抱歉,發生點錯誤。
重新載入
小曼谷海鮮燒烤屋 Mini Bangkook Seafood and Grill:曼無一失?
山區麵包王
2015-08-09
1141
0
分享
收藏
東南亞菜一向都幾鍾意,無論越南、星馬、泰國……貪其香料味變化多端,繼上次去咗南角道嘅「泰式素食」同老婆食咗一餐素食嘅泰國菜晏仔之後,今日再同屋企人嚟食番餐唔素嘅泰國菜午飯。雖然話九龍城有多好泰菜館,更不乏卧虎藏龍,之但喺小弟就無乜個人心水,不過,啱啱睇過相熟食友對「小曼谷」嘅食評,再Whatsapp問過都話唔錯,所以,穩穩陣陣就食依間。
大熱天時、烈日當空,由樂富港鐵站行過嚟都咪話唔辛苦,不過,好彩有巴士直達到附近,真期望快啲有地鐵過到嚟九龍城。一入到店內,有別一般傳統嘅九龍城泰菜館,除咗門口無一座座嘅神神佛佛嘢之外,內裡亦唔多見有,竹排嘅裝飾,半藤半皮嘅座椅,算喺有點點特色,但勝在樓底夠晒高,令人感覺寬敞。
原以為有啲午市套餐供應,原本星期日喺無嘅,我哋就只好散叫。一大一細兩個餐牌,大嘅喺主餐牌,有齊店方所供應嘅食物,如泰式沙嗲串燒、風味海鮮BBQ、廚師精選、沙律類、炒菜類、飯類、炒河類、咖喱類、炸物類、湯類、飲品及甜品,足足過百款嘢食。
而細少少嘅餐牌就主要喺一啲店方嘅推介,或者熱賣,包括各個類別,如無個人偏好,大可以晌依個細餐牌着手,集中試啲「精選」。
餐牌內有多款沙冰選擇,定價唔貴,都喺$22-$30,有啲特飲如泰式龍眼冰、椰汁冰都喺賣緊$22,飲杯汽水都要$14啦,所以,揀特飲絕對划算啲。
bowl芒果椰汁沙冰 $30 
以芒果味為主,椰汁味則比較隱約,但芒果味好清甜、好香濃,加上夠冰凍,口感又頗綿密,唔會有粒粒冰感,所以,杯沙冰值回票價。
bowl椰青 $36
家人喜歡飲得天然啲,所以,椰青自然成為佢嘅心水。清澈嘅椰青水椰香清雅,清涼解渴,椰肉嫩滑,輕易就刮到出嚟食。
bowl泰式柚子沙律 $78
幾款沙律中,都喺對柚子沙律情有獨鍾,因為貪泰國紅柚清甜唔澀又爆汁,果然,個沙律無令人失望,唔單止柚肉多,粒粒飽滿多汁,清甜不澀,又灑上花生及乾椰絲,增加口感嘅層次度,加上幾隻爽口嘅大鮮蝦,就喺令個沙律錦上添花,讓人覺得更抵食,至於個汁做得酸香而帶點辣,少少刺激醒胃。
bowl泰皇咖喱炒海鮮 $198
估唔到個咖喱海鮮真喺咁大碟,之前睇老友個食評都唔覺。大碟還大碟,但的確抵食,因為有大頭蝦、大花甲、青口、鮮魷,份量十足,仲有唔少配菜,所以,非常豐富。先講個咖喱,汁底綿滑,微微椰香,辣度十分輕微,整體而言確實唔錯。而幾款海鮮都好鮮味,喺啲青口麻麻哋,大花甲厚肉鮮甜,鮮魷口感柔嫩,講到最有睇頭,就梗喺隻大頭蝦啦,輕易拆到啲蝦肉,大嚿大嚿咁放入口,仲要沾滿咖喱汁,真喺食得不知幾爽。
bowl泰式原味烤酥餅 $25
食咖喱,唔叫個白飯,或者酥餅,真喺會嘥晒啲咖喱汁,所以,點一客泰式原味烤酥餅,再用嚟沾咖喱食,熱辣酥香嘅酥餅,夾雜咖喱放入口,真喺一流。
bowl原隻鮮魷筒釀糯米飯 $148
以上無論啲嘢飲、沙律或咖喱,都做得有水準,臨尾,就點個糯米飯墊墊肚,怕大家唔夠飽,不過,件魷筒又好,糯米飯又好,都有過鹹嘅情況。其實,見大廚做依道菜都花咗啲心機,將糯米飯釀入原隻鮮魷筒再燒,再鎅開魷筒成一件件,配酸辣汁同食,再者,件魷筒燒得金黃焦香,賣相賺得唔少分,唯可惜鹹咗啲,此外,糯米飯亦有少少煮得過爛,算喺失手之作。不過,份量上,食起上嚟就絕對好夠飽肚!
幾樣餸都上枱快,招呼亦唔錯,不過,最後嘅原隻鮮魷筒釀糯米飯就等得好耐,滿以為喺「曼」功出細貨,卻有啲甩漏,希望下次再嚟會做得好啲!

個人評分
味道:7/10
環境:7/10
服務:8/10
抵食:7/10
平均每人消費:HK$190

餐廳資料:
小曼谷海鮮燒烤屋 Mini Bangkook Seafood and Grill
九龍城太子道西398號御太子地下1-3號舖
2716 7868


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

~END~
商店 小曼谷海鮮燒烤屋 (衙前塱道店)