搞咗半粒鐘，海鮮就買好晒，一共買咗9樣海鮮，單價如下。不過，小弟唔喺好鐘意啲海鮮唔標價，下下要問，標明價啲客睇啱咪買囉，唔使下下問佢哋，咪可以煩少啲。

花螺 $96/斤
大蟶子 $140/斤
大瀨尿蝦皇 $200/斤
厚肉紅鬼蝦 $380/斤
桶蠔 $160（大杯）/ $80（細杯）
象拔蚌 $360/斤
印尼龍蝦 $480/斤
大扇貝 $68/斤
澳洲鮑魚 $260/斤
夾夾埋埋足足23斤嘢，合共$5,180，最貴喺隻龍蝦，3斤幾，成千幾蚊隻，事後我哋都覺得唔划算。

揀好海鮮，拎去興記代煮，上年嚟代煮海鮮油料費收$52斤，依家已經收$58斤，足足加咗近12%，所以，我哋23斤海鮮，淨喺油料費都成$1,334，故此，點都唔好白灼咁老襯，煮法揀啲複雜啲，至少心理上都覺得抵啲，哈哈！

今次被安排坐晌近門口，出入人來人往，無上次坐到六角亭最入咁好。因為喺星期六晚關係，分咗兩輪時段，雖然我哋6:00pm就到，都已經有唔少客等「開飯」，過多一陣已座無虛席。順道講少少服務，OK啦，唔算好，亦唔算差。

啲海鮮洗洗切切有排搞，所以，我哋預先訂定隻燒鵝，可以食住等。對比番舊年個食評，燒鵝又喺加咗價，加幅10-20%，一啲都唔溫和，舊價喺$100/例牌、$200/半隻、$400/一隻，而新價就$120/例牌、$220/半隻、$440/一隻。

馳名燒鵝 $440

燒鵝即燒，所以送到嚟一股香氣，燒得油亮富光澤，入口微暖，外皮油潤香脆，肉質甘香鬆化，比上次好食。

辣酒煮花螺

花螺跟辣酒煮，就有種必然食法嘅關係，其實花螺有唔少食法:白灼，紫蘇爆炒，醬爆或鹽焗都得。啲花螺辣而有酒香，但肉質就差少少，唔夠爽，唔知喺花螺本身嘅質素定煮得過火。

豉椒炒蟶子

大蟶子買咗一紮就可以炒出滿滿一大碟，蟶子肥大肉厚，爽口彈牙，豉椒惹味十足，香辣兼備！

椒鹽瀨尿蝦

泰國嚟嘅瀨尿蝦皇，身形有番咁上下大，所以賣到$200/斤。一人一隻，點明原隻炒，免切，咁先食得夠爽。拆殼後，大啖大啖入口，爽口而香辣，少少鹹味吊起，一流。

油泡紅鬼蝦

鮮蝦嘅種類好多，食得豪氣嘅有虎蝦，不過今次邂逅紅鬼蝦，亦都印象難忘。問店員，紅鬼蝦晌中國水域捕捉，佢無虎蝦咁出身，但就好肥大厚肉，唔喺浪得虛名，一招油泡，蝦鮮味盡出，蝦肉彈牙到不得了，而且，有唔少甘腴嘅蝦膏。

薑蔥煀美國桶蠔

上次個砵酒焗美國桶蠔，做得麻麻，煮完之後縮晒水，又無砵酒香。今次改一改，薑蔥煀，兼且加大份量，一份大加一份細，夠晒我哋13個死佬食。啲桶蠔好飽滿，又有蠔味，朕朕薑蔥清香，真喺好食好多。

象拔蚌刺身

要咗一條大嘅象拔蚌，學上次咁，一蚌兩食，先嚟一份刺身，感覺好似細份過上次，不過，今次處理我好啲，蚌身切得大塊而薄，所以入口較有爽脆嘅口感，灑點檸汁，再蘸點日式芥末，更能品嚐到當中海水嘅鹹鮮。

椒鹽象拔蚌膽

至於個膽，就試一試椒鹽做，以粉漿炸後再椒鹽炒，不過，唔多好食，一來椒鹽做得唔夠香唔惹味，二來粉漿腍，個蚌膽口感比較韌。反而，上次白灼象拔蚌膽有點驚喜。

印尼龍蝦刺身

龍蝦同樣做個兩食，先上第一食喺刺身，臨尾再上個龍蝦粥。依碟龍蝦刺身夠晒貴，成本成千銀一碟，可能因為貴，所以特別有期望。單講刺身個味道，啲龍蝦確實鮮甜無比，不過，賣相方面，落晌興記手中，真喺有啲嘥料，切得巖巉之餘，亦厚薄不均，隨意鋪晌碟上，毫無美感，如果落晌日本師傅手中，相信一定喺另一番景象。

蒜蓉蒸扇貝

蒜蓉蒸，較少出錯嘅做法，大量粉絲加大量蒜蓉，做法簡單直接。扇貝厚肉挺實，蒜香突出，就連粉絲都好味啲。

果皮蒸澳洲鮑魚

上次試過好食，當然要翻兜多一次，豪番晚當然要一人一隻鮑魚。澳洲鮑魚以果皮及蔥絲清蒸，再淋上少少豉油，值得以刀叉嚟享受。鮑魚鮮味十足，滲出淡淡果皮香，入口口感煙韌中有份爽彈，的確回味。

除海鮮加工，興記本身都有唔少小炒，食咁多海鮮，近尾聲梗喺點兩道菜平衡一下啦。炒菜例牌嘅份量一般60、70蚊碟，我哋咁多人，當然要中份先夠食啦，中份就即喺例牌嘅一倍份量，價錢就自動乘二。

椒絲腐乳炒通菜 $120

雖然食菜，都先點一客惹味啲嘅炒通菜，好有大牌檔風味，通菜都尚算脆嫩，腐乳又寧舍入味。

蒜蓉炒西芹 $120

另一道炒西芹，西芹入口非常爽脆，帶濃濃蒜香。但老實講，如閣下無必要一定食菜，當然唔建議晌度食啦，百幾蚊碟炒菜喎，雖然包人工、鋪租，諗嚟諗去心理上都喺覺得唔抵囉！況且，你睇我哋碟西芹（中份）都唔喺好大碟咋。

龍蝦粥

上次單尾要個韮王豉油皇炒麵，今次因為買咗 龍蝦，所以，順利成章點咗個 龍蝦粥，加個粥底要另收多$100，感覺都幾唔平。好食都無所謂，不過，小弟就覺得麻麻哋，主因喺兩者好分離，粥底喺綿香嘅，但就無鮮味，粥還粥， 龍蝦 還龍蝦。

餘興就喺切蛋糕，阿Brown（朱古力紅桑子慕絲蛋糕）就襯晒我哋一班死佬，做人迤吓迤吓，順道賀一賀近幾個月份生日嘅老友。晌興記切蛋糕，喺要收$30切餅費，主要喺佢俾啲碟同膠叉你用，$30都好濕碎啫。

成晚食咗14道菜，大家飽到上心口。除油料費，茶位、醬料每位收$10，星期六、日、公眾假期嘅晚市要收加一，計埋燒鵝、炒菜、汽水及切餅費，晌興記埋單盛惠$2,692（註：佢張單都寫得好求其，有堆細數佢無列出嚟，我哋又無記低飲咗幾多罐汽水，都喺大概覺得合理就算），計埋發記買海鮮料使咗$5,180，是晚消費用咗$7,872，平均每人六百多啲啲。

因為龍蝦兩食都做得麻麻，如果無要隻龍蝦，大家可以慳番百幾蚊，每人落樓唔使五嚿水！

個人評分
味道：7/10
環境：7/10
服務：6/10
抵食：6/10
平均每人消費：HK$605

餐廳資料：
興記 Hing Kee
屯門三聖村熟食亭地下2號舖
2458 8637