抱歉,發生點錯誤。
重新載入
119 Korea Station:邪惡韓流鐵鏟
山區麵包王
2015-04-03
1797
1
分享
收藏
成日話人大鄉里,即喺未見過世面,其實我依等都喺港燦大鄉里,晌香港好多地方都未去過,所以,又趁公眾假,同幾個朋友走咗入南生圍行吓,因為依家有西鐵,我哋入新界西超方便,仲順道逛埋錦上路跳蚤市場。
遊完南生圍,再步行走入元朗市中心食晚飯。一早已有目標,喺晌早前雜誌見過嘅一間新潮嘅韓國餐廳「119 Korea Station」。嘩,撞鬼吖,我哋5:45到達,已見人排晒隊,好彩人龍都未算長,等多一陣已開始派籌,6:00就安排入座,一切都頗快頗順利。
除近門口喺一列卡位外,裡面仲有適合唔同人數嘅圓枱,方枱及小量8人橢圓形長枱。不過,如果唔介意搭枱嘅話,會有機會快啲入座,就好似當晚見到兩組三人行,搭枱坐埋一張8人枱咁。
店名帶有119字樣,喺緊急電話之意,所以,除見到水泥地、電油桶櫈等韓流裝潢之外,仲有一啲消防喉、防火衫、斧頭等等救急裝置,以配合店名之意。
先嚟飲品,見枱枱都點嘅Cider Rita($38),夠豪氣,我哋都要試吓,仲點齊3款(桑莓、豐梨、柚子)。不過,講真,樽Cider晌杯口「瑯瑯吓」,感覺有啲「牙煙」,成日都驚撞跌打瀉,但又奇,成晚都無見人出過事,可能大家越驚越小心。味道喺點?支汽水有少少似檸七味,全無酒精成份,再溝少少桑莓漿 / 豐梨汁 / 柚子蜜,帶點甜,但因份量唔多,飲到尾就變成齋檸七。另外仲有一款叫Dry B Rita($48),就將Cider以啤酒代替,鍾意飲吓啤酒嘅人就不妨試吓。
 Cider Rita(桑莓)
 Cider Rita(豐梨)
Cider Rita(柚子)
老婆就一向比我講健康,所以,佢只要一罐韓國原粒提子汁($19),個樣好面善,咪就喺之前晌荃灣BBQ Military試過。原粒提子汁罐佈有少少果肉,感覺天然,味道清爽。
食物款式,一張點菜紙,底面兩版睇晒,有前菜,主菜,飲品,及主打嘅鐵鏟系列,定價都唔算貴,大部份菜式五、六、七十已有交易。可能菜式唔算太多,同埋有幾樣嘢喺大多數人必點,變得較集中,所以,上菜頗快,我哋啲嘢飲嚟咗無耐,沙律,冷盤已送到嚟。
枱上已放有筷子、匙羹及鉸剪,有多份刀叉就更好喇,後尾發覺,好似個水冷豐梨,有刀叉就好切啲。
bowl隊長沙律 $58
個沙律除咗有沙律菜、車厘茄、烚蛋,仲有唔少藍莓,個汁醬紫紫紅紅色,睇落就唔喺咁好睇,不過,味道幾清爽,帶種甜甜酸酸嘅味道,事後問番店員喺個咩汁嚟,原來用咗鮮藍莓打汁,再溝紅酒醋做,又幾特別喎。
bowl水冷豐梨巴馬火腿 $58
冷盤中,以依個水冷豐梨感覺最特別,外觀亦做得的骰別緻,原個豐梨冷凍去皮,淋上糖漿後再捲一片巴馬火腿上頂。將豐梨切開,你會見到啲糖漿已滲入梨肉中,梨肉質感實淨,充滿蜜糖味,一口過火腿連梨肉一齊食,鹹鹹甜甜又幾過癮,嫌未夠甜蜜,其實碗底仲有好多糖漿。不過,依道菜唔喺人人喜歡,好似有朋友就覺得無咩特別,糖漿豐梨而已。
bowl私制泡菜 $28
一般韓國菜館餐前都會提供唔少免費冷盤小碟,如芽菜、泡菜,不過119就無依支歌仔,想食泡菜就要點一客「私制泡菜」,泡菜以一個迷你「米缸」盛載,有特色。色澤鮮紅,辣度強勁辛香,口感爽脆,真喺落足功夫,朋友都好欣賞佢啲泡菜。
bowl真露煮蜆 $68
西餐有白酒煮蜆,日本菜有清酒煮蜆,嚟到韓國菜,真露煮蜆又何妨。首先,蜆隻夠大,肉厚肥大,入口鮮甜而帶淡淡酒味,再者,吐晒沙,非常好食;至於個「湯底」亦都唔好錯過,因為清甜富酒香,酒精度唔高,易入口,所以,喺我哋大家一致嘅推介。
bowl燒濟洲鯖魚 $88
平時晌家中都有買啲鯖魚齋煎,不過,今次嚐到嘅鯖魚就比較大條,煎得皮帶點脆,肉質方面又唔算得好嫩滑,但亦都唔差。因為條魚已經調過味,淨食啱啱好,想清新少少可以唧點檸檬汁,相反,再沾碟邊嘅韓國麵豉醬就覺得有啲過鹹嘞。
bowl鐵鏟芝梨炸雞 $128(半份) / $198(全份)
「鐵鏟」真喺名副其實,成個盛器就喺鐵鏟咁形,猶如鐵板燒。我哋要嘅喺半份份量,個鐵鏟芝梨炸雞除有韓式炸雞外,墊底有蕃薯蓉,一盆芝士白汁,再噴上一大抹忌廉,喺咪睇見都流口水呢?炸雞做得脆嫩,再蘸滿芝士白汁,沾一小撮忌廉,真喺「芝」味享受,而底下嘅蕃薯蓉亦都好食,既甜且粉,值得推介。
bowl鐵鏟芝士排骨 $128(半份) / $198(全份)
同樣要半份就夠喇,有別上面個炸雞,鐵鏟芝士排骨啲芝士喺「生」嘅,送到上枱時盆底喺清晰可見一粒粒車打及莫沙里拉芝士碎,要開爐熱溶啲芝士,再捲住啲排骨食,一於熱住食。
不過,捲芝士依吓嘢真喺唔易,最好搵店員代勞,佢哋樂於幫忙,但睇佢捲幾次之後,大概掌握到,小弟試捲一次都OK喎,自已捲勝在可以控制芝士份量。啲排骨本身已醃煮過,淨食都好味,捲埋啲芝士,真喺濃香到不得了,好芝士嘅朋友一定好滿足。
雖然今餐平均消費要$190,其實,我哋點多咗少少嘢,鐵鏟系列可以要一個都夠晒,而Cider Rita亦可兩個女生共享一杯,因為一杯份量真喺頗大,一個女生未必飲得晒一杯,故此,一般嚟講,應該$150一個人可以落樓。

我哋嚟得早,亦食得唔耐,所以離開時都喺7:30pm未夠,仲喺晚飯高峰時段,故仍見門口成堆人晌度等位,真喺估唔到間嘢咁旺場。 因為上菜快,啲人又食得快,所以翻枱都幾快,就算等位估計唔會太耐!
個人評分
味道:8/10
環境:7/10
服務:8/10
抵食:8/10
平均每人消費:HK$190

餐廳資料:
119 Korea Station
元朗西菁街9號富盛大廈地下95-100號舖
3565 6911


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
商店 119 韓國站 (元朗店)
特搜總編E2015-04-16 18:11:43
+ 追隨
舉報
恭喜!經過「SeeWide評審團」一致通過,你的發佈已被選為推薦攻略!你不但可以獲得200經驗值,更能累積200探險里數作為開展下次探險之旅的旅費!
回覆