抱歉,發生點錯誤。
重新載入
多彩皇宮 Wonder Land Seafood Restaurant:一團和氣
山區麵包王
2015-02-16
1099
0
分享
收藏
原來再嚟多彩皇宮都已經事隔一年喇,對上一次嚟又喺做節食團年飯,今次都喺,不過,分別喺上年就同一大班親戚,筵開兩圍,而今次則只喺小弟原生家庭一家人5個咁大把,輕輕鬆鬆同老爸、細佬妹食番餐。
訂咗枱7:00pm,去到都未喺好多人,食食吓就已經全場爆滿,大廳尾仲間開被人搞宴席,中國人始終喜歡大時大節聚一聚高興吓。
跟往年一樣,團年飯梗有套餐供應,對照返舊年小弟個食評,估唔到多彩皇宮都幾慳皮,兩個套餐「團聚宴」及「鴻運宴」唔單止個名一樣,食嘅菜式都無改過,只喺價錢上調一下。
因為我哋揀週中食,唔喺旺日,唔使分兩輪。菜式上都仍有好多選擇,更有一系列新春好運小菜,不過,都只喺美其名好聽啲啫。但喺,睇一睇,有啲就未免夾硬嚟,好似蟹肉扒西蘭花,點都諗唔通點解會喺「運轉乾坤」,而欖香冰梅骨喺「意氣風發」……,哈哈,一笑置之。
bowl酸菜 $12
食中菜,餐前酸菜就喺慣例,其實我鍾意佢俾啲鹹酸菜、醃青瓜,總好過咁行貨嘅現成青豆、蠶豆。順帶一提,茗茶每位收$11,另收加一服務費,飲茶就喺多依啲雜費。
bowl金粟燴魚肚羹 $118
通常酒家都會有是日嘅老火例湯,既然無,就要一窩金粟燴魚肚羹。個羹做得金黃,蛋花又唔會太碎,又有好多魚肚,非常足料,最好就喺無加啲免治豬肉碎,出面有時會見到啲魚肚羹會加啲豬肉碎,頭頭尾尾足足分到7碗。
bowl掛爐燒鴨 $108
我屋企人食嘢無乜太多要求,所以,唔使食到燒鵝皇,掛爐燒鴨佢哋已經好OK。半隻燒鴨當然比例牌多好多,睇落頗大碟,肉質、味道一啲都唔比燒鵝差,一咬油香盡出。
bowl菠蘿生炒骨 $88
細妹心水,所以,點都要叫番一碟生炒骨。以骨排嚟做,所以,食落骨多肉少,而且有較多筋位,唯一好啲喺個粉漿唔太厚,個汁亦無話太嗆喉,味道、質素屬中庸而已。
bowl彩鳳翠花姿 $88
彩鳳就即喺指雞肉,而花姿就指墨魚,不過,唔知幾時用咗「花姿」咁靚嘅名代替咗「花枝」呢?花枝配雞肉炒翠玉瓜印象中較少見,不過,3款食材都啱我哋心水,簡單清炒,食時蘸點蠔油或蝦醬已經好足夠,尤其特別鍾意翠玉瓜嗰份爽脆口感。
bowl蟹肉扒西蘭花 $95
西蘭花又平又易處理,不過,經常用嚟做伴碟,今次就當主角,烚好淋上蛋白蟹肉茨,清淡美味,況且,蟹肉都落得唔少,西蘭花又翠綠清爽。
唔知何解,今晚道道菜都做得大碟,豈止八兩例牌嘅份量,味道又唔錯,連埋3碗白飯(@$12) ,埋單都只喺六百幾,認真抵食,始終覺得多彩皇宮都喺依區有啲地位嘅街坊菜館。一家人意見不合,「嗌霎」梗有,一到過年,點都要一團和氣,圍埋一齊食餐年夜飯嘅!

個人評分
味道:8/10
環境:7/10
服務:8/10
抵食:8/10
平均每人消費:HK$135

餐廳資料:
多彩皇宮 Wonder Land Seafood Restaurant
石硤尾南昌街美彩樓地下
2778 0622


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
商店 多彩皇宮 Wonder Land Seafood Restaurant