登龍街依家不知幾旺，除原有好幾間知名嘅拉麵店駐紮外，又有新拉麵店加入，此外，永光中心、金朝陽中心兩幢食廈，亦睇見唔少餐廳在此插旗，仲有其他大大小小地鋪餐廳，近幾年嘅變化真喺快得緊要。而Lab Made Café就位處金朝陽中心2期地鋪，對街一面就喺直接賣分子雪糕嘅鋪面，另一面商廈大堂，就喺以Café形式嘅鋪面，裝修跟早前去過嘅荃灣店同出一徹，都以黑色為主調，簡約時尚，店內有十多個座位，方便客人安坐慢慢品嚐。

由於銅鑼灣店同樣走Café路線，所以，分子雪糕以外，仲有飲品及蛋糕供稱，多款天然低卡生果汽水、咖啡、Valrhona熱朱古力及數款雪糕，近期適逢情人節，更推出「甜心」情人節蛋糕。

既然表姨甥對分子雪糕非常好奇，當然要先試為快。依期嘅4款口味包括：脆皮樂家杏仁糖、流沙奶黃包、玫瑰園及大吉大利，除後者賣$39外，其餘3款都喺賣$44！

流沙奶黃包 $44

好好奇喺咪真喺會有啲包包晌裡面，其實，我真喺諗多咗。淡黃色嘅「流沙奶黃包」口味，唔會真喺有啲包包粒，只喺味道上散發出強勁嘅吉士味，雪糕質感做得好軟滑。賣相就實在普通咗啲，心諗，如果晌雪糕上加叮啲鹹蛋黃粒，又或淋上鹹蛋吉士漿，唔知會唔會更能突出主題。

大吉大利 $39

好應節嘅一款口味，亦喺預期到嘅味道。造型化身成一「盆」小桔，別緻可愛，店員提醒塊綠葉喺威化做，可以食用，唔講我真喺以為唔食得，已準備棄埋一旁。味道喺清新嘅柑桔味，酸酸甜甜，而雪糕內更有點點柑桔皮，大吉大利，食完令人精神爽利呀。

如果今次有柑桔味嘅「大吉大利」，下年會唔會整款帶鹹嘅煎堆味「金銀滿屋」呢？表姨甥都喺嗜甜之人，所以，見餅櫃嘅蛋糕咁精緻，亦好想試一試。

烤白朱古力海鹽蛋糕 $38

一層又一層嘅蛋糕以海綿蛋糕、焦糖慕絲、白朱古力慕絲組成，結構清晰，餅面只以果仁碎及焦糖脆餅做裝飾，精簡唔造作。既焦糖，又白朱古力，都稍稍偏甜，但唔算甜得好厲害。入口慕絲軟滑，整體嗒落隱若又有少少鹹味，真喺幾有趣嘅一件蛋糕。

鮮奶咖啡 $31

因為我哋嚟得晚，註場咖啡師已收工，所以店員講明可能拉花做得無咁靚，咁我嚟喺飲咖啡又唔喺飲「拉花」，當然拉花做得靚睇見都會開心啲。雖然啲拉花圖案唔夠清晰銳利，擺動動作唔夠大，但沖得質素唔差喎，奶泡撞入啲咖啡撞得頗均勻，因為，晌無攪過之下，飲落嘅咖啡味道好一致，而且，亦唔使加糖已OK，只賣$31杯其實都幾抵飲。

朱古力咖啡 $34

表姨甥揀咗朱古力咖啡，因為，想朱古力、咖啡兩者兼得，的確，佢話兩者味道幾平衡，唔會話邊個搶邊個味道，醇香柔滑。

前後連續3個月都走咗去試分子雪糕，被表姨甥話我突然成為狂熱「分子」，我話都喺咁啱啫，況且，今次都喺帶佢去見識先順路走嚟試試。結果，佢都覺得啲雪糕有驚喜，仲話，出面唔少品牌雪糕店都一樣要幾十蚊杯雪糕啦，依度啲雪糕至少口味得意新奇，食得過癮嘛，值得再試！

個人評分
味道：8/10
環境：8/10
服務：8/10
抵食：7/10
平均每人消費：HK$93

餐廳資料：
Lab Made Cafe 分子雪糕專門店
銅鑼灣登龍街1號金朝陽中心2期地下B號舖
2670 0071