|
[元朗] 早辰 ‧ 少見的手製捲意粉 | 甜品方面也很讚啊!
|
|
糖小妹
2015-01-03
542
0
|
分享
收藏
近來元朗區真係多左好多新食店，特別係甜品和咖啡輕食店。原先唔少店子已列入小妹want-to-eat既名單中，但每隔一陣又有新店開幕，真係唔知先去邊間好，愈黎愈多店都好吸引呢。
今日放工後，約左友人一齊位於又新街，新開張無耐既「早辰」先食個晚餐，光睇餐廳名稱，令小妹諗起「早晨」，個名好似早餐店咁。但其實入面專食西餐同意大利菜外，仲有個賣點，就係店子邀請左一名有多年經驗既大廚，除左煮義大利菜外，意粉仲係新鮮自家製，好多餐廳大多數都係使用外來貨，自家手搓既真係少，所以這個賣點已經相當吸引，立即想黎試試。
進店內，店員隨即安排我們坐左卡位；店子以黑白色為主顏色，白色椅子和黑色檯子，掛了數盞簡單又型格既吊燈，感覺很摩登，仲放左數部LCD電視等食客可以邊睇邊食，整體令人簡單舒適。
細看餐牌，選擇都唔少，店員也細心的為我們推介，認真貼心。
餐牌有分湯、沙律及頭盤、意大利飯、自家製義大利飯、主菜和甜品等。
如果點了意粉或主菜，可另加$50配菜湯或一款沙律和頭盤；或者加$40可配甜品或咖啡或茶，豐儉由人。
店員先送上黑醋和橄欖油來配麵包。
義式海鮮湯 $78
再來的義式海鮮湯，本身還以為是普通西餐湯般每人一小碗的，想不到份量是這麼多，內裡有大蜆、青口、魷魚和蝦等，份量超足，飲落有濃郁蕃茄味，整個感覺很鮮甜呢!
自家製手捲意粉 (煙肉、青豆、羊奶芝士、忌廉、黑松露汁) $138
再來係主角出場，自家製的手捲意粉，每條都大小不一，意粉咬落煙韌有質感，每條意粉都掛上忌廉汁，入口有頗濃郁的松露香，超喜歡。
自家製鮮奶闊麵 (蜆、蕃茄意大利青瓜、白酒香草汁) $158
這款比剛剛的那款較為闊身和硬身一點，掛汁程度還是手捲意粉較好，不過白酒香草汁的味道是頗討好的，當中的四隻大蜆食落超鮮甜的，最重要是沒有沙，很棒!
扒安格斯西冷牛扒(巴馬芝士放面焗) $198
把巴馬芝士放在牛扒上一同焗製，多了一重鹹香味，對於喜愛芝士的小妹是覺得頗不錯的。但如不愛芝士或較喜愛原汁原味的的話，這個配搭可能會有點卻步，建議店子可讓客人自行選擇是否加芝士。
牛扒食落富有肉汁，肉味濃，但小妹本身要了五成熟，但熟度感覺不止五成呢，幸好食落不會韌。配菜還有些薯角、烤翠肉瓜和茄子呢
再來係甜品時間，本來我地決定入得黎元朗，梗係會有下一場既甜品宵夜，但店主大力推介這裡既甜品，大約有3~4款，便決定試試。
蜜糖芭菲松子仁雜啤梨汁 $68
用蛋白打成再加糖拌勻後再加上忌廉和松子仁碎，食落像雪糕般，每啖都帶有香脆的松子仁香，再伴上酸甜的雜啤梨汁，平衡了飽滯感，特別又美味!
青檸忌廉凍．燴雜莓．脆杏仁片 $68
入口青檸味很重呢，酸咪頗強，還要配上至愛的燴雜莓，小妹超愛!
伯爵紅茶
最後以一壺伯爵紅茶為這餐劃上完美的句號，真係食得很滿意，甜品和手捲意粉也很有驚喜!
早辰
地址: 元朗又新街37-51號富祐閣地下8-9號舖
電話: 3998 4498
營業時間: 星期一至日: 11:30-23:00
================================
(喜歡的，請按讚支持，是給我很大的鼓勵啊
感謝 糖小妹 提供以上資料 糖小妹的網誌: http://concon2016.blogspot.hk/
|
~END~
| 商店 | 早辰 Good Morning Restaurant |