我試吓佢枝「私伙」，嚟自德國Pieroth Blue酒廠嘅白酒，既然盛意拳拳，我都唔客氣要一小杯。只有10.5%酒精度，加上清淡微甜，極之易入口，而且，冰涼而富果香，溫和嘅酸甜感，真喺幾好飲喎。佢仲話Nahe喺產區地，而隻酒搭白肉或海鮮就最啱，真喺又學到嘢！

店家無散點嘅餐牌，主要都喺主打6道菜嘅套餐，相定喺想有效控制成本及保持質素，套餐包括前菜、餐湯、第一道主菜、雪葩、第二道主菜及甜品，基本上，每一項類別都有兩款或以上嘅選擇，而定價介乎$598-$698之間，視乎所揀嘅第二道主菜而定。順帶一提，雖然有殷勤嘅招呼，但無加一服務費嘅要求。

麵包籃

麵包籃有小弟至愛之一意大利香草包（Focaccia）及百吉包，有微暖嘅麵包內軟而香脆。雖然店家有黑醋及橄欖油供應，但隨麵包籃附上嘅一小碟自家製茄子醬，絕對喺其貌不揚，茄子醬以茄子加入香料做成，頗有印度風味，唔可以講話好夾，但就有種破格嘅新鮮感。

煙鴨胸釀鴨肝醬，配千層酥皮，香芒白酒凍

前菜有兩個選擇：煙鴨胸或煙鵪鶉腿，既然我哋兩個人，最直接嘅選擇就喺各揀一款，兩款試晒。煙鴨胸比一般市面常見嘅現成貨較生，霎眼望落去仲以為煙肉，所以，主要食佢嘅原味；而下面一層鴨肝醬幾厚身，但入口很粉綿甘香，配以香脆嘅酥皮，再加上一丁粒香芒白酒凍，可緩和一下鴨胸、鴨肝醬嘅重口味。

煙吞拿魚，配青蘋果火箭菜，黑醋汁

原本餐牌上另一道前菜喺煙鵪鶉腿配柑橘果汁，但來貨質素麻麻，改咗煙吞拿魚，比起上一道前菜，依個前菜嚟得輕怡一啲，雖然啲煙吞拿魚本身有點鹹，但因為好似巴馬火腿切到好薄，配合埋清爽嘅青蘋果絲、甘苦新鮮嘅火箭菜及醇香嘅黑醋汁，的確很不俗，食完很有開胃嘅感覺。

法式龍蝦湯

龍蝦湯喺經典嘅法式餐湯，點可以錯過，亦喺我哋喜愛嘅湯款之一。深沉而橙紅嘅湯色，喺對辦嘅徵兆之一，呷一口，濃郁，蝦味重，質滑細膩，已經可以歸納晒對個湯嘅評價。若然，倒忌廉部份做好少少，拉點花紋，咁就連賣相都攞滿分！

牛肝菌野生蘑菇忌廉濃湯

今日真走運，野菌湯又喺我倆嘅心水湯品之一。事前，店員已說明過，佢哋嘅野菌忌廉濃湯注重個香味同質感，所以，比外邊所飲到嘅忌廉湯會杰身啲。果然，個濃湯有好多牛肝菌同蘑菇菌粒，極有咬口，入口非常之香，原來，店員話佢啲菌粒喺先炒過，亦無加松露油嚟提味，絕對出於牛肝菌嘅原味，值得一讚。

香煎鵝肝配砵酒燴葡萄

跟住落嚟喺Entrée，有人譯為小碟，小弟就鍾意譯佢為第一道主菜，因為以份量計，其實絕不少。香煎鵝肝經常會被作為前菜 / 頭盤，但作為第一道主菜，份量要有番咁上下，眼前嘅鵝肝真喺有手掌咁大，而且頗厚身，份量十足，我哋兩個一齊分嚐，就唔會太膩。鵝肝煎得香脆微焦，油潤內嫩，質感粉綿如入口即化嘅口感；下底嘅百吉包多士烘得脆脆，又滲入點點鵝油，配搭上砵酒燴葡萄，葡萄嘅酸味、淡淡嘅酒香，跟埋鵝肝一齊食，好和順。

岡根蘇拉藍紋芝士薯粿配火箭菜沙律

第一次接觸薯粿（Gnocchi）喺晌中環半山自動行人電梯近荷里活道專賣意粉嘅Pasta Mio，覺得依款「意大利薯波」幾特別。今次重遇，就簡單以加入岡根蘇拉藍紋芝士，薯粿口感十分煙韌，藍紋芝士好濃香，帶微微辛辣，咪睇佢細細份，其實薯粿頗飽肚。

蕃石榴雪葩

兩份第一道主菜都屬味濃之物，為迎接稍後嘅第二道主菜，除飲點有汽礦泉水清清味蕾之外，一小球蕃石榴雪葩作為間場就最好不過。雪葩嘅蕃石榴味好突出，感覺清新，入口好軟滑，又唔會太冰感，吃罷，完全清除晒之前嘅濃膩。

焗開心果碎鹿柳配野菜，黑醋燒汁

輪到分享主菜，是晚有4款選擇：美國極黑豬脊肉、鹿柳、深海海螫蝦及M9和牛，我哋揀咗同樣$660嘅鹿柳及海螫蝦，因為依兩款食材都甚少品嚐。被告知因為來貨質素問題，鹿柳改為鹿扒，我諗都無乜所謂。鹿扒裁得頗大件，沾滿開心果碎，焗得好香，鹿肉帶些甜味，不過，唔知喺咪件扒較大較厚，所以，有部份位置受熱較高，質感有少少韌，然而，黑醋燒汁及伴菜都好好食，伴菜嘅蕃茄好鮮甜。

香煎深海海螫蝦配辣肉腸菠菜意大利飯

嘩！估唔到個意大利飯賣相咁有睇頭，而隻深海海螫蝦喺咁大隻，原來唔單止好睇，亦都好食，蝦肉爽口鮮甜；而個意大利飯甚有咬口，但無硬心嘅情況，跟常見嘅意大利飯有少少分別，事後跟店主傾開，原來喺刻意煮軟少少，覺得較易受本地人接受。此外，飯內混入點點辣肉腸粒及菠菜，口感豐富咗，味道又多個層次，而個蕃茄汁又夠香濃細綿，真喺無點錯！

玫瑰茉莉花茶

仲以為主菜過後就喺甜品上場，原來，店員先奉上一杯清新嘅玫瑰茉莉花茶，花茶香氣清幽，茶味幽香，有種去膩消滯嘅感覺，如加點蜜糖，相信仲更加潤喉。

焦糖燉蛋

焦糖燉蛋、法式燉蛋都喺小弟喜愛嘅甜品之一，前者以煮好嘅焦糖，再加入蛋漿焗熟，後者則焗好蛋漿後，再灑沙糖用火槍燒成脆焦糖，兩者晌「焦糖」嘅做法好唔同，口感亦很不一樣。燉蛋很嫩滑，蛋味香甜，而焦糖沉厚甜蜜，焦糖跟燉蛋確然絕配。

冧酒啫喱，燒菠蘿伴椰子雪糕

另一款甜品唔喺好知叫咩名，不過，就以冧酒啫喱、燒菠蘿、椰子雪糕及烤花生碎所組成。墊底嘅冧酒啫喱清甜帶微微酒香，配上燒菠蘿，甜味突出，而椰子雪糕椰香清新，整體而言，有層次，口感有趣。

順帶一提，逢星期三有「生蠔夜」，額外6隻即開生蠔都只喺需要$188，即平均一隻三十零蚊，超划算，啱晒喜愛食蠔之人；此外，FB專頁讚好，又有5%折扣優惠，上網即讚啦！

事前餐廳已說明無任何時間嘅限制，全無打算做多幾輪生意嘅心態，所以，我哋食足幾個鐘，慢慢品嚐，慢慢細味，唔單止喺廚師嘅心機，仲有店家嘅誠意服務。

個人評分

味道：8/10
環境：8/10
服務：9/10
抵食：7/10
平均每人消費：HK$670

餐廳資料：
Amina² Cuisine
銅鑼灣富明街2-6號寶明大廈4樓J室
6222 9405