好感恩搵到個同樣鍾意食野的他，齊齊去唔同地方搵食真係一種樂趣，食到好好味既餐廳大家都會好開心，食到難食既又會一齊講有幾難食，同聲同氣。

今日晚餐就揀左天后樓上店的A la umi法國私房菜餐廳，上到大廈25樓，一推門入去就見到大片落地玻璃，約十張檯，雖然環境唔大，但感覺舒適。能望到太陽落山既維港美景，一邊摸住酒杯底，同對的人一同品嚐美食，感覺寧舍好味。

客人可選擇叫套餐或者a la carte(散叫)，散叫有供應頭盤、湯、意粉、扒類、刺身拼盤、海鮮和生蠔等；生蠔有數款，由$38~$58不等。

套餐係睇你捺揀邊一款主菜去定價，價錢$468~$498。包前菜、頭盤、湯、主菜，是日甜品/咖啡茶(二揀一)，但有點奇怪點解甜品同咖啡茶唔可以都有埋? 小妹覺得咁樣會比較好，有時食飽都想飲返杯茶消消滯。

先來一籃小麵包，麵包都係微熱，前兩塊一片片的那款都烘得脆脆的，中間個款入口香甜，搽埋牛油好好食。

呢度亦有生蠔供應，叫套餐加 $98就有三隻。今次我地就試左Gillardeau, Scottish rock, Fine de claire呢三款，餐廳會由味道淡至濃(相片：右至左排列)。


小妹就食左味道濃淡於中間位的 Scottish，入口有海水的鹹味，味道鮮甜爽口，很順滑，after taste在口中久久未散。

18個月黑毛豬風乾火腿伴哈蜜瓜

粉紅色入口軟屬的黑毛豬風乾火腿，配上入口超甜既哈蜜瓜，平衡左風乾火腿帶來既重鹹香味，真係好清甜又滋味。

是日精選頭盤 

(小妹叫佢做帶子三文魚配西西里汁)

上面係炸蓮藕片，入口脆卜卜，帶子配三文魚既食法頗特別，有著帶子既爽甜，文魚肉入口很滑溜，連一向唔愛食三文魚既小妹都覺好食。

用上芒果肉、黑橄欖和蕃茄等所製的西西里汁，味道酸甜好開胃，

薑汁南瓜忌廉湯 (前)

加入薑汁既南瓜湯比較少見，所以飲落喉嚨有點微辣，熱熱的感覺。

鮮蟹肉龍蝦忌廉湯 (後)

龍蝦湯飲落順口甘香，入面仲有絲絲蟹肉，唔錯。

烤美國安格斯300日肉眼(200g)配紅酒汁 $488  (套餐)

要左五成熟，一路切既時候已聞到帶有濃郁既焦香，內裡粉嫩既肉質，咬落充滿肉汁，肉味濃郁，肉質好鬆化，愈嚼愈香呢。

烤西班牙雪花黑毛豬配蘋果黑醋汁 $468  (套餐)

豬既外皮切落去帶點脆身，咬落外脆內軟，望到外層以脂肪包圍住黑毛豬肉，半肥瘦既肉質，兩層既口感，入口同樣鬆化，咀嚼中帶有脂肪香，好邪惡又滋味，我覺得呢個仲好食過牛扒呢。

朱古力心太軟伴雪糕 (甜品/咖啡茶，二揀一)

心太軟配上雲呢拿雪糕，仲有兩大粒原粒草莓，望到都好吸引呢，完全唔係交行貨既飯後甜品。

身為草莓粉絲既小妹，梗係食左佢先。原來呢粒望落亮晶晶既草莓裹著一層糖漿，咬落脆脆的。而且果肉同葉已預先切開，再砌返成原粒士多啤梨，相當細心呢，保持賣相之餘亦都非常方便享用。

心太軟賣相夠挺身，唔會東倒西歪，完完整整的一個；切開後，流心慢慢流出，感覺超美啊! 食落外層帶點微脆，內裡係蛋糕質感，濃濃朱古力味又唔過甜，讚!

總括黎講食物由頭盤到甜品都頗有水準的，食物質素高，所以這價位黎講都唔算太貴，來慶祝紀念日、吃個晚餐都唔錯，完全有再來的理由啊! 

A La Umai

地址: 天后電氣道108號冠貿商業大廈25樓

(港鐵天后站 A2 出口, 步行約3分鐘)

電話: 2234 6628

營業時間: 星期一至六 12:00-14:30, 18:00-23:30; 星期日 18:00-23:30

================================

(喜歡的，請按讚支持，是給我很大的鼓勵啊 )  

Connie's Food and Life Corner

   

============================================

感謝 糖小妹 提供以上資料

糖小妹的網誌: http://concon2016.blogspot.hk/

============================================