|
我? 唔算醃尖喇...
|
|
oasiswong
2015-03-14
337
0
|
分享
收藏
上網睇一睇, 三十幾個好評, 有一部份係邀請試食的食評, 可信度成疑 (這店的試食食評, 尚還可以簡單地分辨得到, 但近期有一些試食食評, 就算寫明付款金額, 都十分可疑, 好難分辨…., 今次唔講住…留翻下次..), 無論如何, 好評多, 唔太難, 但劣評一個都無, 就唔容易, 就算做得幾好, 始終總有一些醃醃尖尖的客人, 又或是期望與現實不對應的情況... 食肆的門口位置不顯眼, 要上二樓, 隔離還有間大型超市, 招牌大過此店. 門口對聯公正但頗為硬銷一點…囉. 上到二樓, 人客不多, 只有兩三檯客, 十分清閒. 電子餐牌? 用iPad落單..??? 非也… 只是iPad餐牌, 無錯, iPad餐牌內軟件的確有”落單”功能, 但並不可以用的, 部長都是拿了我們落了單的iPad去櫃台, 再從新落一次單, 部iPad其實只係代替了一張手寫紙….唔..唔.. 果然係天才!! 哈哈… 我估…香港食肆, 無可能比客人自己咁樣落單… 客人如果按錯鍵, 落錯單, 又或者, 本來想取消, 但變咗加多一碟, 點算先..!? 你估一句”客人自己按鍵, 自己負責” 就得呀!?! 到時肯定嘈餐飽, 日日十幾單投訴都似….. 友人未到, 先來一杯House Red: J. Moreau Merlot Cabernet Languedoc 2012, $52/Glass, 上網睇介紹, warm? 唔覺, Plumy nose? 真係有少少梅子味, Red berry fruits? 睇咗知道了, 抱歉…試唔出, Soft tannis, 入口一刻, 單檸味不重. 總體滿意, 想知網上價格? 同差唔多啦.. 就係幾十蚊…囉, 不過, 係一枝, 唔係一杯…哈哈… 做生意唔使賺咩!! 水晶餚肉, $68, 味道淡口, 友人讚好, 我較喜歡鹹些, 現時的人普遍喜歡清淡口味較為健康, 清淡? 我寧願回家煮囉…, 肉質膠質彈口. 但失望的是, 醬汁用白醋, 離譜呀!!! 有無攪錯!! 點解唔用浙醋呀?? 最好加些少薑絲啦… 咖啡溏心燻蛋, $68, 尚可, 真有咖啡味道, 但溏心程度略遜色, 只有非常中間的小部份做得溏心. 桂花脆鱔球, $248, 望落都有十件, 話多唔多, 話少唔少, 即係大約$25/一件, 話貴唔算太貴, 話平又唔算太平…哈哈哈… 夠廢話吧…. 聽見隔離檯問部長, 鱔是新鮮還是雪藏? 唔唔, 唔唔… 你想係呢度食新鮮即劏大鱔..乎!?!?!? ….就..咁樣樣… 鱔球肉質的確唔差, 彈口度可以, 但醬汁做得不太好, 我覺得豆粉落得太多, 導致芡汁太杰. 樟茶鴨, $168, 唔知此店用甚麼的煙燻方式, 但入口的煙燻味道不高, 鴨的皮做得好味, 脆而且帶些煙韌, 而鴨的肉質就略為實了一點, 但尚算可口, 唯皮肉中間的白肥膏太厚, 不能一起入口, 要先做一些切割手術. 金沙肉排, $128, 用鹹蛋黃做的脆皮, 包著排骨肉. 真係”正”到無朋友…. 同檯甲乙丙都唔敢食太多, 個個都係一件, 而我?? 食咗好多件呀… 真係金翅大鑊鳥. 剛上完”營養學ABC”課, 鹹鴨蛋在蛋類之中, 膽固醇最高 (雞蛋膽固醇含量最低, 而鵪鶉蛋因細隻, 如果不以份量計, 其實唔差太多), 為免真係好快要去”賣鹹鴨蛋”(後生仔未必知這Slang之意, 70後就一家知, 來自”蘇州賣鹹鴨蛋”, 網上找找吧), 明天要跑多一個鐘先補得翻數… 野菌醬燒特級牛肉, $148, 與友人笑談: 唔知咩嘢係”特級牛肉”?? 哈哈…. 牛肉的醃粉程度少, 十分滿意, 味道也好, 收這個價格, 不可能只用一般的菇類吧, 起碼要放一些新鮮茶樹菇, 才令客人覺得與別不同. 油雞樅野菌千頁豆腐, $148, 手工製作需時, 最後上檯, 千頁豆腐….口感同未經過切的豆腐有無唔同?? 你食得出有唔同既話…. 我估….你應該係…食界的武林至尊. 白飯, $12, 全香港無幾多間食肆供應的白飯夠熱, 呢間亦不例外, 但此店的白飯做得好, 粒粒分明, 沒有一舊舊, 入口, 是我最喜歡的硬度… 我同友人講, 今日無你鍾意食開既”軟飯”…哈哈..哈哈.. 茶錢, $16/位, 大家評一評貴唔貴啦…...對我而言 (有些時候, 服務水準真會是”相對”和”互動”的, 所以也是”主觀”), 此店的服務水準是酒店級數, 非常專業, 真係做到, 你需要時, 他立即出現, 你不需要時, 他不會來打擾你.
感謝 oasiswong 提供以上資料 oasiswong 的網誌: http://www.openrice.com/zh/gourmet/reviews.htm?userid=85184&city=hongkong
|
~END~
人均
$320.00
| 商店 | 壹玖捌叁 Hong Kong Cuisine |