抱歉,發生點錯誤。
重新載入
[親子旅遊] 屯門 龍鼓灘 Lung Kwu Tan 中華白海豚觀景台
kimfamilytravel
2015-05-31
1831
0
分享
收藏
今日我哋既行程係屯門龍鼓灘 > 中華白海豚觀景台 > 環保園 eco Park




今日一早起身發現天氣好好,一心打算到龍鼓灘走一走,

點知出門口去到屯門西鐵站既時侯天氣開始變得麻麻地!

抱住不怕風雨的信念,我哋繼續前行

因為我覺得只要安全,遇上風雨對小朋友嚟講都係一個考驗經歷

我哋搭上西鐵到屯門總站落, C2出口, 沿扶手電梯落去轉左就見到巴士總站

最右手邊就係K52巴士站, 上車搭到去龍鼓灘總站就得架啦!

大家其實去到第23個站 沙埔崗312號 就已經可以落車行出去龍鼓灘,

(24站 沙埔崗177號 ; 25站 沙埔崗127號 及最後總站 龍鼓灘)

你哋可以選擇唔同地點落車去欣賞風景

我哋揀咗總站落車,
喺車上面Hysan已經嗌肚餓, 所以我哋去咗海邊餐廳搵嘢食先!

巴士落車後過對面馬路

見到個交通燈掣, 似係新樣喎, 我巿區都未見過!



Photo by iPhone 5S

之後穿過停車場, 就會見到一棵巨樹, 同埋村公所, 天后廟咁!




向海方向行出去, 沿路有好多枱櫈, 係海邊BBQ場的,



沿海行見番頭先喺坐巴士嗰陣見到既發電廠!


見到海邊餐廳同時你都會見到燒烤場, 今日咁既天氣居然都有團體咁早嚟燒嘢食喎!

旁邊仲放咗好多街機係度, 呢D真係名副其實叫「街機」呀喂!


仲有個舞喺度, 有個職員喺上面試咪, 唔同呢度夜晚仲有得唱K?



妹妹坐低咗之後就可以開餐啦! 當然預備咗私家飯俾佢啦!

海邊餐廳冇咩食, 仲要限死你得3款, 

今日係粟米豬扒石班, 蕃茄肉片同埋咖喱雞翼飯!

我哋叫咗碟粟米豬扒俾Hysan食, 我同媽咪就求其食少少!


食飽飯之後我就同Hysan出發去中華白海豚觀景台


我抱住多數都睇唔到海豚既心情一路向前行, 行咗唔夠2分鐘已經見到上觀景台既樓梯!


有個指示牌喺度! 指示都好清楚


喺樓梯口影番張相先!


我哋行呀行....


行呀行....


差唔多過百級樓梯, 行到Hysan都話好辛苦, 其實大人行應該15分鐘可以上到個亭度!


影番個龍鼓灘全景先! 今日天氣好差, 仲有打雷聲!


Hysan 不斷話都冇海豚既!


在涼亭呢度右手邊有條樓梯可以行高少少, 但係條樓梯都燒毁, 我聞到好大煲爉味,

中秋都未到, 唔係咁快有人玩煲爉卦

連上面張枱櫈都燒爛哂!

遠望既山都燒到一片死寂!


最後我哋唯有落番山啦!

邊落樓梯邊唱起歌來! 哥哥雖然見唔到海豚但係都好興奮


芊芊見到隻狗睡覺, 跟住指住佢話佢好懶!


我諗隻狗都喺度諗, 唔知呢兩個細路係度做咩!


之後我哋周圍行多陣, 入埋去條村度望吓, 就番去總站等巴士




巴士都算密, 13-20分鐘一班, 所以我哋都係等咗5-6分鐘度就有車!

跟住我哋向Eco Park環保園出發啦!


Photo by CANON 5D Mark III, Len | EF 35mm f/1.4L USM

呀劍評分: 5分


呀劍評語: 我睇過其他人於2013的Blog,發覺有完全不一樣的感受,一來天氣不好,所以沒有遇到玩滑翔傘的朋友,二來像是有人的破壞,河流積有垃圾,山勢像遇過山火般,感覺好淒清!

龍鼓灘 簡介
龍鼓灘因為鄰近珠江口, 水質比較混濁, 因此沒有救生員駐守, 所以不適合游泳。但因為位處新界西部的關係, 是新界西除了流浮山、白泥外, 另一個比較多攝影朋友拍攝日落的熱點。


地址
位於香港新界屯門的西面,區內有不少特殊建築,其中香港兩家大型發電廠便位於此,附近亦有不少燒烤場設施。

交通
港鐵巴士K52綫:往西鐵綫屯門站C2出口(經輕鐵蝴蝶站、屯門碼頭、屯門市中心)

(以上資料更新至文章當日)


============================================

感謝 呀劍萬帥 提供以上資料

呀劍萬帥的網誌: http://kimfamilytravel.blogspot.hk/


============================================

~END~
商店 中華白海豚觀景台