抱歉,發生點錯誤。
重新載入
元気寿司 Genki Sushi:好氣連場
山區麵包王
2015-05-30
2017
0
分享
收藏
元氣壽司紮根香港多年,唔需要多作介紹,而分店亦遍佈港九新界,又點解會無啦啦坎到入嚟東涌分店食晏呢?事緣老婆嘅朋友邀請,山長水遠入去貝澳摸蜆,亦喺平生第一次,玩咗成個晏晝,浸晌海灘中唔停咁起勢刮,但又唔算好辛苦喎,咁當然事前要食飽少少先至有氣有力。就一於揀元氣壽司食番餐,再入去摸蜆,又食又玩,好戲連場!
對於我等九龍人,東涌喺個非常隔涉嘅地方,咪以為人少少,一到星期六、日、公眾假,逼晌巴士站等車嘅人喺人山人海。有上昂平,有入大澳,就連依間元氣壽司都爆晒棚。以迴轉壽司嚟講,元氣算喺頗成功,至少見有咁多分店,又有咁多人幫襯,衰極有個譜。揀位方面,我哋都喺喜歡坐迴轉位,不過,人多就當然坐卡位好啲,方便傾偈嘛。
雖然坐咗晌迴轉位,但未必樣樣嘢都有,所以,都會晌餐牌度揀啲款式直接落單。翻閱餐牌一轉,不外乎刺身、壽司、軍艦、手卷、卷物……等等,將個餐牌上載埋等大家有個參考。
收費方面,除餐牌列明所有價目外,迴轉帶上嘅色碟亦代表唔同價錢,由$10-$40。
自助沖綠茶依啲坐迴轉位嘅指定動作,大家都識,趁未有壽司食,小弟都鍾意淨食啲酸薑片,少少辣,少少酸,開開胃胃。
bowl蟹籽沙律 $36
青瓜、蟹柳,再加大量蟹籽,冰涼酸爽嘅沙律,清新好食。 
bowl青瓜卷 $12 / 客
店內嘅卷物有唔少款式,先試當中嘅唯一「素」卷。老婆近來多咗食素,所以,專登點咗依一款清爽小卷,細細件,一啖一件,喺好基本嘅卷物。
bowl玉子壽司 $12 / 2件
雞蛋唔喺咩貴價嘢,但一樣可以做得好好食,眼前嘅玉子壽司,軟綿有蛋香,又帶點甜,平均$6件,你仲想點?
另外,晌餐牌中一次過點咗幾款壽司同卷物,包括:汁燒油甘魚壽司、炙燒辛辣三文魚腩壽司、加州小卷及牛油果軟殼蟹卷,等十來分鐘就送上。
bowl汁燒油甘魚壽司 $12 / 件
油甘魚先以汁燒處理,再做壽司,吳啲炸蒜片、蔥絲,雖然話喺新產品,但個人覺得一般,可能缺乏個性。
bowl炙燒辛辣三文魚腩壽司 $10 / 件
味道較突出,因為既有三文魚腩嘅油潤,而貌似XO醬嘅辛辣醬汁又唔喺好辣,但就惹味得嚟吊出魚鮮味。
bowl加州小卷 $20 / 客
一客有4件小卷,做得唔差,包住青瓜、蟹柳,捲得夠實淨,但又無死死實實嘅感覺,最鍾意仍層沾滿粒粒蟹籽嘛。

bowl牛油果軟殼蟹卷 $20 / 客
一客只有兩件,但體積比小卷大好多,牛油果跟軟殼蟹都喺老婆嘅「飛弗」,可惜,做得「求其」,還幸味道唔差。
bowl波士頓卷 $18 / 客
一客3件,同樣以反卷形式去做,但外層就沾滿紫菜粉,內裡則捲住青瓜、水牛芝士同三文魚,口感有層次,有軟有爽,幾好食喎。
bowl吞拿魚手卷 $18 / 件
珍珠米煮得夠黏糯,又有米香,紫菜更喺脆到嚓嚓聲,然而,兩嚿吞拿魚鮮味度只喺不過不失咁啦。
元氣嘅水準,高又唔算好高,差又唔喺,屬中上平穩,而且定價頗為實惠,故始終都大有捧場客。上文講開去貝澳摸蜆,兩公婆最後撈咗唔少,收獲唔錯,有成一大盤,要養佢一日,吐晒沙後就以豆豉蒜蓉炒,正呀!
我哋會唔會再去摸蜆?異口同聲話無謂喇,唔喺怕辛苦,而喺一來唔算話好大興趣,二來真喺好花時間,今次叫做體驗過吓就算。

個人評分
味道:7/10
環境:7/10
服務:7/10
抵食:8/10
平均每人消費:HK$95

餐廳資料:
元気寿司 Genki Sushi
東涌東堤灣畔3座地下25號鋪
2459 5368


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~