抱歉,發生點錯誤。
重新載入
Knockbox Coffee Company:千變萬化嘅咖啡寶盒
山區麵包王
2015-06-21
1669
1
分享
收藏
表姨甥女喺咖啡迷,有嘢搵我傾,順便食個下午茶,就佢出旺角,所以,揀咗Knockbox,因為好友推介過佢嘅咖啡。
估唔到過咗食晏時間無耐,才兩點幾,已經坐滿人,嚟得嘆咖啡嘅都喺唔着急人,幾驚等得耐,幸而遇着吧位有人走,等唔夠5分鐘就有位。
整個環境充滿悠閒氣息,店內擺放好多跟咖啡相關嘅用品及擺設,牆上嘅相都喺一幅幅反映一粒粒咖啡豆出產嘅故事。
選上坐晌吧位確喺最正確嘅事,因為,可以睇到更多咖啡機嘅同時,更可以望住咖啡師晌度沖咖啡。
由於小店唔止得咖啡、熱茶,新增嘅更加啲夏日特飲,此外,仲有沙律、三文治、烘焙包點、少量熱食,以及兩款甜點同獨家大賣嘅「咖啡豆窩夫」,所以,早午晚下午茶嚟食都可以當到一餐。
先嚟一份沙律,清新一下大家嘅味蕾,其實店中嘅沙律只有一款。
bowl煙三文魚沙律配意大利陳年葡萄醋 + 巴馬臣芝士 + 蕎麥包 $58
賣相幾好睇,三文魚捲成花狀,可惜,無蕎麥包,只得方包,失望就總有少少。方包已塗上少少橄欖油,再沾啲黑醋,啲醋幾醇香,淨食簡單味美;將方包夾雜啲三文魚加沙律菜一齊食又得,不過沙律菜嘅新鮮度差咗少少;巴馬臣芝士搭沙律菜配方包都得,個沙律食法其實可以好多變。
飲品,雖然友人話佢哋主打賣冰滴、虹吸、愛樂壓、過濾等手工沖調咖啡,小弟自問未夠功力去欣賞,都喺鍾情意式鮮奶咖啡,而表姨甥女本想都要一杯咖啡,但見到一系列「稀式意式濃縮咖啡」就改變心意,要一杯雪糕咖啡(Affogato)試試。
bowl意式鮮奶咖啡 Latte $38
先講吓外觀吖,拉花嘅花紋算幾細緻,不過,有啲唔對稱,醇香度十足,但口感未夠均勻,飲落去覺得奶泡撞落啲濃縮咖啡時有啲唔夠「勻巡」。
bowl雪糕咖啡 Affogato $43
兩球雲呢嗱雪糕再倒入意式濃縮咖啡,個人鍾意食法分三層,第一雪糕沾濃縮咖啡,第二層等雪糕半溶,搞一搞先飲,有種鮮奶咖啡嘅口感,第三層喺等飲剩少許濃縮咖啡,再拌勻剩下嗰半份雪糕,就好似飲緊奶昔咁,真過癮。
晌大家嘆咖啡之時,之前所點嘅咖啡豆窩夫亦隨之送上,咖啡豆窩夫共有3款選擇(Tropical Bomb、Citrus Delight、Cookie & Cream),主要夾唔同嘅生果、雪糕及沾醬。
bowl咖啡豆窩夫(Citrus Delight) $60
咖啡豆窩夫果然造型獨特,每粒窩夫烘到啡黃,就如同變大百倍嘅咖啡豆一樣,超神似。整碟窩夫伴有香蕉、藍莓、雲呢嗱雪糕及兩款沾醬(蜜糖及意式濃縮咖啡),賣相美觀富特色。
從餐牌見,講到窩夫加入清新嘅檸檬及苦澀嘅果皮,依樣就真喺唔多覺,不過,咖啡豆窩夫真喺好得意,成粒咖啡豆咁樣,入口軟軟綿綿,有種食雞蛋仔嘅感覺,但就實心啲;將窩夫浸潤晌蜜糖後,再沾滿濃縮咖啡,伴少少忌廉,味道的確幾特別,當然,個窩夫你想點食法就點食法,搭蜜糖+雪糕、搭濃縮咖啡+雪糕、搭蜜糖+香蕉……想點就點,實在好似做味覺實驗咁好玩。唯一挑剔喺啲香蕉未夠熟,有啲青味!
以個人觀感,杯意式鮮奶咖啡雖然有點點瑕疵,但其他食物同飲品,都非常稱心滿意,值得推介嘅「咖啡寶盒」。

個人評分
味道:8/10
環境:8/10
服務:8/10
抵食:8/10
平均每人消費:HK$100

餐廳資料:
Knockbox Coffee Company
旺角黑布街21號地下
聯絡欠奉


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
商店 Knockbox Coffee (旺角分店)
特搜總編E2015-06-30 18:23:28
+ 追隨
舉報
恭喜!經過「SeeWide評審團」一致通過,你的發佈已被選為推薦攻略!你不但可以獲得200經驗值,更能累積200探險里數作為開展下次探險之旅的旅費!
回覆