初二飲完茶都係無嘢好做，所以約咗 +Asintar Chan 一齊行山。唔想再行山頂，但又唸唔到港島有咩好行，最後決定行砵甸乍山，跟住出返小西灣，晨運路線，輕輕鬆鬆。
點知今日年初二天色其好。真係唔想浪費咗咁好既時光，再加上大機隨身，所以轉易目的地，去龍脊。
今次係第三次行龍脊，第一次天色差，咩都睇唔到。第二次參加緊環島行，想影相都唔可以停好耐。所以今日咁好天，正！
係筲箕灣搭巴士去到土地灣，開始起行。時間係1:25分，天色非常好啊！今日無預備堅行山，仲著到行街咁，好在陳慧敏成身行山look，行沙石要靠佢支行山棍啦！
一開始係上樓梯，不過實在初級程度，完全無難度。大約20分鐘已經上到山，望見好清晰既石澳。海天一色，幾大風都要影幾張沙龍。上多10分鐘左右，就去到山頂啦！更加大風，不過點都要再停底影吓樣相。
影完相之後就開始落山，一開始有少少沙石路，但好快就落到去平路。一路就咁沿著樹蔭路行走。但無音樂伴隨既時候，呢條路真係好悶。終於3:10分離開龍脊向大浪灣出發。
行咗20分鐘車路左右，去到分叉口。噢！有寫明去小西灣。好！唔駛落大浪灣！沿引水道行，雖然係悶，不過總算未行過。行多十分鐘左右，再有一個分叉路。又係通往大浪灣。另一條就係歌連臣角道。都底啱唔啱。但行山一士真係好幫手，居然係地下寫咗小西灣，正！
向山行多幾級樓梯，就見到有個觀景台，砵甸乍山嚟到啦！雖然天色未算最好，不過係度都好清楚望到將軍澳，連釣魚翁都見到，算係咁啦！
跟住就落樓梯，整齊既樓梯好明顯提供俾晨運客，仲話明俾你聽有500級添！行到落去就係龍躍樂園，應該係小西灣上面既地方。
我哋沿左邊條路行，因為見路闊，又多人跑步。點知一路行，向左邊山上望，原來係墳場，我最驚架嗱！加上條路都唔知行去邊，勁似去返巴士開始上山既地方。而
右邊咁望亦似出咗小西灣向緊柴灣方向行。終於見到有條小樓梯落山，唔理啦，博一博。終於好快咁落到車路。不過真係唔知係邊。過多一條馬路係大馬路，有車出
返中環等地。OK！今日行大運完成。
感謝 vi老篤日記 提供以上資料
vi老篤日記的個人網誌: http://vivi-1212.blogspot.hk/
| 