天堂之路 - 烏蛟騰至烏蛟騰

好耐無行過山，約咗一班同事五一行山，今次攪手同埋路線都係ivy負責。路程要六小時又驚行到天黑，但亦驚太早起身。最後都係約咗十點半係大埔火車站等！搭的士去到烏蛟騰，就開始今日行程。

天 氣唔算好差，不過啱啱落完雨，一開始行既時候時雨時太陽，都好難服侍吓！亦可能因為d 霧氣太勁關係，唔知點解一嚟條涌都好似特別迷幻。雖然有張簡單行程紙，不過基本都係憑感覺行，因為之前玩東北縱走已經玩咗啦！不過其實印象有d 模糊。今日再行起，條路都幾平坦，但前兩日既大雨再加今朝既細雨，滿地泥濘。全程玩泥漿摔角。我很不幸，滑咗一嘢，尾指仲要撞咗去舊石度。(朣咗兩個星期 今日終於去睇跌打。) 除咗有損傷，對鞋同褲又係見到都眼怨。著襯呢對鞋都要大洗，真係黑。

我 哋行到兩點半先去到荔枝窩！我同 Judy 都跌到，不過都算ok，而 ivy對鞋就爛咗！再加上好多水澗好似變咗小瀑布咁，大家對鞋都濕咗！所以去到荔枝窩食豆腐花既時間，即刻問老闆有冇船走，點知佢話艇家出咗去啦！連放棄 既希望都無，我哋而家三點幾先到荔枝窩，行咗一半路，之後仲話有上山路，慘啦！要行快d ，千祈唔好天黑。點知，大家真係上咗電，正確嚟講，係行山派non-stop 咁行，所以分咗兩小隊咁，前面四個有四個行，後面四個有四個行。我當然係前面，行樓梯上山唔停，有長椅都只係停一陣繼續上，可能咁樣連帶後面嗰四個應該都 不敢鬆懈，所以我哋五點已經出返烏蛟騰，而後面四個都係遲我哋20 分左右，勁！

最後覺得呢條路既景色都係好普通姐，唔係有好多靚景，而且今日天空有白濛濛，所以唔算影咗好多相。不過總算夏天前最後一次行山啦！

感謝 vi老篤日記 提供以上資料

vi老篤日記的個人網誌: http://vivi-1212.blogspot.hk/