1 JULY 2015(WED)

趁今日放假天氣又咁好，當然要去沙灘玩一轉，同陽光玩下遊戲，咁先叫做迎接夏天嘛~

我地近近地去左清水灣沙灘玩一轉，不過亦都因為天氣太好，所以停車場爆晒，我地等左大半個鐘都係冇位。最後老公就提意我帶小小豬去玩住先，佢自己一個人等位，唔好悶親小小豬咁話(真係一名超級廿四孝爸爸)。

就係咁我就左右手都一大袋咁，帶住小小豬落沙灘玩啦！

原來今日真係勁多人，我倆好唔容易先搵到個位置嚟做我地嘅基地呀~

原本都打算等埋老公嚟先落水玩，不過依隻心急豬等唔切啦，要去玩水啦，一落到水就已經開心到不得了~

玩左一輪之後，我地就返去休息下，食下一早準備嘅西瓜消消暑~

正當我地食完西瓜休息過後，老公終於泊好車嚟到(佢都等左大約一個半鐘先有位，真係驚人呀)！

一見到DADDY，依個小小豬又捉住要落水玩啦。今次有DADDY拖住，可以行出啲，應該係話...越行越出，真大膽呀~

依隻豬真係好ENJOY哦~

玩玩下見到有大哥哥玩緊小船，依兩個唔怕羞嘅父子問哥哥借嚟玩呀！見小小豬玩得咁開心，一個愛豬如命嘅DADDY話搵機會買隻俾小小豬，等佢下次有得玩呀(OH...NO....咁大隻屋企邊有位擺呀....講下好啦)~

玩完船仔繼續玩，仲要用水泡又扮小船~

最後仲大膽到唔要水泡自己行出去，真係睇到我都驚驚地，不停叫返佢番嚟呀~

唔覺唔覺我地都係沙灘玩左三個幾鐘，如果唔係啲水開始凍，我想依隻豬仔仲有排玩呀。唔緊要，暑假仲有大把機會，只要小小豬鐘意，我地可以再嚟沙灘玩過啦！

可能大家會問.....點解小小豬咁大個仔仲係用緊水泡？其實依隻豬仔仲未學識游水，原本都有打算買個水袖加浮水衣俾佢用，不過小小豬又話好驚，仲有啲抗拒添。

為左唔好等佢驚左怕水，所以我地都係打算等佢享受玩水嗰個過程，唔想太過迫佢反而令佢嘅自信心冇左，加上學游水始終都係泳池會比較方便，就等佢係沙灘ENJOY一下玩水算了吧！

MY FACEBOOK~


MY WEIBO~

 

MY E-MAIL~

其他博客區
※※ SINA ※※

※※ MyBB星級Blogger ※※
※※ 熱新聞專欄 ※※
※※ 博勢力 ※※
※※ She.com ※※

※※ WeShare ※※
※※ theZtyle ※※

※※ U-Blog ※※

※※ SeeWide ※※

※※ BlogSpot ※※

※※ BK Milk 親子語 ※※