已有一段日子無嚟太子依區，今晚收工後同老婆嚟到RBTea食晚餐，事緣都喺朋友所贈嘅折扣劵，就快到期，用得唔好嘥啫。
格局、環境都一派台式茶室風，原木餐枱襯灰色 咕��梳化椅，感覺悠閒。而較特別喺餐廳一角有兩張「情侶」吊椅，話佢喺情侶位，皆因只喺雙人座，單向面窗，不過，由於配茶几枱仔，坐晌度飲嘢就幾好，食餐飯就有啲唔順手。
晌正門入口不遠處，靠牆一邊有唔少裝飾擺設，有陶瓷，有兔兔毛公仔……，多添一份溫馨嘅感覺。
細心睇睇餐牌，菜式卻不拘一格，有意粉，有薄餅，有炸雞，亦有咖喱菜式，此外，更有班戟、窩夫、吐司盒……等等甜品。然而，飲品就較偏向台式，有花茶、水果茶、珍珠奶茶之類。
除散點外，其實店家有提供晚市套餐，當中更有心想一試嘅意式蕃茄蝦意粉，包餐湯及餐飲，只喺餐飲竟得檸檬紅茶或綠茶選擇，或加$10轉珍珠奶茶，卻唔可以額外再加錢轉其他嘢飲，但小弟想試岩鹽焦糖牛奶咖啡，老婆則想試花茶，結果，最後都喺選擇散點。
![bowl]() 意式蕃茄蝦意粉 $72
個意粉做得有板有眼，前前後後，食到有7隻蝦，唔止鮮甜有蝦味，而且，估唔到幾爽口，而意粉有咬口，又充滿蕃茄香，加入咗少少水瓜柳、蒜片、芝士粉，味道提升不少。
![bowl]() 泰式紅咖喱雞肉配野菜薄餅 $68
6小份野菜薄餅跟一小煲泰式紅咖喱雞肉，咖喱的確幾香，不過質感就稍為稀，所以，唔多掛汁，而且頗辣，而咖喱內仲有雞心豆、茄子、薯仔，最唔鍾意喺啲雞肉沾過粉漿再炸嚟煮咖喱，浸到腍晒，食落有啲餬口；杷反，野菜薄餅主要喺啲野菌，仲要有好多菌，而啲薄餅超薄脆，夾埋一齊真喺好好食，只喺個咖喱唔太爭氣。
![bowl]() 蘋果甘菊綠茶 $35
精品現泡茶，一共有12款，款款都喺賣$35，以整壺即泡奉上，一壺夠斟兩杯。店員送上泡茶後，會囑咐一句，花茶要浸多一陣先至出味，不過，都喺仍有少少淡口，而味道甘甘哋，有少少蘋果香氣只喺源於啲洋甘菊。
![bowl]() 岩鹽焦糖牛奶咖啡 $38
濃醇咖啡系列共有4款，凍熱同價。小弟一向較喜歡飲牛奶咖啡，岩鹽加焦糖味，就更加好想試。咖啡無拉花，加咗顏色糖漿及焦糖漿，賣相有啲騎騎呢呢。雖然頗大杯，但無乜奶泡，唔太滑，只喺焦糖味幾香。
晌枱面落單、付款後，由店員將食物送上，無加一服務費，整體服務只可以講OK，好似唔知點解，壺花茶等咗好耐先送上，其實按我理解，都只喺放入花茶葉再加熱水啫！不落俗套，解作唔會抄襲陳舊嘅模式，RBTea似乎走台式路線，但又唔喺完全照抄，不過，無論食物定服務，仍有些微地方需要改善。
個人評分
味道：7/10
環境：7/10
服務：6/10
抵食：7/10
平均每人消費：HK$107
餐廳資料：
RBTea
太子彌敦道750號始創中心2樓232號舖
2625 1833
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
| 
