|
[親子旅遊] 沙田 火炭 稻鄉飲食文化博物館 Tao Heung Museum of Food Culture
|
|
kimfamilytravel
2015-05-11
1612
0
|
分享
收藏
博物館就去得多喇, 但係非康文署轄下的博物館你又有冇去過, 呢個係由稻香集團成立的「稻鄉飲食文化博物館」從不同時代，各種不同的飲食文化! 好適合半天遊
我哋今日去完教會之後就悠悠閒閒咁在屋企樓下食個下午茶, 然後差唔多3點先出發
我哋乘搭269D, 可能因為天雨關係所以差唔多4:00先到達沙田巿中心, 本來打算轉乘1個站火車到火炭站, 但係因為博物館到5:30關, 所以我哋就行幾步到的士站搭的士, 落車$35!
一落車就見到座好綠化的建築物, 地下嗰層係酒樓, 我估上面除咗博物館仲係訓練稻香廚師的地方(我估咋)
 
一入到去好驚, 因為博物館Close咗, 我即刻搵酒樓姐姐問, 我話我尋日打過嚟約4:00, 跟住佢叫我打番電話俾博物館同事.....
好彩, 原來只係因為慳冷氣所以佢哋唔接待人, 到有人要上去佢先開番, 所以各位朋友除咗電話預約之外, 大家都可以到佢哋官方網預約!
沿住樓弟上去, 地址寫1樓, 但係應該上咗2層! 職員姐姐帶我哋上到去開門俾我哋跟住就消失咗
樓梯上到去門口影番張相先, 哥哥你急尿呀?
行入門口之後就有個招牌, 又影番張「到此一遊」先!
沿路上到去一入門口就見到個燒味檔, D假燒味都整得幾似架(當然有D唔係好掂, 但係你識影相的話都幾似架, 只要張鏡頭移埋去燈光下影就好有效果)
 
 
扮完燒味佬, 又扮賣雞蛋仔
跟住又賣牛雜!
經過燒味檔轉右手邊就有舊式茶樓場景, 佢哋扮飲茶真係好攪笑, 妹妹將個假珍珠雞放入口堅咬落去, 真係嚇死我! 好污糟架嘛!
媽咪係咁椅教吓佢哋傳統飲茶文化, 話俾佢哋聽以前D人係點飲茶!(呀妹你又撩咩嘢!)
跟住我拎個雀籠落嚟, 唔知做咩妹妹好興奮碌大對眼!
各位小朋友切勿模彷, 呢D古董打字機同埋收銀機係唔可以掂架!!
傳統結婚擺酒場景! 你哋兩個唔結得婚架....
抱呀妹睇吓脆皮乳豬!
 
哥哥一見到佢就記得以前我帶佢去收割個部打殼機
 
之後我哋行去繼續參觀其他嘢, 講到飲食文化, 一定唔少得係人哋擺酒必有既龍鳳場景
其中一個滿漢全席場景真係好正, 我解釋俾Hysan知以前D人好衰, 食猴仔腦, 跟住佢就好驚, 夜晚我同佢瞓覺再講番, 佢都叫我唔好講!
跟住有頂黃帝同太監帽, 即刻拎上嚟戴影相, 好攪笑!
睇埋其他古時飲食器具, 喺現場有好幾部Mon係介紹番館裡面既古代器皿, 跟住呀哥轉個頭見到現場真係有覺得好驚奇! 同我講「Daddy, 頭先電視嗰個嘢, 真係有喎!」
 
 
呀妹唔好亂攪呀, 打欄咗Daddy賠唔起呀!!
我好鍾意呢度舊酒樓既門, 佢哋真係拆咗龍門酒樓度門放喺呢度俾人參觀!
燒鵝爐!!!
呢度仲放咗好多mini model全部都做得好似, 大家如果鍾意影佢哋記住帶番支100Macro鏡嚟呀!
呢個博物館有度好, 有個好乾淨既洗手間, 唔怕行行吓要落番酒樓個厠所!
最後我哋入咗去一個播放影片既房間, 裡面放哂稻香D獎, 同埋有度放咗假食物既牆
 
哥哥當然要同佢最鍾意食既鳳爪排骨飯影番張相留念!
 
差唔多行咗1個鐘我哋就離開啦, 基本上成個館得我哋一家人行, 我諗冇咩香港人知道有呢個地方
同埋係火炭可能又唔太方便, 所以比較少人嚟! 最多嚟開飲茶順道上去望吓
如果大家離開之後有時間可以去吓隔離個公園近城門河邊, 望吓東鐵過橋, 不過落雨濕濕我哋好快就搭番火車去沙田新城巿廣場
到咗NTP之後我哋就去最頂個露天花園行吓影吓相, 有音樂噴泉, 小朋友好開心咁跑嚟跑去睇噴泉!
仲順道行埋去Snoopy Land但係好快就落雨, 所以我哋就走lu...
 
 
Photo by CANON 5D Mark III, Len | EF 35mm f/1.4L USM
呀劍評分: 6.5分
呀劍評語: 對半日遊嚟講實在係個不錯既地方, 博物館得一層但係都唔算細, 同埋因為幾乎冇人行所以行得好舒服! 如果加埋其他行程, 例如去樓下飲早茶再加遊博物館, 然後可以番沙田公園玩或者在火炭看看有沒有其他特色景點, 最後在新城巿廣場晚饍都OK架, 當然如果帶住大D既小朋友可以去食地道嘢tim...
稻鄉飲食文化博物館簡介
「稻鄉飲食文化博物館」從不同角度介紹各地飲食文化，透過模擬場景、文字說明，以及不同時代、不同地區所用的煮食用具、容器、餐具及香料食材等展品，讓大家親身領略各國獨有的飲食文化和特色，體驗人類飲食文化的睿智和趣味。
地址
新界沙田火炭坳背灣街13號1樓
開放時間 星期二至日及公眾假期 ： 09:30 – 12:30, 14:30 – 17:30 *逢星期一(公眾假期除外)、 農曆年初一至初三休館 ***公眾人士可預約參觀時段：星期六、星期日及公眾假期時段：09:30-10:45,11:00-12:15,14:30-15:45及16:00-17:15每節參觀時間為1小時15分鐘，由「稻鄉飲食文化博物館」導賞員以粵語進行講解。有興趣參加的市民可透過本網頁報名，每節時段名額為三十人 費用 免費入場
交通
- 東鐵火炭站步行5分鐘
網上預約
http://www.taoheung.com.hk/tc/museum/museum_p/index.html
電話
3989 7000
(以上資料更新至文章當日)
感謝 呀劍萬帥 提供以上資料 呀劍萬帥的網誌: http://kimfamilytravel.blogspot.hk/
|
~END~
| 商店 | 稻鄉飲食文化博物館 |