跟尖沙咀店比較，中環店裝修帶點復古典雅，並以原木木枱為主，部份牆身依舊有唔少馬賽克及手繪壁畫作裝飾，一邊落地大玻璃可以睇到中環夜景，不過，雖然景致唔叫得好正，但感覺開揚，相信日頭嚟享受吓春日陽光，心情都會開朗啲。而餐廳尾有兩張馬蹄形大梳化，亦成為餐廳焦點之一，此外，一列貨架有自家產品出售，如Novell咖啡粉、咖啡杯、小擺設，不妨睇睇有咩啱心水可以即時買走。

Sweet Deluxe $358

個套餐基本上喺兩個組合：包括鹹甜點嘅「酥點拼盤」及主打甜品嘅「甜之夢想曲」，仲跟兩款特色果茶或咖啡，單以份量而言，豈止二人份量，三至四個女生都夠食，尤其點果茶嘅話，一壺足夠兩個人享用啦！

酥點拼盤

酥點拼盤嘅組合有鹹有甜，但以鹹點居多，7款食物包括：玫瑰巴巴露絲、黑松露榛子拿破崙千層酥、蜜餞薑粒朱古力英式鬆餅、無花果窩夫、牛油果醬煙三文魚、西班牙黑毛豬火腿及鮮士多啤梨，賣相精緻雅麗，作為下午茶喺幾唔錯之選。由於喺二人份嘅關係，如果千層酥及鬆餅安排為各兩件份量，咁就最理想不過嘞。

賣相攞足分，味道又如何？

- 玫瑰巴巴露絲，究竟喺乜？查實喺玫瑰慕絲蛋糕，餅面亦以兩片糖玫瑰花瓣作裝飾，插晌蛋糕上嘅唧筒裝有玫瑰糖漿，味道幾幽香，慕絲亦都做得幼滑；
- 黑松露榛子拿破崙千層酥，黑松露味道好強勁，嚟得有少少霸道，千層酥未夠酥脆，個人覺得雖然放上原粒榛子的確夠晒好睇，不過，夾唔到一齊食，如果以榛子碎加入黑松露忌廉中，唔知效果又如何；
- 蜜餞薑粒朱古力英式鬆餅（配鮮忌廉），個鬆餅倒有啲驚喜，因為薑味突出，又滲出半點清甜，而鬆餅又唔太乾；
- 無花果窩夫，新鮮無花果夠香甜，窩夫亦都鬆脆，只喺略嫌兩者間嘅吉士太多；
- 牛油果醬煙三文魚，牛油果醬打得太稀，牛油果味好薄，夾煙三文魚唔喺好得我歡心啫；
- 西班牙黑毛豬火腿，雖然已經捲住啲九芽菜，但仍覺得頗鹹，唔介意老套啲，捲番條哈蜜瓜條應該平衡啲；
- 鮮士多啤梨，其實唔止鮮士多啤梨，仲有啲藍莓。

甜之夢想曲

跟酥點拼盤一樣，賣相先行，以香檳杯形盛載6款唔同口味嘅甜品，擺成一束鮮花形態，可以講得喺瑰麗登場，吸引唔少女生注視。6款甜品包括：石榴白朱古力慕絲、蘋果金寶、抹茶慕絲伴朱古力布朗尼、咖啡慕絲伴奧利朱古力、酒香白桃果凍及檸檬菠蘿粒粒。除咗靚，配搭更喺見心思。

- 石榴白朱古力慕絲，石榴慕絲嘅石榴味非常突出而清香，不過，就唔知白朱古力部份晌邊，面層都只喺鮮忌廉嚟；

- 蘋果金寶，喺法式紅酒梨嘅蘋果金寶版，蘋果沾上酒香，又混上唔少金寶碎，真喺有驚喜；
- 抹茶慕絲伴朱古力布朗尼，跟預期差不多，就即喺抹茶慕絲夾朱古力布朗尼，平穩而已；
- 咖啡慕絲伴奧利朱古力，咖啡慕絲既香且滑，放入原粒迷你奧利朱古力餅，底下亦有幾粒朱古力布朗尼，變得口感豐富咗；
- 酒香白桃果凍，雖然唔喺白桃，只喺用上蜜桃，但配合白酒做嘅果凍，冰涼好食；
- 檸檬菠蘿粒粒，其實喺菠蘿粒浸在香茅糖漿中，有淡淡香茅味，幾得意，不過，中文名稱有必要改一改，相反，英文名（lemon grass）又用啱喎。

招牌水果茶 $42（單點參考價）

Sweet Deluxe套餐包兩款飲品，招牌水果茶以透明玻璃壺上枱，最欣賞佢壺咀有個「隔」，可隔住啲水果唔會倒出嚟。向朋友討一小杯試試，茶底喺茉莉花茶，茶香幽幽，不過水果只有紅蘋果、青蘋果及火龍果，果味較淡。

鮮奶咖啡 $36（單點參考價）

多組心形拉花，圖案細膩，斟到滿滿而一滴都無瀉，拉花嘅「收尾」對準杯身餐廳嘅標誌，足見專業。咖啡入口醇香細滑，平衡且帶有微甘餘韻，好睇又好飲。

伯爵茶瑪奇朵 $38

其中一位友人好奇之下試了一杯伯爵茶瑪奇朵，佢話冰凍嘅伯爵茶溝勻奶泡之後，感覺幾特別，口感好幼滑，又唔喺港式奶茶嗰種，而茶味較為芳香，唔太濃。

作為晚餐嘅正餐，只食個Sweet Deluxe當然無可能夠啦，我哋本身仲食咗幾樣嘢，不過，既然第一次到中環店，睇落印象上又好似跟尖沙咀店唔同，所以，都略略介紹吓個餐牌。湖水藍嘅餐牌，大嘅喺主餐牌，細嘅喺飲品餐牌。

打開主餐牌一眼睇晒，唔使揭嚟揭去，分為Tapas、Mains、Asian Delight、Sweet Talkin’、Waffle及Moffles。據知Asian Delight及Moffles都喺新加入嘅款式，而Moffles都好似幾特別，喺麻糬（Mochi）加窩夫（Waffle）嘅配對，雖然今次因為個「甜之夢想曲」香檳杯甜品而無試，有機會都想試試喺點。

飲品餐牌方面，對照番之前個食評，跟尖沙咀店應該無分別，都喺分為Tea Time!、Fruity Tea、Espuccino、Café Everyday及Macchiato Macizo。

黑白芝麻吞拿魚卷 $98

吞拿魚仍然保持刺身狀態，只喺外層輕輕煎封過，再沾滿黑白芝麻，所以，食落既有魚鮮味，口感嫩滑無渣，又有芝麻香氣，互相融和，作為餐前冷盤喺一個開胃前奏。

傳統西班牙奄列 $68

上次試過佢哋嘅西班牙火腿菠菜奄列，今次試個清減版，一切開蛋漿湧流，煎蛋餅皮薄薄一層清晰可見，內裡填滿不少洋葱，豐富好味一口蛋香，簡單都可以做得好好味。

麻辣香腸薄餅 $ 108

既然Asian Delight喺新款式，一口氣連試兩款「亞洲風味」。見唔少人點依款麻辣香腸薄餅，小弟都想好奇一試，以薄批為餅底，口感有半點似餅乾，配以香濃鮮活嘅蕃茄醬及軟綿絲絲嘅莫沙里拉芝士，而主角喺帶有麻辣嘅香腸，咪講笑，個辣度真喺有番咁上下，而食落就覺得連個醬汁底都加入咗辛辣嘅元素，都算幾特別，喺有種越食越鹹嘅感覺。

馬來喇沙湯海鮮米線 $98

而另一款「亞洲風味」喺馬來喇沙湯海鮮米線，嘩，碗喇沙米線非常大碗，3-4個人分享都絕無問題，而且，好足料，有青口、魚餅、鮮蝦，都幾新鮮，特別鍾意啲魚餅，爽口魚味濃；橙黃色嘅喇沙湯睇嚟幾對辦，但個人嚟講辣得嚟卻喺未夠香，整體而言，仍有進步空間。

題外話講講，雖然個「Sweet Deluxe」要星期六、日供應，不過，後尾發現當中嘅「甜之夢想曲」晌平日2:30pm後已經有供應，每份賣$198，但每日限量供應，預訂就最穩陣。所以，計落要晒成個套餐就最抵，俾多$160，就多一份「酥點拼盤」及兩款飲品。

到酒樓飲夜茶都唔喺咩特別之事，但晌晚間嚟食高茶，就真喺第一次。

個人評分
味道：7/10
環境：8/10
服務：8/10
抵食：7/10
平均每人消費：HK$210

餐廳資料：
Espuma
中環威靈頓街2-8號威靈頓廣場M88 17樓
2973 6088