抱歉,發生點錯誤。
重新載入
2/3 Dolci:愛.是這樣甜
山區麵包王
2015-02-08
1091
0
分享
收藏
超忙碌嘅一、二月,雖然算唔上忙到抖唔到氣,不過,錯過咗很多跟朋友嘅飯聚,難得擠出一個周日下午,跟朋友晌又一城嘅2/3 Dolci小聚片刻,享受一頓悠閒下午茶。相比起中環店,又一城店環境更加舒適寬敞,因為店子位處商場兩層之間嘅中庭,對出一邊面向達之路全喺大型玻璃窗,冬日暖陽,份外暖和,亦令人精神倍添,充滿正能量。
一向都好欣賞2/3 Dolci嘅蛋糕,精緻小巧,配搭有心思。睇住排放得滿滿一列嘅餅櫃,五顏六色,單喺觀賞,都有種叫人開心嘅感覺。
剛啱遇著節日限定「情人節」系列,有兩款蛋糕,有兩款特飲,當然唔可以錯過,此外,加個蛋批作為前奏,就讓我哋心懷滿足。
早前晌Amina² Cuisine遇見過意大利San Pellegrino出品嘅血橙果汁,原來2/3 Dolci有更多選擇:Limonata(檸檬味)、Aranciata(橙味)、Mandarino(柑味)及Pompelmo(西柚味)。不過,因為會試佢個「情人節」系列特飲,所以,以上嘅果汁就無試喇。
bowlSpinach & Mushroom Quiche $38
是日所見,蛋批有兩款口味:Spinach & Mushroom($38)及Smoked Salmon($45),唔想食得太濃,所以,揀咗前者。蛋批烤烘得表面金黃,又有少少脆口感,而切開見到內裡有好多菠菜,食落又發覺有唔少蘑菇,蛋批挺實富蛋香。咪鬼睇佢好似細細個,食半件都已經覺得頗飽肚。
bowlTi Amo (Raspberry Tiramisu) $48
圓柱形一白一紅嘅Ti Amo,唔明佢嘅意大利名稱唔緊要,Raspberry Tiramisu大抵你都意會到個蛋糕會喺點。以紅桑莓蛋白雪芳蛋糕(紅色)跟馬卡風芝士(白色)層層相間,餅面再以吉士忌廉、心形白朱古力片及鮮紅桑莓作裝飾,外形亮麗搶眼。蛋白雪芳蛋糕口感輕盈,而紅桑莓味道香甜清新,而馬卡風芝士本身芝士味較淡,唔會太搶個莓味,但質感非常柔滑。但最有驚喜喺餅心正中間原來夾有一層薄薄嘅橙酒手指餅,果然,不負紅桑莓意大利芝士餅之名。
bowlAmore (Lychee & Rose Mousse Cake) $48
心形而鮮紅嘅外表,喺浪漫富愛意嘅表達,店員話:Amore就喺「愛」嘅意思。外表絕對睇唔出有咩乾坤,切開就見佢主要由慕絲而成,慕絲入口幼滑,突出嘅荔枝果香及玫瑰花味隨隨滲出,喺清甜與芳香嘅融合,非常合襯,而中間一小層偏白嘅原來喺意式奶凍,因為做得較薄,所以,食落好容易忽略佢嘅存在,反而,最下層嘅脆餅底卻無被遺忘。
bowlAurora (Lychee & Rose Tea Latte) $40/R, $44/L
兩款特備飲品,先試杯Aurora,同樣又喺荔枝跟玫瑰嘅組合。以奶茶作基礎,加入奶泡而成嘅Tea Latte,晌杯面灑下唔少食用玫瑰乾花,賣相已經有一定吸引力。入口算挺滑身,不過,茶底較淡,換嚟嘅喺荔枝跟玫瑰嘅香味,兩者香味倒算平衡。
bowlKisses (Hazelnut Chocolate with Marshmallow) $45/R, $47/L
簡單嚟講,佢就喺一杯榛子味嘅熱朱古力,但飲落質感好幼細,朱古力頗香濃,而且,榛子味絕無閃閃縮縮,一飲就飲得出,至於小小心形棉花糖,讓客人感覺更甜蜜。
bowlCaramel Coated Pistachio Florentine $26件
曾經試過嘅Florentine,今次同場加映,等朋友亦可以一試。巖巖巉巉嘅外表,喺將開心果粒沾勻焦糖,再以黑朱古力包實。朱古力味濃甘苦,而開心果粒脆口味濃,加上焦糖引發嘅甜蜜,再食,依然回味。
愉快嘅下午,就是這樣甜蜜地渡過,就算唔喺咩情人節限定,晌2/3 Dolci都仲有好多蛋糕可以讓人甜蜜地享受!

個人評分
味道:9/10
環境:9/10
服務:8/10
抵食:7/10
平均每人消費:HK$90

餐廳資料:
2/3 Dolci
九龍塘達之路80號又一城G層S1號舖
2156 2318


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
商店 2/3 Dolci (九龍塘店)